कांग्रेसभित्र प्रधानमन्त्री बन्ने दौडमा देउवाले थाले वार्ता, शेखरलाई कुर्दै गगन

कांग्रेसभित्र प्रधानमन्त्री बन्ने दौडमा देउवाले थाले वार्ता, शेखरलाई कुर्दै गगन

A+ A A-

संघीय चुनावअघि सत्ता गठबन्धनमा पावर शेयरिङका विभिन्न मोडलमध्ये एक थियो, प्रधानमन्त्री तथा कांग्रेस सभापति शेरबहादुर देउवा राष्ट्रपति बन्ने, माओवादी अध्यक्ष पुष्पकमल दाहाल 'प्रचण्ड' प्रधानमन्त्री बन्ने र देउवापत्नी आरजु राणा देउवा शक्तिशाली मन्त्रालयसहित उपप्रधानमन्त्री बन्ने ।

अहिले कांग्रेस सभापति देउवालाई प्रेसर छ सत्ता गठबन्धन जोगाउन र संसदीय दलको नेता आफू बन्ने वा आफूअनुकूलको मान्छेलाई बनाउने ।

देउवा प्रधामन्त्रीमै बसेर अन्य पद गठबन्धनबीचमा बाँड्ने विकल्प छँदैछ । ती मोडलहरूबारे गठबन्धनका दलहरूमा सहमति जुट्न बाँकी छ ।

९१ ठाउँमा उम्मेदवारी दिएको कांग्रेसले ५२ सिट जितेको छ भने दुई ठाउँमा अग्रता लिएको छ । समानुपातिकमा भने कांग्रेस एमालेपछि दोस्रो दल बन्नेछ । प्रधानमन्त्रीको दौडमा देउवासँगै इतर समूहका नेता डा. शेखर कोइराला, नेता रामचन्द्र पौडेल, पूर्वमहामन्त्री शशांक कोइराला, पूर्वउपसभापति प्रकाशमान सिंह र वर्तमान महामन्त्री गगन थापा छन् ।

वार्तामा देउवा

देउवा पार्टीभित्र बलिया छन् । उनी संसदीय दलको नेतामा लडे अन्य प्रतिस्पर्धीलाई भारी पर्न सक्छ । उनले सरकार बनाउन गठबन्धन १२ वर्ष कायम राख्ने कुरा चुनावअघि नै बालेको कुरा हो । गठबन्धनको झिनो बहुमत आउने देखेपछि उनले राप्रपा अध्यक्ष राजेन्द्र लिङ्देन र जनमत पार्टीका अध्यक्ष सीके राउतसँग टेलिफोन संवाद गरेका छन् ।

लोसपा अध्यक्ष महन्थ ठाकुर राजधानी फर्केपछि छलफल गर्ने तयारी छ । सभापति पूर्णबहादुर खड्का र पत्नी राणामार्फत लबिङ गरिरहेका छन् देउवा । देउवासँग संस्थापन पक्षबाट उम्मेदवार बन्न रामचन्द्र पौडेल र प्रकाशमानसिंह लबिङमा छन् ।

पावर सेन्टर भएकाले देउवाकहाँ एकीकृत समाजवादीका अध्यक्ष माधवकुमार नेपाल र माओवादी अध्यक्ष प्रचण्ड पुगिरहेका छन् । प्रचण्ड पहिलो दुई वर्ष आफैँ प्रधानमन्त्रीको कुर्सीमा बस्न चाहन्छन् । यसअघि प्रचण्डले डिल्लीबजार कारागारमै पुगेर नागरिक उन्मुक्ति पार्टीका नेता रेशम चौधरीसँग भेटिसकेका छन् ।

अरुलाई फकाउँदै पौडेल

तनहुँबाट चुनाव जितेका रामचन्द्र पौडेल संसदीय दलको नेता बन्न र गठबन्धनका अन्य दलबाट समर्थन बटुल्न दौडिरहेका छन् । उनले शशांक कोइराला र प्रकाशमान सिंहसँग अलगअलग भेट गरे । एकीकृत समाजवादीका अध्यक्ष माधव नेपालसँग पनि भेट गरेका छन् ।

‘सभापति स्वयम्‌ले देशलाई तपाईंको खाँचो छ भनेको कुरा अहिले पनि सम्झन्छु,’ पौडेलले शिलापत्रसँग भने, ‘देशका लागि ठूलो लगानी गरेको छु । अहिले मेरै आवश्यकता देख्छु । अब अलमलिएर बस्नुहुँदैन ।’

माधव नेपालसँग पहिलेदेखि नै विचार मिल्ने गरेको पौडेल बताउँछन् । जनमतले युवालाई रुचाएको देखिन्छ । कांग्रेस महामन्त्री थापा युवा हस्तक्षेप गर्न चाहन्छन् । महामन्त्री थापाभन्दा आफू अब्बल रहेको पौडेलको दाबी छ ।

