विरोध खतिवडा दाजु इतिहास हो, जनताले मलाई भविष्य देखेः महेश बर्तौला

A+ A A-

मकवानपुरको प्रतिनिधिसभा क्षेत्र नम्बर २ बाट नेकपा एमालेका युवा उम्मेदवार महेश बर्तौलाले एकीकृत समाजवादीका विरोध खतिवडालाई पराजित गर्दै निर्वाचन जिते । २०४८ सालदेखि उठेकामध्ये सबै निर्वाचन जितेका नेता खतिवडा यसपटक आफ्नै बर्तौलासँग ४ हजार ५ सय २० मतान्तरले पराजित बने ।

विद्यार्थी राजनीतिबाट पार्टी राजनीतिमा आएको करिब डेढ वर्षमै प्रतिनिधिसभा सदस्यको जिम्मेवारी पाउनुलाई आफुले परीक्षाको रूपमा लिएको बर्तौला बताउँछन् । मकवानपुर बहुमुखी क्याम्पसमा दुई पटक स्ववियु सभापति, अनेरास्ववियुको केन्द्रीय उपाध्यक्ष हुँदै उनी हाल एमाले बागमती प्रदेश कमिटीको उपसचिवको जिम्मेवारीमा छन् ।

बर्तौलासँग शिलापत्रकर्मी नवीन तिमल्सिनाले गरेको कुराकानीः

पहिलो प्रयासमै चुनाव जित्दा कस्तो अनुभूति भइरहेको छ ?

खुसी लागेको छ । पार्टीले भरोसा गर्‍यो । धेरै नेताहरू प्रतिस्पर्धामा हुनुहुन्थ्यो, तथापी एउटा युवालाई अगाडि बढाउनुपर्छ भनेर पार्टी केन्द्रीय कमिटी र मकवानपुरका नेताहरूले ठान्नुभयो । पार्टीले प्रतिस्पर्धाको मैदानमा उतार्‍यो, जनताहरूले सम्बोधन गर्नुभयो । उहाँप्रति आभारी र ऋणि छु । पाँच वर्षमा उहाँहरूको सेवा गरेर यो क्षेत्रको विकास र समृद्धिमा काम गर्नेछु । जनताले लगाउनु भएको ऋण पाँच वर्षसम्म उहाँहरूको सेवा गरेर चुक्ता गर्नेछु ।

विद्यार्थी संगठन र पार्टी राजनीतिमा प्रतिस्पर्धा गरिरहँदा र आमनिर्वाचनमा सहभागी हुँदा कस्तो फरक पाउनुभयो ?

म विद्यार्थी राजनीतिको बेलामा मकवानपुर बहुमुखी क्याम्पसमा दुईपटक स्वतन्त्र विद्यार्थी युनियनको निर्वाचन लडेँ । संयोग म कहिल्यै हारिनँ । चाहे त्यो विद्यार्थी संगठन होस् चाहे पार्टीको आन्तरिक प्रतिस्पर्धा वा अन्य क्षेत्र । योपटकको निर्वाचनमा पार्टी राजनीतिमा आएको डेढ वर्षमै पार्टीले भरोसा गर्‍यो । जनताले अनुमोदान गर्नुभयो । पार्टीको आन्तरिक प्रतिस्पर्धाभन्दा यो अलि फरक र जटिल हुँदोरहेछ । पार्टीका कार्यकर्ताको मात्रै मन जितेर नहुने रहेछ, आमनागरिकको पनि भावनालाई समेट्नुपर्ने र विश्वास लिनुपर्ने रहेछ । मैले पृथक प्रकृतिको अनुभूति पाएँ ।

जनताका आकांक्षा, उहाँहरूको सवाल, जनताका प्रश्न, नेताहरूप्रतिको आक्रोश, हामीले के गर्नुपर्छ र के गर्नु हुँदैन भन्ने पक्षको पिँधसम्म जनताको हृदयमा गएर अध्ययन गर्ने मौका पाएँ । मैले यो निर्वाचनलाई असाधारण ज्ञान प्राप्त गर्ने विद्यालयको रूपमा ग्रहण गरेँ । भोलिका दिनमा कतिपय जनताका सुझावहरूलाई ठीक ढंगबाट कार्यान्वयन गरेर अगाडि बढ्ने अवस्था हुँदा आजको राजनीतिमा लागेका प्रश्नहरू, आक्रोस र हिलोहरूलाई सफा गर्छौं भन्ने लाग्छ ।

२०४८ सालपछि उठेका सबै चुनाव जित्ने विरोध खतिवडासँग भिडिरहँदा गठबन्धन र एमालेबीचको ठूलो मत भिन्नता हुँदा पनि जित्छु भन्ने विश्वास थियो ?

