भारत हिटलरको विचारधाराबाट प्रभावित : खान

A+ A A-

पाकिस्तानका प्रधानमन्त्री इमरान खानले काश्मीरका विषयमा भारतको नीति हिटलरको नाजी विचारधाराबाट प्रभावित भएको टिप्पणी गरेका छन् ।

खानले आफूलाई भारतीय राष्ट्रिय स्वंयसेवक संघ आरएसएसको विचारधारासँग डर लागेको बताएका छन् । प्रधानमनत्री खानले आफ्नो आधिकारिक ट्विटर एकाउन्टबाट लेखेका कुराहरूलाई पाकिस्तान सरकारको ट्विटबाट समेत प्रकाशित गरिएको छ।

आरएसएस सत्तारूढ भारतीय जनता पार्टीसँग सम्बन्धित दक्षिणपन्थी, हिन्दु राष्ट्रियतावादी स्वंयसेवक संस्था हो।

खानले लेखेका छन्, ‘भारत प्रशासित कश्मीरमा भइरहेको कर्फ्यू, कार्बाही र जनसंहारको अवस्था नाजी विचारधाराबाट प्रभावित आरएसएस विचारधारामा आधारित छ।’

‘यो जातीय संहार गरेर कश्मीरको जनसंख्या बदल्ने प्रयास हो। प्रश्न उठ्छ हिटलरले म्युनिखमा गरेको जस्तो कामलाई के विश्वले हेरिरहन्छ ?’

पाकिस्तानी प्रधानमन्त्री खानले ट्विटमा लेखेका छन्, ‘म आरएसएसको हिन्दु श्रेष्ठताको विचारधाराबाट डराएको छु । यसलाई भारत प्रशासित कश्मीरमा रोक्नुपर्छ अन्यथा भारतमा मुसलमानहरूमाथि दमन हुन्छ र अन्ततः पकिस्तान निशानामा पर्छ।’
उनले हिन्दू श्रेष्ठता हिटलर शासनको अर्को संस्करण भएको पनि टिप्पणी गरेका छन् । यसअघि खानले भारतको निर्णयबारे आफूले विश्वलाई जानकारी गराउन चाहेको बताएका थिए ।
गत ५ अगस्टमा भारत सरकारले जम्मू काश्मीर राज्यलाई प्राप्त विशेष राज्यको दर्जा खारेज गर्ने निर्णय गरेृपछि पाकिस्तानले भारतसँगको आफ्नो कूटनीतिक सम्बन्ध सीमित पार्ने र व्यापार सम्बन्ध तोड्ने घोषणा गरेको थियो।

प्रकाशित मिति: सोमबार, साउन २७, २०७६ १५:४९