बैठक छोडेर कांग्रेस महामन्त्रीसहितका नेता विदेश सयरमा

A+ A A-

नेपाली कांग्रेस केन्द्रीय कार्य समिति बैठक जारी रहेको बेला दुई महामन्त्री, प्रवक्तासहित एक दर्जन नेता विदेशमा छन् । २६ साउनमा बसेको कांग्रेस बैठक २९ साउनमा बस्दैछ ।

कांग्रेसको २२ असारदेखि जारी केन्द्रीय कार्यसमितिमा पेस भएका १४ एजेण्डामा एउटाले मात्र निकास पाएको छ । धेरै नेताहरु बैंकक, दुवई र लिस्वनमा व्यस्त छन् ।

कांग्रेस महामन्त्री डा. शशांक कोइराला सोमबार श्रीमती र छोरीसहित एक साता लामो निजी भ्रमणको लागि थाइल्याण्डको बैंकक गएका छन् । उनी एक साता थाइल्याण्डका विभिन्न शहर डुल्ने बताइएको छ ।

पूर्वराजा ज्ञानेन्द्र शाह एक साताअघि एक महिना लामो बसाइँको लागि बैंकक गइसकेको छन् । शाह र कोइराला दुवै निजी बसाइँको लागि बैंकक रहँदा भेट हुने सम्भावना रहेको स्रोतको दाबी छ ।

हिन्दु राज्यको पक्षमा वकालत गर्दै आएका डा. कोइरालाले हिन्दुराज्य र संवैधानिक राजतन्त्रको विषयमा जनमत संग्रह गर्नुपर्ने माग गर्दै आएका छन् ।

अर्का महामन्त्री पूर्णबहादुर खड्का भने बिहीबार नै संयुक्त अरब इमिरेट्सतर्फ लागेका छन् । उनले नेपाली जनसम्पर्क समिति युएईको अधिवेशनबाट निर्वाचितहरुलाई स्वागत र बधाइ दिएका थिए ।

महामन्त्री खड्का खाडीका अन्य देश पनि जाने कार्यक्रम रहेको बुझिएको छ । महामन्त्री खड्काले आफू दुई दशकपछि विदेश भ्रमणमा निस्किएको बताएका छन् । खड्कासँगै नेविसंघका पूर्वमहामन्त्री उमेशजंग रायामाझी पनि दुवई गएका छन् ।

कांग्रेस नेता डा. शेखर कोइराला एक दर्जन नेतासहित एक सातादेखि दुवईमै छन् ।

दुवईमा जनसम्पर्क समितिको अधिवेशनको अवसर पारेर पूर्वसांसद रामहरि खतिवडा, नेपाल तरुण दलका उपाध्यक्ष उत्तम चापागाईं, नेविसंघका पूर्वमहामन्त्री धादिङ जिल्ला सभापति रमेश धमला, तरुण दलका उपाध्यक्ष उत्तमकुमार चापागाईं, युवा नेता अतुल कोइराला दुवई गएका थिए ।
दुवई गएका कांग्रेसका नेताहरूले विश्वको अग्लो टावर बुर्ज खलिफा, पूर्ण सफारी पार्कको अवलोकन गरेका छन् । आफूहरुले जेलमा रहेका नेपालीहरूलाई पनि भेट्ने कार्यक्रम बनाएको नेता रामहरि खतिवडाले जानकारी दिए ।

नेपाली जनसम्पर्क समितिको १४औं महाधिवेशनले भुवानी तिमिल्सिनालाई सभापतिमा निर्वाचित गरेको थियो । अधिवेशनको प्रमुख अतितिको रुपमा महामन्त्री खड्काले महासमिति सदस्य छनोट भएका भुवानी तिमल्सिना, चित्रबहादुर केसी र खेमराज बस्नेतलाई सम्मान गरेका थिए ।
कांग्रेसका प्रवक्ता विश्वप्रकाश शर्मा पोर्चुगलको राजधानी लिस्वन पुगेका छन् । नेपाली जनसम्पर्क समिति साईप्रसको कार्यक्रममा सहभागी भई नेता शर्मा आइतबार राति पोर्चुगल पुगेका हुन् । नेता शर्मालाई लिस्वनस्थित अन्तर्राष्ट्रिय विमानस्थलमा नेपाली जनसम्पर्क समिति पोर्चुगलका अध्यक्ष विनोद घिमिरेले स्वागत गरेका थिए ।

प्रवक्ता शर्माले सोमबार लिस्वनमा भएको नेपाली जनसम्पर्क समिति पोर्चुगलको १०औं वार्षिक साधारण सभालाई सम्बोधन गरेका छन् । तीन दिने पोर्चुगल बसाइपछि शर्मा जनसम्पर्क समिति डेनमार्कले आयोजना गर्ने कार्यक्रमलाई सम्बोधन गर्न त्यसतर्फ जाने भएका छन् । शर्मा डेनमार्कबाट जर्मन र नर्वे जाने कार्यक्रम रहेको बताइएको छ ।

पोर्चुगलको १०औं साधारण सभामा भाग लिन नेपाल तरुण दलका महासचिव भुपेन्द्रजंग शाही पनि आइतबार नै पोर्चुगल पुगेका थिए । प्रवक्ता शर्मा र तरुण दलका महासचिव शाहीले लिस्वनमा भाग लिएसँगै साइप्रस र डेनमार्कको सभालाई सम्बोधन गर्ने कार्यक्रम छ ।

कांग्रेस उपसभापति विमलेन्द्र निधिसहित तीन दर्जन नेता एक महिनाअघि डेनमार्कको राजधानी कोपनहेगनमा आयोजित कांग्रेस जनसम्पर्क समितिको प्रशिक्षण कार्यक्रममा सहभागी भएका थिए ।

केन्द्रीय सदस्य कल्याण गुरुङ भने लामो समयदेखि संयुक्त राज्य अमेरिकामा बस्दै आएका छन् ।

प्रकाशित मिति: मंगलबार, साउन २८, २०७६ ०४:४६