मलेसियामा सुरक्षागार्डमा कार्यरत उदयपुरका परियार र चौधरीको हत्या

A+ A A-

मलेसियाको सेरेम्बानमा रहेको एक रेस्टुरेन्टमा कार्यरत दुई नेपाली सुरक्षागार्डको हत्या भएको छ । मलेसियाको राजधानी क्वालालम्पुरबाट करिब ६५ किलोमिटर दक्षिणमा पर्ने सेरेम्बानमा रहेको एक रेस्टुरेन्ट परिसरमा उदयपुरका कृष्णकुमार परियार र मनोजकुमार चौधरीको हत्या भएको दूतावासले जनाएको छ ।

आइतबार राति मादक पदार्थ सेवन गरी आपसी झगडाका क्रममा उनीहरूको हत्या भएको हुन सक्ने मलेसिया प्रहरीले जानकारी गराएको र अनुसन्धान भइरहेको दूतावासले जनाएको छ । मृतकहरूको उमेर ३५ वर्ष र ४६ वर्ष रहेको पनि अनुसन्धानका क्रममा खुलेको दूतावासले जनाएको छ ।

उक्त झगडामा केही नेपालीलाई समेत प्रहरीले नियन्त्रणमा लिएको दूतावासले जानकारी दिएको छ । उनीहरूको अनुसन्धान भइरहेका कारण प्रहरीले पहिचान गोप्य राखेको छ ।

दूतावासका अनुसार मलेसियाको प्रहरीले आक्रमणमा हतौडा प्रयोग भएको र उक्त हथौडा बरामद गरेको रिपोर्ट पठाएको छ । मृतकहरूको शव एकअर्काबाट टाढै र फरक–फरक स्थानमा पाइएको भन्दै प्रहरीले फरेन्सिक जाँचपछि हत्याको उद्देश्य र अन्य विषयमा अनुसन्धान गरिरहेको दूतावासले जनाएको छ ।

रेस्टुरेन्टनजिकै रहेको सीसीटीभी फुटेजबाट घटनाको कारण र पक्राउ परेका नेपालीको संलग्नता रहे/नरहेको बारेमा प्रहरीले अनुसन्धान गरिरहेको समेत दूतावासले जनाएको छ ।

हत्या भएका नेपाली मलेसियामा सुरक्षागार्डको रूपमा काम गर्नेहरू भएको र उनीहरूको पहिचानसमेत खुलेको मलेसियास्थित नेपाली दूतावासका राजदूत डिल्लीप्रसाद राज पौडेलले बताएका छन् । दूतावासले पनि नेपालीहरूको हत्या भएको विषय र घटनाको तथ्यका बारेमा बुझिरहेको उनले बताए ।

‘रोजगारीमा आएका केही नेपालीहरूले आफ्नो मर्यादा नबुझ्दा समस्यामा पर्ने गरेका छन् । उनीहरूलाई दूतावासले सूचना र घुम्ती सेवा सञ्चालन गरेर पनि सूचित गराउँदै आएको छ,’ पौडेलले, ‘रोजगारीका लागि आएका नेपाली कामदार करार अवधि सकिए पनि अवैध भएर बसेका रहेछन् । यो एउटा समस्या देखियो । यो समस्या समाधान आगामी दिनमा हुन्छ ।’

घटनाको मलेसियाको दण्डसंहिताको धारा ३०२ अन्तर्गत अनुसन्धान हुने व्यवस्था छ । त्यहाँ कोही विदेशी नागरिकको हत्या भए दण्डसंहिताको धारा ३०२ अन्तर्गत सजाय हुने व्यवस्था छ ।

मलेसिया रोजगारीमा गएका नेपालीहरू आपसी झगडा, विदेशी नागरिकसँगको झगडा, मादक पदार्थ सेवन गरी होहल्ला गरेका कारण प्रहरीको फन्दामा र अन्य अनैतिक कार्य गरेर जेल पर्ने गरेका छन् । अहिले पनि मलेसियामा करिब २ सय नेपाली जेलमा रहेको वैदेशिक रोजगार बोर्डको तथ्यांक छ ।

प्रकाशित मिति: सोमबार, मंसिर १९, २०७९ १४:४१