स्वभाविक रूपमा गठबन्धनबाट विरोध खतिवडा दाजुले गठबन्धनको ६० हजार मत पाउँछु, २० हजार मतान्तरले जित्छु भनिरहँदा पनि मलाई जनताप्रति भरोसा थियो । म २ नम्बर क्षेत्रको आदिवासी र रैथाने बासिन्दा भएकाले जनताले मलाई भरोसा गर्ने स्वभाविक थियो । मैले वास्तवमा उहाँप्रति तिखो टिप्पणी गर्न खोजेको हैन । तर पनि उहाँबाट मकवानपुरले प्राप्त गर्नुपर्ने ऊर्जा पाइसकेको थियो । उहाँहरूले स्वैच्छिक अवकाश लिनुपर्ने थियो । उहाँहरूले अझै पनि हामी नै हो भनिरहँदा जनताले अब पुग्यो, अब युवाहरूलाई अगाडि बढ भनेर दिएको म्यान्डेट हो । मैले यसलाई स्वभाविक लिएको छु ।

गठबन्धन माथिका नेताहरूबीच भए पनि नागरिक भावना र बुझाइको गठबन्धन फरक थियो । आफ्नो क्षेत्रमा विकास गर्ने, जनताको बीचबाट जितेर गइसकेपछि जनताको दैलोमा सुखदुःख, पिर, मर्कामा जोडिने प्रतिनिधिचाहिँ सच्चा प्रतिनिधि हुन् भनेर सोही खालका प्रतिनिधि चाहान्छौँ भन्ने कुरा उहाँहरूको थियो । त्यहीअनुसार मलाई विश्वास गर्नुभयो ।

विरोध दाजु इतिहास हो । उहाँले के गर्न सक्नुभयो भनेर जनताले निर्णय गरे । जनताले मलाई भविष्य देखे । मैले पाँच वर्षमा नागरिकप्रति देखिएको राजनीतिक वितृष्ण पनि हटाउँछु भन्ने लाग्छ । मैले सालिनताका साथ जनताको मन जितेकै कारण चुनाव पनि जिते ।

महेश बर्तौलाको जित जनताको मुद्दासँग जोडिएको छैन, अहिले देखिएको स्वतन्त्र वा युवाहरूको लोकप्रियतामा निहीत छ भन्ने टिप्पणीलाई के भन्नुहुन्छ ?

म गणतन्त्र, वर्तमान शासकीय प्रबन्ध र व्यवस्थाका लागि लडेको युवा हुँ । यो व्यवस्थाको लागि लडेको युवाले अहिले पनि भूमिका पाउँदैन भने कहिले पाउँछन् ? भन्ने आम जनतामा प्रश्न रहेको थियो । युवालाई जिम्मेवारी र भूमिका दिनुपर्छ भन्ने जनताको भावना नै मेरो जितको आधार हो । आज राजनीतिप्रति प्रश्न किन लाग्यो ? एउटा मान्छे पटक–पटक पदबाट बाहिर आउन नचाहने, हस्तान्तरण गर्न नखोज्ने, शक्तिलाई केन्द्रीकृत गर्ने, अवसरलाई केन्द्रीकृत गर्न खोज्ने परिपाटीले राजनीतिक उपलब्धीमाथि नै प्रहार भइरहेको छ ।

नेताहरूको स्वभाव, शैली, व्यवहार आफू जहिले पनि भइरहनुपर्ने अवसर आफैँले मात्रै पाइरहनुपर्ने स्वभावले आज चुनौती निर्माण भएको छ । यसलाई प्रमाणित गर्ने गरी देशव्यापी रूपमा चुनावी परिणामहरू आएको छ । जसका कारण युवाले अब मकवानपुरको भविष्य हेर्छ भन्ने भावनाको साझा बलले मैले विजय हासिल गरेको छु । म निर्वाचनमा उठिरहँदा ‘नो भोट’ भनिरहनुभएकाहरूले पनि मलाई सहयोग गर्नुभएको छ ।

निर्वाचनअघि प्रस्तुत गरेका एजेण्डाहरू पाँच वर्षमा पूरा गर्न सक्नुहुन्छ ?

