धनगढीमा विद्यार्थीले निषेधाज्ञा तोडेपछि तनाव, प्रहरीद्वारा ३७ सेल अश्रुग्यास प्रहार

धनगढीमा विद्यार्थीले निषेधाज्ञा तोडेपछि तनाव, प्रहरीद्वारा ३७ सेल अश्रुग्यास प्रहार

A+ A A-

कैलालीको धनगढीमा विद्यार्थीहरू प्रदर्शनमा उत्रिएपछि स्थिति तनावग्रस्त बनेको छ । धनगढीको पञ्चोदय माध्यमिक विद्यालयमा कक्षा ८ मा अध्ययनरत चेतना साउँदको विहीबार ग्रेडरले किचेर मृत्यु भएपछि विद्यार्थीहरू आन्दोलित छन् ।

विद्यार्थी आन्दोलित भएपछि उत्पन्न परिस्थितिलाई मध्यनजर गर्दै प्रशासनले निषेधाज्ञाले लगाएको थियो । तर , विद्यार्थीले त्यसको अवज्ञा गर्दै शुक्रबार आन्दोलन गरेका छन् । विद्यार्थीको आन्दोलनलाई नियन्त्रणमा लिन प्रहरीले ३७ सेल अश्रुग्यास प्रहार गरेको छ । आन्दोलित २१ विद्यार्थीलाई नियन्त्रण लिएको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक वेदप्रकाश जोशीले बताए ।

जिल्ला प्रशासन कार्यालयले हिजो राति ७ बजेदेखि अनिश्चितकालिन निषेधाज्ञा जारी गरेको छ । निषेधाज्ञा तोडेर उनीहरू प्रदर्शनमा उत्रिएपछि स्थिति तनावग्रस्त बनेको छ । हसनपुर पिपलचौतारा नजिक पानीपिच गरिरहेको ना १ क ९७५ नम्बरको कालिका कन्स्ट्रक्सनको ग्रेडरले लेबल मिलाउँदै ब्याक गर्ने क्रममा कुल्चिएर मृत्यु भएको थियो ।

ग्रेडर र चालक चितवन भरतपुर महानगरपालिका २८ का वर्ष २७ का विमल कुमाललाई प्रहरीले नियन्त्रणमा लिएको छ । जिल्ला प्रशासन कार्यालय कैलालीले धनगढीका केही स्थानमा निषेधाज्ञा जारी गरेको छ। पीडित पक्षसँग बसेर एक चरणको वार्ता समेत भएको प्रवक्ता जोशीले बताए ।

पीडित पक्षले जाहेरी लिएर आएपछि मात्रै थप प्रक्रिया अगाडि बढने उनको भनाइ छ । निषेधाज्ञामा अहिले पनि धनगढीका विभिन्न स्थानमा प्रहरी प्रशासनविरुद्ध विद्यार्थी नाराबाजीमा उत्रिएका छन् ।

विद्यार्थीले घटनाको क्षतिपूर्तिसहित चालकलाई कारबाहीको माग गरिरहेका छन् । कैलालीका प्रमुख जिल्ला अधिकारी किरण थापाले कारबाहीको दायरामा ल्याउन प्रशासन प्रतिवद्ध रहेको र त्यसका लागि पीडित पक्षसँग संवाद भइरहेको बताएका छन् ।