‘उहाँ युवा हो । तर, हतार गरेर, व्यक्तिको चाहनाले मात्र हुँदैन । उहाँले मलाई सहयोग गर्नुहुन्छ,’ पौडेलले भने । इतिहासको मूल्याकंन हुनुपर्ने उनको दाबी छ । ‘राष्ट्रका लागि गरेको त्याग, योगदान र अनुभव पनि हेर्नुपर्छ । यो अनुभवलाई राष्ट्रले उपयोग गर्ने कि नगर्ने ? पालो पनि त चाहियो,’ पौडेलले आफ्नो दाबी पुष्टि गर्दै भनेका छन्, ‘सुशासनका लागि जीवन समर्पण गरेको छु । गणितीय हिसाबले कसैलाई आउट गर्न मिल्दैन । बाहिर फाल्न मिल्दैन । कमिसन र भ्रष्टाचार रोकियो भने देशको विकास हुन्छ । यसका लागि मेरो आवश्यकता छ ।’

अवस्था नियाल्दै प्रकाशमान

राजनीतिक यात्रामा पार्टी प्रमुख र प्रधानमन्त्री बन्न बाँकी रहेका नेता हुन् प्रकाशमान सिंह । संसदीय दलको नेता बन्न उनले परिस्थिति नियालिरहेका छन् । बालकोट पुगेर एमाले अध्यक्ष केपी शर्मा ओलीसँग कांग्रेसको सन्देश पुर्‍याएका छन् । उनले सभापति देउवालाई समेत आफ्नो नाममा राजी गराउने लबिङमा छन् ।

‘अवस्था नियाल्दै हुनुहुन्छ । अहिले के गर्ने भन्ने तय भैसकेको छैन,’ सिंह निकट एक नेताले शिलापत्रसँग भने, ‘सभापतिसँग पनि संवादमा हुनुहुन्छ ।’ चुनावी घरदैलोमा समेत सिंहलाई मतदाताले प्रधानमन्त्री बन्न शुभकामना दिन्थे । उनी मौन रहन्थे ।

छलफलको समय कुर्दै गगन थापा

संसदीय दलको नेता लडेर प्रधानमन्त्रीको दाबी गर्छु भनेर मत मागेका नेता हुन् महामन्त्री गगन थापा । एक कदम पछि हटे वा प्रयास नगरे उनलाई काठमाडौं ४ का मतदाताले टिक्न दिने छैनन् । निर्वाचनको पूर्ण परिणाम सार्वजनिक हुने समय पर्खिने र उपलब्ध सांसदसँग संवादमा छन् थापा ।

‘पहिला पूर्ण रूपमा नतिजा आओस्, अनि आफ्नो समूहमा पनि छलफल गर्नुपर्छ । शेखर दाइ जिल्लामा हुनुहुन्छ । उहाँ काठमाडौं आएपछि कुरा अघि बढ्छ,’ थापानिकट एक नेताले शिलापत्रसँग भने ।

अर्का महामन्त्री विश्वप्रकाश शर्माको समर्थन रहने सार्वजनिक अभिव्यक्तिले गगनलाई फाइदा छ । युवा एजेन्डा अघि सारेर चुनाव जितेका नेता प्रदीप पौडेलले पनि युवालाई समर्थन गर्ने बुझाइ थापाको छ ।

बाजुरा, स्याङ्जालगायतका जिल्लामा मतगणना रोकिएको र पुनः मतदान हुने क्षेत्रमा पनि इतर समूहका नेताले अग्रता लिएकाले कांग्रेसको सिट बढ्न सक्छ । उनीहरूसँग संवादले अर्थ राख्ने भएकाले गगन त्यसैको प्रतीक्षामा छन् ।

काठमाडौं आएपछि बोल्ने शेखर

इतर समूहका नेता डा. शेखर कोइराला मोरङमा छन् । उनले मतदातासँग साक्षात्कार र नेता कार्यकर्तासँग शुभकामना लिइरहेका छन् । प्रधानमन्त्रीको दाबी गरेका उनले संसदीय दलको नेतामा उम्मेदवारी दिनुअघि पार्टीका शीर्ष नेतासँग छलफल गर्नेछन् ।

‘उहाँ काठमाडौं फर्किएपछि पार्टी सभापतिसहित सम्पूर्ण पदाधिकारी र नेताहरूसँग छलफल गर्नुहुन्छ,’ कोइरालाका स्वकीय सचिव दिनेश थपलियाले शिलापत्रसँग भने, ‘अहिले यस विषयमा उहाँले केही बोल्नुहुन्न ।’

परिणाम कुर्दै शशांक

प्रधानमन्त्रीको दाबेदार शंशाक कोइराला पनि मतपरिणाम नै कुर्दैछन् । नवलपुरमा व्यस्त रहेका उनी संसदीय दलको नेतामा उम्मेदवार बन्ने तर तयारी कसरी गर्ने भन्नेमा निर्णयमा पुगेका छैनन् ।

‘बाजुरा, दोलखा र स्याङ्जाको मतपरिणाम आओस् । नवलपुरको पनि सबै क्षेत्रको आइसकेको छैन । उहाँ जिल्लामा हुनुहन्छ,’ कोइरालाका सचिवालय सदस्य सुरज उप्रेतीले भने, ‘उठ्ने तयारी छ, मतपरिणाम पर्खिदै हुनुहुन्छ ।’

प्रकाशित मिति: मंगलबार, मंसिर १३, २०७९ २०:०४