सत्ता गठबन्धनलाई हराउँदै एमालेले गर्‍यो तीन जिल्ला र १२ क्षेत्रमा क्लिन स्वीप

सत्ता गठबन्धनलाई हराउँदै एमालेले गर्‍यो तीन जिल्ला र १२ क्षेत्रमा क्लिन स्वीप

A+ A A-

मंसिर ४ मा सम्पन्न प्रतिनिधिसभा र प्रदेशसभा निर्वाचनको अन्तिम मतपरिणाम आउन अब दोलखाको मात्रै बाँकी छ ।सत्ता गठबन्धनविरुद्ध अधिकांश निर्वाचन क्षेत्रमा एक्लै प्रतिस्पर्धा गरेको एमालेले ३ जिल्ला र १२ वटा निर्वाचन क्षेत्रमा 'क्लिन स्वीप' गरेको छ । १२ निर्वाचन क्षेत्रका १२ वटै प्रतिनिधिसभा सदस्य र २४ प्रदेशसभा निर्वाचन क्षेत्रमा एमालेले आफ्नो झण्डा गाँडेको छ ।

यी ३ जिल्‍लामा गर्‍यो एमालेले क्लिन स्वीप

एउटा मात्रै निर्वाचन क्षेत्र भएका तीन जिल्ला एमालेले क्लिन स्वीप गरेको छ । यी ती जिल्लाका तीनवटा प्रतिनिधिसभा सदस्य र एउटा प्रदेशसभा सदस्यमा एमाले मात्रै विजयी भएको छ ।

धनकुटा

धनकुटा जिल्लामा एमालेले क्लि स्वीप गरेको छ । प्रतिनिधिसभा सदस्यमा एमालेका राजेन्द्रकुमार राई, प्रदेश 'क' मा निरन राई र 'ख' मा इन्द्रमणि पराजुली विजयी भएका छन् ।

पर्वत

एउटा निर्वाचन क्षेत्रमा रहेको पर्वतमा प्रतिनिधिसभातर्फ एमालेका पदम गिरीले कांग्रेसका अर्जुन जोशीलाई २२ सय ६३ मतान्‍तरले पराजित गरे । गिरीले २९ हजार ८७२ मत ल्याउँदा जोशीले २७ हजार ६०९ मत मात्रै प्राप्‍त गरे ।

प्रदेशसभातर्फ ‘क’ बाट प्रतिद्वन्द्वीलाई २४ सय मतले पछि पारेर एमालेका भक्तबहादुर कुँवर र ‘ख’ बाट करिब १९ सय मतले प्रतिद्वन्द्वीलाई हराउँदै एमालेकै मित्रलाल बस्याल निर्वाचित भएका छन् ।

अर्घाखाँची

विगतका निर्वाचन नेकपा माओवादी केन्द्रको बलियो उपस्थिति रहेको अर्घाखाँचीमा यो निर्वाचनमा भने माओवादीसहितको सत्ता गठबन्धनका उम्मेदवारलाई हराउँदै एमालेले क्लिन स्वीप गर्‍यो ।

माओवादीबाटै एमाले प्रवेश गरेका टोपबहादुर रायमाझी प्रतिनिधिसभा सदस्यमा निर्वाचित हुँदा प्रदेश 'क' मा चेतनारायण आचार्य र 'ख' मा रामजीप्रसाद घिमिरे विजयी भए ।

९ निर्वाचन क्षेत्र, जहाँ एमाले गर्‍यो क्लिन स्वीप

सुनसरी २

सुनसरी २ मा एमालेले क्लिन स्वीप गरेको छ । यहाँ गठबन्धनका सबै उम्मेदवार पराजित भएका छन् । प्रतिनिधिसभामा एमालेका भीम आचार्य र प्रदेशसभा सदस्यमा रेवतीरमण भण्डारी र रामप्रसाद महतो विजयी भएका छन् ।

सुनसरी ३

सुनसरी ३ मा पनि एमालेले क्लिन स्वीप गरेको छ । कांग्रेसका विजय कुमार गच्छदारलाई पराजित गर्दै एमालेकी भगवती चौधरी तेस्रो प्रयासमा प्रतिनिधिसभा सदस्यमा निर्वाचित भइन् । यसैगरी, प्रदेशसभातर्फ एमालेकै रोहितबहादुर कार्की र रामदेव यादव विजयी भएका छन् ।

