प्रतिपक्षमा हामी छौँ, तपाईंहरू चलाउनुस् मिलीजुली सरकार

A+ A A-

सम्माननीय प्रधानमन्त्री एवं कांग्रेस पार्टी सभापति शेरबहादुर देउवाज्यू । तपाईंले आफ्नो पार्टीको आन्तरिक निर्वाचनको रिसराग हराउन नभ्याउँदै गत वैशाखमा स्थानीय तहको निवार्चन गर्नुभयो । लोकतान्त्रिक पार्टी कांग्रेसका कार्यकताले पार्टीको निर्वाचनभित्रको तिक्तता त्यहाँ पोखे पनि अन्तत: स्थानीय तहको निवार्चनमा पनि कांग्रेस पहिलो पार्टी भयो ।

त्यसो त २०७४ का तीनै तहको निवार्चन पनि तपाईं नेतृत्वको सरकारले सम्पन्न गर्‍यो । त्यसबखतको स्थानीय निवार्चनमा पनि केही दलसँग कांग्रेसले स्थानीय तहमा गठबन्धन गरेको थियो । कांग्रेस पहिलो पार्टी हुन नसके पनि परिणाम भने राम्रो आएको थियो । प्रतिनिधिसभा र प्रदेशसभामा भने वाम शक्तिबीचको गठबन्धनले प्रत्यक्ष निवार्चनमा पार्टी २३ सिटमा झर्‍यो ।

वाम गठबन्धन तुहिसकेपछि २३ सिटमा झरेको पार्टी कांग्रेसको काँधमा फेरि मुलुकको बागडोर सम्हाल्ने जिम्मा आएको थियो । त्यो तपाईंले प्राप्त गर्नुभएको छ । तपाईंले सफलतापूर्वक २०७९ को प्रतिनिधसभा र प्रदेशसभाको निवार्चन पनि शान्तिपूर्ण ढंगले सम्पन्न गराउनुभयो ।

यतिखेर निवार्चन सम्पन्न मात्र होइन, मतगणना पनि केही मात्र बाँकी छ, लगभग सम्पूर्ण क्षेत्रको परिणाम आइसकेको अवस्था छ । अब नयाँ सरकार गठन गर्ने बेला भएको छ । तपाईं मुलुकको प्रधानमन्त्री, जनताको अभिभावक हुनुहुन्छ । साथै, यो मुलुकको सबैभन्दा जेष्ठ पार्टी कांंग्रेसको सभापति पनि हुनुहुन्छ । तपाईंसँग स्वदेशका मात्र नभएर प्रवासमा रहनुभएका आमनेपालीका पनि धेरै अपेक्षा छन् ।

यहाँ घररूपी राष्ट्रको पितासमान, अभिभावक हुनुहुन्छ । अभिभावकसँग जनताले असन्तुष्टि, पोख्छन्, रिसाउँछन् पनि । सन्तान रूपी जनताले यहाँलाई पिरोल्छन् । यहाँको पिरोल्ने, रिस पोख्ने ठाउँ त छैन । तर सल्लाह, सुझाव अनि यसो गरौँ भन्ने पाँचदलीय गठबन्धन त छँदैछ । तर, अब पाँच दल मात्र होइन, सबै मिलेर सरकार चलाउनुपर्ने म्यान्डेट जनताले अनुमोदन गरेका छन् ।

जनताले दिएको मतपरिणामअनुसार अब प्रमुख दलहरूले मिलीजुली सरकार चलाउनुपर्छ । सन्तानरूपी सबै जनताको अपेक्षा पनि यही नै देखिएको छ । त्यसैले जनमतको आधार बलियो भएका दलहरूबीचको सर्वदलीय गठबन्धनको सरकार बनाउन यहाँ लाग्नुहोस् । पूर्वप्रधानमन्त्री एवम् एमालेका अध्यक्ष ओलीज्यू, तपाईं पनि दोस्रो ठूलो दलको नेता बन्नुभएको छ । मुलुकको बागडोर हातमा लिएर देश हाँकिसक्नुभएका तपाईं विभिन्न समयमा प्रतिपक्षको भूमिकामा पनि रहिसक्नुभएको नेता हो । यहाँले पनि जनताको हित र राष्ट्रहितका लागि सबै दललाई मिलाएर अगाडि बढ्ने अभियानमा साथ दिनैपर्छ । यस निवार्चनमा अप्रत्याशित रूपमा उदाएको दल रास्वपा, जनमत पार्टीसँगै राप्रपालगायतका दलले पनि मिलीजुली बनाउन साथ दिनैपर्छ ।

