बिहे भाँडिएपछि बुद्धनगरकी २७ वर्षीया पुष्पाले रोजेको आत्मदाहको अन्तर्य

A+ A A-

नुवाकोटकी २७ वर्षीया पुष्पा न्यौपाने केही समयदेखि दरबारमार्गस्थित केल्मी ब्रान्डको शोरुम सञ्चालन गर्दै आएकी थिइन् । तुलनात्मक रूपमा केही महँगो मानिएको केल्मी ब्रान्डकै लुगाकपडा लगाउन सोखिन थिए- काठमाडौं धुम्बाराही– ४ का २९ वर्षीय सुधन संग्रौला ।

पुष्पाकै शोरुमका नियमित ग्राहक भएका संग्रौला र पुष्पाबीच गत वर्षको माघदेखि घनिष्ठ सम्बन्ध हुन पुग्यो । उनीहरू एकअर्काले मोबाइल नम्बर साटासाट गरे । फेसबुकमा साथी बने । नियमित कुराकानी हुन थाल्यो । व्यापारी ग्राहकको सम्बन्ध प्रेममा बदलियो ।

न्यौपाने र संग्रौलाबीचको प्रेम झाँगिदै गयो । उनीहरूबीचको प्रेम दुई जनामा मात्रै सीमित रहेन । दुवैको घरपरिवारसम्म थाहा भइसकेको थियो । पुष्पा र सुधनले प्रेमलाई विवाहमा परिणत गर्न चाहन्थे । दुवैले प्रेमबारे घरपरिवारलाई जानकारी मात्रै गराएनन्, विवाहसम्मको तयारीमा पुगे ।

दुवैको परिवारसमेत राजी भए । पुष्पा र सुधनको परिवारले उनीहरूकै राजीखुसीमा १८ भदौ २०७९ मा विवाहका लागि ‘इन्गेजमेन्ट’ सुपारी, टीका टालो गरे । ‘इन्गेजमेन्ट’ गरेको एक वर्षपछि विवाह गर्ने उनीहरूको तयारी थियो । भदौमा भएको इन्गेजमेन्ट केही समयसम्म राम्रै चलेको थियो । पुर्ख्यौली घर नुवाकोट भए पनि पछिल्लो समय पुष्पा न्यौपानेको परिवार काठमाडौंको बुद्धनगर बस्दै आएका थिए ।

एक वर्षभित्र बिहे गराइदिने तयारीमा रहेको पुष्पाको परिवार १७ मंसिरमा भने एकाएक निराश हुन पुग्यो । भदौमा ‘इन्गेजमेन्ट’ गर्दा लिएका सुपारी, टीका सबै सुधनको परिवार फिर्ता गर्न पुष्पाको घरमा पुगे । सुधनको परिवारले पुष्पासँग बिहे हुन नसक्ने भन्दै इन्गेजमेन्टको सामान फिर्ता गराएको थियो ।

पुष्पाको बिहेका लागि जुटेको उनको परिवार निराशामा पुग्यो । ‘इन्गेजमेन्ट’को सामग्री फिर्ताले पुष्पा विक्षिप्त हुन पुगिन् । उसो त इन्गेजमेन्टपछिको केही समयदेखि नै पुष्पा र सुधनबीच मनमुटाव हुन थालेको थियो ।

तर, बिहे नै भाँडिन्छ भन्नेचाहिँ पुष्पालाई लागेको थिएन । १७ गतेको इन्गेजमेन्टको सामग्री फिर्ताले भने उनी तनावमा पुगिन् । आइतबार तनाव थाम्न नसकेर पुष्पा सुधनको घर काठमाडौं धुम्बाराही पुगिन् ।

सुधनको घर पुग्दासम्म पुष्पाले आफूमाथिको अपहेलना सहन नसकेर संसार छोड्ने निर्णयमा पुगिसकेकी थिइन् । त्यो कुरा उनले परिवारलाई सुइँकोसम्म दिइनन् । उनी हिँडेरै सुधनको घर गइन् । साथमा एक बोतल पेट्रोलसमेत बोकेर पुगिन् ।

पुष्पा सुधनको घरपुग्दा सुधनकी बुढीआमाबाहेक परिवारका अन्य सदस्यहरू घरमा थिएनन् । सुधनको घरको ढोका अगाडि आफ्नै शरीरमा पेट्रोल छर्किएर आगो लगाइन् । पुष्पालाई प्रहरी वृत्त महाराजगञ्जको टोलीले घटनास्थलबाट उद्धार गर्‍यो ।

उनको अधिकांश शरीर जलिसकेको अवस्थामा उद्धार गरिएको वृत्तका प्रमुख डीएसपी अंगुर जीसीले बताए । प्रहरीले पुष्पालाई सुरुमा त्रिवि शिक्षण अस्पताल पुर्‍याएको थियो । तर, त्यहाँ उपचार सम्भव नभएपछि कीर्तिपुरस्थित वर्न सेन्टरमा लगियो ।

तर, पुष्पाको सोमबार बिहान अस्पतालमै मृत्यु भएको छ । पुष्पाको परिवारले सुधन संग्रौलाको परिवारमाथि आत्महत्या दुरुत्साहनको उजुरी प्रहरीलाई दिएको छ । सोही उजुरीका आधारमा प्रहरीले सुधनलाई पक्राउ गरेर अनुसन्धान थालेको छ । सुधनमाथि अनुसन्धानका लागि प्रहरीले जिल्ला अदालतबाट अनुमति लिएर अनुसन्धान सुरु भएको डीएसपी जीसीको भनाइ छ ।

‘मुख्य कारण विवाह रद्द भएपछि पुष्पा तनावमा पुगेको देखिन्छ । हामी किन विवाह रद्दसम्म पुग्यो र यो अवस्था आयो । अनुसन्धान गर्दैछौँ । त्यसपछि मात्रै थाहा होला,’ डीएसपी जिसीले भने ।

प्रकाशित मिति: मंगलबार, मंसिर २०, २०७९ १३:३५