इजरायलको कृषि क्षेत्रमा १ हजार श्रमिक पठाउँदै सरकार, जनवरीभित्र ४ सयलाई पठाइने

इजरायलको कृषि क्षेत्रमा श्रमिक पठाउनका लागि सरकारले छलफल अघि बढाएको छ । इजरायलको कृषि क्षेत्रमा १ हजार श्रमिक पठाउने विषयमा नेपाल र इजरायलबीच प्रारम्भिक छलफल सुरु भएको श्रम, रोजगार तथा सामाजिक सुरक्षा मन्त्रालयले जानकारी दिएको छ ।

कृषि क्षेत्रमा श्रमिक पठाउने विषयमा इजरायल र नेपालबीच पहिलो बैठक गत महिना सम्पन्न भएको थियो । इजरायलले बैठकमा नेपालबाट केयर गिभरसँगै कृषिमा पनि श्रमिक लिने प्रस्ताव गरेको श्रम मन्त्रालय जनाएको छ । कृषिमा श्रमिक पठाउन श्रम मन्त्रालयले अध्ययन समिति बनाएर काम अगाडि बढाएको छ ।

मन्त्रालयका रोजगार व्यवस्थापन महाशाखा प्रमुखको संयोजकत्वमा सात सदस्यीय वार्ताटोली गठन गरेको थियो । त्यही टोलीले अहिले छलफल गरिरहेको श्रम मन्त्रालयले जनाएको छ ।

इजरायल सरकारले आगामी जनवरीसम्ममा कृषि क्षेत्रमा १ हजारमध्ये ४ सयलाई लैजाने जनाउँदै आएको छ । सोहीअनुसार प्रक्रिया अगाडि बढाइएको श्रम मन्त्रालयको भनाइ छ ।

केयर गिभरका लागि भाषा परीक्षामार्फत काम लिइरहेको इजरायलले कृषि क्षेत्रमा पनि श्रमिक लैजाने भएको वैदेशिक रोजगार विभागका निर्देशक डम्बर सुनुवारले बताए ।

कृषि क्षेत्रमा जाने नेपाली श्रमिकको रोजगारी ग्यारेन्टी, सेवा–सुविधा, पारिश्रमिक, रोजगार सुरक्षा र बीमाका विषयमा ड्राफ्ट निर्माणको काम भइरहेको उनले बताए । ‘कृषिमा कस्ता श्रमिक लिने भनेर इजरायललाई भर्ना प्रक्रिया र ड्राफ्टको संरचना नेपालले मागेको छ । अहिले कृषिमा श्रमिक लिने मात्र भनेको छ । चाँडै दुई देशका प्रतिनिधि बसेर टुङ्गो लगाउने प्रयास भइरहेको छ,’ उनले भने, ‘इजरायलले भनेजस्तो श्रमिक तालिम गराएर पठाउने हो अथवा कृषिसँग सम्बन्धित श्रमिक पठाउने भन्ने छलफल हुँदैछ । नेपालले पनि एउटा प्रस्ट खाका बनाएर श्रमिक पठाउने गरी अध्ययन गरिरहेको छ ।’

इजरायल जाने नेपाली श्रमिकले महिनाको १ लाख २० हजार रुपैयाँभन्दा बढी आम्दानी गर्ने गरेका छन् । श्रम सम्झौतामै केयर गिभरका लागि इजरायल जाने श्रमिकले न्यूनतम ९० हजार रुपैयाँ पारिश्रमिक तोकिएको हुन्छ । विभागका अनुुसार कृषि क्षेत्रमा जाने श्रमिकले मासिक १ लाख ५० हजार रुपैयाँ कमाउन सक्ने विभागले जनाएको छ ।

इजरायल सरकारले ८० प्रतिशत महिला र २० प्रतिशत पुरुष हुनुपर्ने सर्त राखेकाले नेपाली महिलाका आकर्षक गन्तव्य देशभित्र इजरायल परेको थियो । इजरायल जाने श्रमिकले स्वास्थ्य परीक्षण, बीमा हवाई खर्चसहित लगभग ९ सय ५० डलर खर्च लाग्ने गरेको छ ।

उनीहरूले ५ वर्षसम्म इजरायलमा रोजगारी पाउँछन् । कृषि क्षेत्रमा जाने श्रमिकको खर्च र श्रम अवधि उस्तै हुने श्रम मन्त्रालयले जनाएको छ ।

केयर गिभरमा श्रमिक पठाउन फेरि रोकियो

गत वर्ष इजरायल र नेपालबीच भएको श्रम सम्झौतामा केयर गिभरका लागि १ हजार १ सय ७५ जना श्रमिक लैजाने सहमति गरेको छ । भाषा परीक्षा उत्तीर्ण गरेका १ हजार १ सय श्रमिक रोजगारीका लागि इजरायल पुगिसकेको विभागले जनाएको छ ।

केयर गिभर भिसामा लैजान सहमति भएका १ हजार १ सय ७५ नेपाली श्रमिकमध्ये ५६ श्रमिक इजरायल रोजगारीमा जान पाएका छैनन् ।

उनीहरूलाई पनि पठाउन पहल भइरहेको विभागले जनाएको छ । इजरायल सरकारले केही महिनायता विदेशी श्रमिक भित्र्याउने नयाँ नीति ल्याएका कारण पनि ५६ जना श्रमिकको प्रक्रिया रोकिएको विभागको बुझाइ छ ।

इजरायलले विदेशी श्रमिक भर्ना प्रक्रिया नीतिमा फेरबदल गरेपछि नेपाली श्रमिक लैजान छाडेको र नेपालले भने पहल गरिरहेको विभागका निर्देशक सुनुवारले जानकारी दिए ।

गत चैत महिनादेखि असार महिनासम्ममा इजरायलले नेपाली श्रमिक लिने प्रक्रिया रोकेको थियो । इजरायलस्थित परराष्ट्र मन्त्रालयका कर्मचारीले श्रम सम्झौताको विषयलाई लिएर आन्दोलन गरेका कारण नेपाली श्रमिक लिन छाडेको थियो ।

प्रकाशित मिति: आइतबार, मंसिर १८, २०७९ १६:४४