चोरी मुद्दामा आधा करोडभन्दा बढी धरौटी बुझाएर जेलमुक्त भएका पेसेवर चोरको कथा

चोरी मुद्दामा आधा करोडभन्दा बढी धरौटी बुझाएर जेलमुक्त भएका पेसेवर चोरको कथा

A+ A A-

मंगलबार साँझ काठमाडौं बूढानीलकण्ठ- १०, गोकर्णेश्वर विवेक चोकस्थित बन्धना राई र दिपेश सापकोटाको घरमा चोरी भयो । उनीहरूको घरबाट लाखौँ रुपैयाँ नगद र केही सुनका गरगहनासमेत चोरी भएका थिए ।

उसो त सोही क्षेत्रतिर केही समयअघिदेखि नै चोरीका घटना बढेको उजुरी प्रहरीमा निरन्तर आउन थालेको थियो । सोही चोरीको घटनाका कारण प्रहरी नै हैरानीमा थियो । आपराधिक अन्य गतिविधि नियन्त्रणमा प्रहरी सफल देखिए पनि प्रहरीले चोरीका घटना नियन्त्रण गर्न भने प्रहरीलाई चुनौती बन्दै गयो ।

गोकर्णेश्वर क्षेत्रतिर दिउँसो र राति दुवै समयमा चोरीको घटना बढेको थियो । सोही तनावका कारण बौद्ध प्रहरीले गोकर्णेश्वर क्षेत्रतर्फ चोरीका घटना नियन्त्रण गर्न पाँचवटा प्रहरीको छुट्टाछुट्टै समूह टोली खटायो । सादा पोशाकमा खटिएका प्रहरीले शंकास्पद व्यक्तिलाई सोधपुछका लागि पक्राउ गर्दै छोड्दै गर्‍यो । प्रहरीको त्यही अपरेसनमा एक शंकास्पद युवा फेला परे । प्रहरीले उनीमाथि केरकार थाल्यो । प्रहरी सोधपुछकै क्रममा उनले केही शंकास्पद व्यवहार देखाउन खोजे ।

उनी थिए- गोकर्णेश्वर- ४ का ४२ वर्षीय राजु तामाङ । प्रहरी तामाङमाथि थप केरकार गर्ने निष्कर्षमा पुग्यो । उनी बस्दै आएको गोकर्णेश्वर- ५, जोरपाटीमा प्रहरीको टोली पुग्यो । प्रहरी उनको कोठा पुग्दा भने झस्कियो । फ्ल्याट भाडामा लिएर मनमौज शैलीमा तामाङ बसेका थिए । प्रहरीलाई लाग्यो- उनी चोरी गर्दै हिँड्दैनन् !

उनको हुलिया पनि चोरी गर्ने मान्छेको जस्तो देखिने खालको थिएन । तर, प्रहरीले उनको कोठा खानतलासी गर्न भने छाडेन । प्रहरीले उनको कोठाबाट फलामको रड, पिलास, पेनचिस र तार काट्ने कैँची फेला पार्‍यो । त्यसपछि भने प्रहरीले तामाङमाथि थप केरकार गर्न थाल्यो । प्रहरीले उनको कोठाबाट ४ लाख ८१ हजार ६५० रुपैयाँ नगदसमेत बरामद गर्‍यो । प्रहरीले अनुसन्धानका लागि तामाङलाई प्रहरी वृत्त बौद्धमा राखेर अनुसन्धान गरिरहेको छ ।

प्रहरीलाई चकित पार्ने तथ्य

प्रहरीको अनुसन्धानबाट राजु तामाङ पेसेवर चोर भएको तथ्य खुलेको छ । उनीमाथि यसअघि बौद्ध प्रहरीले तीनपटक, बानेश्वर प्रहरीले एकपटक र दुईपटक अन्य प्रहरी कार्यालयले मुद्दा चलाएको खुलेको छ । काठमाडौं प्रहरी परिसरका प्रमुख एसएसपी भरतबहादुर बोहराले तामाङ पेसेवर चोर भएको जानकारी दिए ।

‘तामाङ पेसेवर चोर हुन् । उनीमाथि यसअघि पनि प्रहरीले पटक-पटक चोरीको मुद्दा चलाएको खुलेको छ । हामीले उनीमाथि अनुसन्धान जारी राखेका छौँ । तामाङले चोरी गरेरै ठूलो मात्रामा धन सम्पत्ति जोडेकोजस्तो देखिन आएको छ,’ एसएसपी बोहराले भने ।

प्रहरीका अनुसार २०६९ सालमा बौद्ध प्रहरीले चोरी मुद्दा चलाउँदा जिल्ला अदालत काठमाडौंबाट २५ लाख रुपैयाँ धरौटी तिरेर छुटेका थिए । त्यस्तै, २०७५ सालमा पनि चोरी मुद्दामा उनी १८ लाख रुपैयाँ तिरेर छुटेका थिए । पछिल्लो पटक ३० असोजमा ३ लाख रुपैयाँ धरौटी तिरेर छुटेका तामाङले अदातलको तारेख बुझिरहेको खुलेको छ । योबाहेक पनि उनले चोरी मुद्दामै लाखौँ रुपैयाँ धरौटी बुझाएर छुटेको अनुमान प्रहरीको छ ।

एससएपी बोहराका अनुसार अदालतको तारेख बुझाउँदै गरेको अवस्थामा तामाङले फेरि अर्को चोरीको घटना घटाएका हुन् । उनले करोडौँ रुपैयाँ धरौटीमै बुझाएको प्रहरीको अनुमान छ । अनुसन्धानमा खटिएका प्रहरीका अनुसार तामाङले हालसम्म करोडौँ रुपैयाँबराबरको धनमाल र नगद चोरी गरेको आशंका गरेको छ । तामाङ एक दशकअघिदेखि नै चोरीको धन्दामा लागेको खुलेको छ ।

एसएसपी बोहरा भन्छन्, ‘तामाङ सिरियल चोर हुन् । उनले विभिन्न ठाउँबाट करोडौँको धनमाल चोरी गरेको आशंका छ । नत्र अदालतले ठूलो धरौटी तोक्दा पनि उनी कसरी तिर्न सक्ने हैसियतमा पुगे ?’ प्रहरीका अनुसार तामाङ चोरी गर्न एक्लै हिँड्ने गरेको खुलेको छ । सुरुमा तामाङले घरको रेकी गर्ने र घरमा कोही नभएको मौका छोपेर चोरी गर्ने गरेको खुलेको छ ।

प्रहरीको अनुसन्धानबाट उनले नगद र सुनचाँदीका गरगहना मात्रै चोरी गर्ने गरेको खुलेको छ । घरभित्र रहेका मोबाइल, ल्यापटप आदि समान भने तामाङले आजसम्म चोरी गरेको खुलेको छैन । मोबाइल, ल्यापटप चोरी गर्दा पत्ता लाग्ने डरले उनले नगद र गरगहना मात्रै चोरी गर्ने गरेको प्रहरीको दाबी छ । मंगलबार पक्राउ परेका तामाङमाथि अदालतबाट म्याद थप गरेर अनुसन्धान गरिरहेको प्रहरीले जनाएको छ ।

प्रकाशित मिति: बिहीबार, मंसिर १५, २०७९ १८:२३