म अहिले जनताको परीक्षामा छु । पाँच वर्षसम्म म परीक्षामै सहभागी हुनेछु । मैले यो बीचमा जनताका बीचमा गरेका प्रतिबद्धताहरू शतप्रतिशत पूरा गर्नुपर्छ ।

मेरो नम्बर जनताले दिने हो । त्यसैले मैले राम्रो काम गर्न सकेँ भने उहाँहरूले दिएको नम्बरबाट डिस्टिन्सन ल्याउँछु, मैले राम्रो काम गर्न सकिनँ भने सायद फेल गर्नुहुन्छ । फेल गर्दा मैले त्यहीअनुसारको परिणाम भोग्नुपर्छ । डिस्टिन्सन ल्याउन सकेँ भने मेरो ३०–३२ वर्षको राजनीतिक यात्रा सहज हुन्छ । जसकारण म आफूकेन्द्रित भएर अगाडि बढ्दिनँ, जनताको भावना र यहाँका विकाससँग नजिकबाट जोडिएर काम गर्नेछु ।

तपाईंको क्षेत्र शैक्षिक तथा भौतिक पूर्वाधार विकासमा पछाडि छ, यहाँका धेरै नागरिक विपन्नता र गरिबीको चपेटामा छन्, यसलाई परिवर्तन गर्न के गर्नुहुन्छ ?

मेरो निर्वाचन क्षेत्रमा गरिबी, अभाव, अशिक्षा, अल्पविकास छ । भौतिक पूर्वाधारको क्षेत्र असाध्यै कमजोर अवस्था छ । मेरो क्षेत्रको विकासमा राष्ट्रिय स्तरबाट पहल गर्नेछु । केन्द्रीय नीतिहरूसँगै सरकार निर्माण गर्ने संसदको सदस्य हुँ । केन्द्रीय सरकारको तर्फबाट मेरो निर्वाचन क्षेत्रमा गौरवका आयोजना, बजेटहरू ल्याउन भूमिका खेल्नुपर्नेछ ।

विशेष गरी शिक्षालाई ध्यान दिन सकिएन भने त्यहाँको अविकास फेरि पनि लामो समयसम्म निरन्तरता रहन्छ । मेरो क्षेत्रलाई शिक्षामा जोड दिँदै पूर्ण साक्षरको अभियानमा जोड्ने छु । रेकर्डमा मात्र हैन, त्याहाँका विद्यार्थीहरू उच्च शिक्षा पढ्न सक्ने पहुँचमा हुन त्याहाँका दाजुभाईहरूमा इन्जिनियर खोज्दा र वकिल खोज्दा भेट्न सकुँ । प्राध्यापक, डाक्टर भेट्न सकुँ अर्थात् शिक्षा त्यस प्रकारले वेवस्थित गर्न जरुरी छ ।

मेरो क्षेत्रमा स्वास्थ्य पूर्वाधार धेरै कमजोर अवस्थामा छ । राज्यले विभिन्न खालका प्राण घातक रोगहरूमा अनुदान दिन्छ, उपचारमा सहायता दिन्छ । तर, के रोग लागेको हो भनेर पहिचान गर्न नपाई मान्छेको मृत्यु हुन्छ । पालिका तहमा नियमित स्वास्थ्य जाँचको व्यवस्था गर्नुपर्नेछ ।

सार्वजनिक सेवा प्रवाहलाई असाध्यै व्यवस्थित गर्नुपर्नेछ । विकास आयोजनाहरू अलपत्र हुने अवस्थालाई विशेष ख्याल गर्नेछु । मूलतः राज्य मेरो अभिभावक हो, राज्य मेरो साथमा छ भन्ने अनुभूति दिलाउनका लागि जनप्रतिनिधिले निर्वाह गर्नुपर्ने भूमिका म गर्छु ।

प्रकाशित मिति: बुधबार, मंसिर १४, २०७९ २०:५५