झापा २

झापा २ मा पनि एमालेले क्लिन स्वीप गरेको छ । प्रतिनिधिसभा सदस्यमा एमालेका देवराज घिमिरे विजयी हुँदा प्रदेशसभातर्फ एकराज कार्की र तिलाचन पाठक निर्वाचित भए ।

झापा ५

एमाले अध्यक्ष केपी शर्मा ओलीको निर्वाचन क्षेत्र झापा ५ मा पनि एमालेले क्लिन स्वीप गरेको छ ।

प्रतिनिधिसभा सदस्यमा एमाले अध्यक्ष ओली फराकिलो मतान्तरले निर्वाचित हुँदा प्रदेशसभा सदस्यमा हिक्मतकुमार कार्की र होमबहादुर थापा विजयी भएका छन् ।

बारा ३

मधेस प्रदेशको बारा ३ मा एमालेले क्लिन स्वीप गरेको छ । बारा ३ बाट प्रतिनिधिसभा सदस्यमा एमालेकी ज्वालाकुमारी शाह विजयी हुँदा प्रदेशसभामा रविन्द्रदास श्रेष्ठ र महम्मद समिर निर्वाचित भएका छन् ।

कास्की १

कास्की १ मा पनि एमालेले क्लिन स्वीप गरेको छ । तीनवटा निर्वाचन क्षेत्र रहेको कास्कीमा तीनवटै निर्वाचन क्षेत्रमा एमाले विजयी भएको छ । यसमध्ये कास्की १ मा प्रतिनिधिसभा सदस्य र दुईवटै प्रदेशसभा सदस्यमा एमाले विजयी भएको छ । प्रतिनिधिसभामा एमालेका मानबहादुर गुरुङ निर्वाचित हुँदा प्रदेशसभामा खगराज अधिकारी र बेदबहादुर गुरुङ विजयी भएका छन् ।

कपिलवस्तु १

लुम्बिनी प्रदेशका तीनवटा निर्वाचन क्षेत्रमा एमालेले क्लिन स्वीप गरेको छ । कपिलवस्तु १ बाट एमालेका बलराम अधिकारी विजयी हुँदा प्रदेशसभामा एमालेकै विष्णुप्रसाद पन्थी र मधुसुदन शरण चौधरी निर्वाचित भए ।

गुल्मी २

दुईवटा प्रतिनिधिसभा निर्वाचन क्षेत्र रहेको गुल्मीमा एउटा निर्वाचन क्षेत्रमा भने एमालेले क्लिन स्वीप गरेको छ । गुल्मी २ बाट एमालेका गोकर्णराज विष्ट प्रतिनिधिसभा सदस्यमा निर्वाचित हुँदा प्रदेशसभातर्फ एमालेकै डिल्लीराज भुसाल र दिनेश पन्थी विजयी भएका छन् ।

पाल्‍पा १

दुईवटा प्रतिनिधिसभा निर्वाचन क्षेत्र रहेको पाल्पाको एउटा निर्वाचन क्षेत्रमा एमालेले क्लिन स्वीप गरेको छ । पाल्पा १ बाट एमालेका नारायणप्रसाद आचार्य प्रतिनिधिसभा सदस्यमा निर्वाचित हुँदा प्रदेशसभामा एमालेकै राजप्रसाद श्रेष्ठ र खेमबहादुर सारु विजयी भए ।

९ वटा जिल्लाबाट प्रतिनिधिसभामा एमालेले मात्रै विजयी

एउटा निर्वाचन क्षेत्र भएका ९ वटा जिल्ला र एकभन्दा बढी निर्वाचन क्षेत्र भएका तीनवटा निर्वाचन क्षेत्रमा प्रतिनिधिसभामा एमाले मात्रै विजयी भएको छ । इलाम, ताप्लेजुङ, पाँचथर, धनुकटा, सोलुखुम्बु, कास्की, लमजुङ, पर्वत, पाल्पा, प्युठान र बैतडीमा एमालेले एक्लैले प्रतिनिधिसभा सदस्य जितेको छ ।

प्रकाशित मिति: आइतबार, मंसिर १८, २०७९ १३:४१