स्वाइन फिबरले जयबहादुरको बंगुर फार्म सखाप, झण्डै करोडको क्षति

A+ A A-

कैलालीको भजनीमा एकै व्यक्तिका ४८२ बंगुर मरेका छन् । अहिले फैलिएको अफ्रिकन स्वाइन फिबर संक्रमणका कारण भजनीका जयबहादुर बुढाको बंगुर फार्मका ४८२ बंगुर मरेका हुन् । बंगुर मरेपछि झण्डै १ करोड रुपैयाँबराबरको नोक्सानी भएको छ ।

‘स्वाइन फिभरका कारण संक्रमित ७० बंगुरलाई मंगलबार गाडियो र यसअघि ४१२ बंगुर मरिसकेका छन्,’ उनले भने, ‘यसरी ९५ लाख २० हजार बढीको क्षति भएको छ ।’

बैंकबाट ऋण लिएर व्यवसाय गरिरहेका जयबहादुरलाई सबै बंगुर नष्ट गर्नुपरेपछि पीडा भएको छ । बडिमालिका कृषि प्रवर्द्धन केन्द्रका सञ्चालक बुढा व्यवसाय नै बन्द भएपछि पुनः व्यवसाय गर्न सक्ने अवस्था नभएको बताउँछन् । ‘रोगले बंगुर मरेपछि ६ महिनासम्म खोर खाली राख्नुपर्छ,’ उनले भने, ‘भएका छानाहरू पनि भत्काउनुपर्ने भएको छ ।’ ऋण लिएको पैसाको ब्याज कसरी तिर्ने भन्ने चिन्तामा अहिले जयबहादुर छन् ।

उनका अनुसार भजनी नगरपालिकाका प्रमुखसहितको उपस्थितिमा मुचुल्का बनाएर बंगुर नष्ट गरिएको छ । बुढाको अहिले व्यवसाय मात्रै बन्द भएको छैन, कामदारहरू बेरोजगार भएका छन् ।

उनी अहिले आम्दानीको माध्यम समाप्त भएपछि बैंकको ब्याज र किस्ता कसरी व्यवस्थापन गर्ने भन्ने चिन्तामा रहेका छन् । ‘कतैबाट राहत पाइन्छ कि भन्ने आशा छ, अब नयाँ व्यवसाय सुरु गर्नलाई लगानीसमेत छैन,’ उनले भने ।

उनको फार्ममा असोज पहिलो साताबाट बङ्गुर मर्न थालेपछि पशुपंक्षी अन्वेषण प्रयोगशाला धनगढी र केन्द्रीय प्रयोगशाला काठमाडौंमा प्रयोगशाला परीक्षण गर्दा अफ्रिकन स्वाइन फिभर पोजेटिभ देखिएको हो ।

बंगुरमा महामारी रोग फैलिन नदिन उक्त क्षेत्र सिल गरिएको थियो । भजनी नगरकार्यपालिकाले प्रदेश तथा संघीय सरकारसँग सहयोगका लागि सिफारिस गर्ने निर्णय गरेको छ । कात्तिक १५ गते पशुपंक्षी रोग अन्वेषण प्रयोगशाला धनगढी र केन्द्रीय प्रयोगशाला काठमाडौंमा यो रोग देखिएको हो ।

बंगुर प्रजातिमा देखापर्ने यो रोग केही वर्षपहिला अमेरिका र त्यसपछि चीनमा देखापरेको थियो । यसका कारण बंगुर मर्न थालेपछि गृहसचिव विनोदप्रकाश सिंह, पशु सेवा विभाग काठमाडौंका डा. मुकुल उपाध्याय, पशुपंक्षी रोग अन्वेषण प्रयोगशाला धनगढीका डा. नरेशप्रसाद जोशी, भेटेरेनरी अस्पताल कैलालीका डा. हेमराज अवस्थीसमेतले स्थलगत अनुगमन गरेका थिए ।

प्रकाशित मिति: बुधबार, मंसिर १४, २०७९ १४:१९