हाम्रो अगाडि २०६३ सालको अन्तिरिम सरकारको नजिर छ, जुन बेला सबै दलबीच सहमति, सहकार्य र एकताको नाराअनुसार सरकार चल्यो, अन्तिरम संविधान जारी भयो । त्यस बेला केन्द्रीय सरकारका निर्णयहरू कति सहजताका साथ पारित भएका थिए । त्यो बेला बनाइएका ऐन, नियम संसदीय दलको बैठकबाट सहजै अनुमोदित हुन्थे ।

स्थानीय सरकारको कुरो गर्ने हो भने पनि अन्तिरिम सरकारपछि २०७४ सालको स्थानीय निवार्चनअघिसम्म सबै दल मिलेर बाटो, पुललगायतका विकास निर्माणहरू मिलेर सम्पन्न भएका थिए । सर्वदलीय सहमतिकै आधारमा नै जनप्रतिनिधहरूले स्थानीय निकायका कामहरू सहजै सम्पन्न गरेका उदारहण प्रशस्तै छन् । तर, अहिले स्थानीय तहमा पनि विवाद पाउँछौँ । एकै पार्टीका निर्वाचित प्रमुख र उपप्रमुखमा पनि विवाद छताछुल्ल भएका छन् । स्थानीय तहको तेरोमेरो भावनाले विकास निर्माणमा असर पुगेको छ । त्यसैले हरेक तहमा मिलीजुली सरकार हुन सके मुलुकको हित हुने थियो ।

अब जनताले आनन्दसँग मुलुक चलेको हेर्न चाहेका छन् । यसका लागि तपाईंले प्रमुख राजनीतिक दलहरूलाई एक गराउन आवश्यक छ । राजनीतिक दलहरू सबै एक हुनैपर्छ । मुलुकको भविष्यका लागि सबै दल एक हुन जरुरी भइसकेको छ ।

सम्माननीय प्रधानमन्त्रीज्यू, सबै राजनीतिक शक्तिहरूलाई मिलाउन सक्ने खुबी यहाँमा पनि छ ।राष्ट्रलाई अप्ठ्यारो परेको बेला यहाँले पटकपटक नेतृत्व गर्नुभएको पनि छ । यहाँको नेतृत्वको सरकारलाई तत्कालीन पूर्वराजा ज्ञानेन्द्र सरकारले अपदस्थ मात्र गरेनन्, पछि यहाँलाई पुन: राष्ट्र हाँक्ने जिम्मा पनि दिएका थिए । यहाँ प्रधानमन्त्री मात्र नभएर यो मुलुकको सबैभन्दा ठूलो र ऐतिहासिक दलको सभापति पनि हुनुहुन्छ ।

यहाँलाई जनतालगायत आमकांग्रेसी जनमत पनि छ, जसका आधारमा यहाँले राष्ट्र हितका लागि काम गर्ने अधिकार पाउनुभएको छ । कसैको मन दुख्ला, कोही रिसाऊला भन्नेतिर ध्यान नदिई मुलुकको हितका लागि यहाँले आफ्नो जनाधिकारको प्रयोग गर्दै भावी कदम अगाडि बढाउनुपर्ला ।

कांग्रेस लोकतान्त्रिक पार्टी भएका कारण पार्टीभित्र नै यस विषयमा गहन छलफल अवश्य होला नै । नेपालले भोग्नुपरेका हरेक संकट र हरेक आन्दोलनको नेतृत्व नेपाली कांग्रेसले नै गरेका कारण सिंगो पार्टी जनहितमा सधैँ रहन्छ नै । कांग्रेसका शीर्षस्थ नेताहरू पनि 'भाइ भुटे गवार लुटे' भन्ने भनाइप्रति सजग हुनु नै हुनेछ । हिजो हाम्रा हजुरबुवाहरूका पुस्ताले '३ सरकार कि मूर्दावाद, ५ सरकार कि जय' भनेर लड्नुभयो राणा सरकारका विरुद्ध । अनि हाम्रो बुवापुस्ताले निरंकुश 'पञ्चायत सरकार मूर्दावाद' भन्दै लड्नुभयो । हाम्रो पुस्ताले लोकतान्त्रिक गणतन्त्रका लागि लड्यो । अब हामी केका लागि लड्ने ? देख्नुभयो नि कोरोनाकालले कसरी एकल जीवन जिउन विवश थियौँ हामी । हाम्रो जीवनको कुनै भरोसा छैन । यति सुन्दर संस्कृति र सभ्यता अनि धार्मिक, जातीय र भौगोलिक विविधताको मुलुक हाम्रो नेपाल, छँदैछ । हामीलाई युरोप बनाउनु छैन, संसार ब्याक टु नेचर भइरहेको अवस्थामा छ ।

हामी विश्वमा कहलिएका वीर नेपाली हौ । पाँच दलबीचको गठबन्धनको वर्तमान सरकारले सहमतिका आधारमा मुलुकको हितका लागि राम्रो काम पनि गरेको छ । यो वर्ष विदेशी मुद्रा सञ्चिति पनि बढेको छ । कोरोनाका कारण विश्वका शक्तिमान राष्ट्रहरूमा जसरी आर्थिक तरलता देखिएको छ, हामीले त्यो अवस्था गुजार्न परेको छैन । धार्मिक पर्यटन हाम्रो सम्पन्नताको प्रमुख आधार हो । जडीबुटी अनि योग, ध्यान, प्राणायाम हाम्रा शक्ति हुन् । हामी नेपाली जलले धनी छौँ, मन अनि कर्मले धनी छौँ । सर्वे भवन्तु सुखिन: सर्वे सन्तु निरामया, सर्वे भद्राणि पश्यन्तु महाकश्चित् दु:ख भाग्वेत् ।। सबैको सुख देख्ने, सबै निरोगी भएको हेर्ने, सबैको मंगलमय जीवनको कामना गर्ने महान् नेपाली हामी हौँ ।

नेपाली जनमा पछिल्लो समय नैराश्यता फैलिएको छ । जसका कारण नकारात्मक सोच हावी भएको छ, नहोस् पनि कसरी ? मिल्दा यहाँहरूले एकअर्काको प्रशंसा अति नै गर्नुहुन्छ । नमिल्दा उछितो काड्नुहुन्छ । अनि तपाईंहरूको भनाइप्रति विश्वास कसरी मान्छन् जनले ? भाषणमा परिर्वतन होइन, व्यवहारमा परिवर्तन जनतालाई चाहिएको छ । यहाँहरूले अनुकूलताका आधारित भाषण गरेकाले जनताले पत्याउन छोडेका हुन् । सामाजिक सञ्जाल छ, यहाँहरूले बोलेका कुरा जनताले सामाजिक सञ्जालमा सुरक्षित राखेका हुन्छन् । अनि लेखाजोखा पनि ठाउँमा गर्न जान्ने भइसकेका पनि छन् ।

त्यसैले अब जनताले आनन्दसँग मुलुक चलेको हेर्न चाहेका छन् । यसका लागि यहाँले नेपालका वर्तमानका सम्पूर्ण प्रमुख राजनीतिक दलहरूलाई एक गराउन आवश्यक छ । राजनीतिक दलहरू सबै एक हुनैपर्छ । मुलुकको भविष्यका लागि सबै दल एक हुन जरुरी भइसकेको छ । सबै राजनीतिक दलका प्रतिनिधिहरू नेपाल सरकारका बाँकी दुई तहको फूलबारीमा अट्न सक्छन् । सबै दल, वर्ग र क्षमता भएका युवा, महिला सबैको समावेशी प्रतिनिधित्व गरीकन सरकार बनाउने कसरतमा सबै दलका नेताहरू लाग्नुपर्छ ।

प्रतिपक्षको भूमिकामा त हामी पत्रकार छँदैछौँ । सरकारको प्रतिपक्षमा प्रेस जगत् सदैव हुन्छ नै । र, महान् नेपालीजन, विवेकशील नेपाली जनता पनि प्रतिपक्षमा सधैँ हुन्छन् नै । सबै मिलाएर सरकार बनाउन लाग्नुहोला ।

-अर्याल नेपाल पत्रकार महासंघकी सचिव हुन् ।

प्रकाशित मिति: आइतबार, मंसिर १८, २०७९ १८:३१