को बन्ला प्रदेश १ को मुख्यमन्त्री ? (भिडियो)

A+ A A-

देशका आठ जना पूर्वप्रधानमन्त्रीहरू मातृकाप्रसाद कोइराला, बीपी कोइराला, नगेन्द्र रिजाल, मनमोहन अधिकारी, सूर्यबहादुर थापा, गिरिजाप्रसाद कोइराला, झलनाथ खनालहुँदै केपी शर्मा ओलीको गृह प्रदेश हो– प्रदेश १ ।

यो प्रदेशले एमालेका शेरधन राई र भीम आचार्यसँगै नेकपा (एकीकृत समाजवादी) का राजेन्द्रकुमार राई गरी तीन जना मुख्यमन्त्री पाइसकेको छ । तर, उनीहरूले अघिल्लो प्रदेशसभाबाट प्रदेशको नाम जुराउन सकेनन् ।

अबचाहिँ को होला त्यहाँको मुख्यमन्त्री ? प्रदेशवासीको चासो छ । मुख्यमन्त्रीको लाइनमा भने थुप्रै दलका नेता छन् ।

नेपाली कांग्रेसबाट केदार कार्की, अमृत अर्याल र उद्धव थापा मुख्यमन्त्री हुन चाहना गरिरहेका नेता हुन् । कार्की र अर्याल प्रदेश सांसद निर्वाचित भइसकेका छन् । यसअघि कांग्रेस नेताहरू गुरुराज घिमिरे र राजीव कोइराला पनि मुख्यमन्त्रीको आकांक्षी थिए । तर, दुवै नेता चुनावमा पराजित भए । थापा भने समानुपातिकतर्फको पहिलो नम्बरमै छन् ।

नेकपा एमालेबाट प्रदेशका पूर्वमन्त्रीहरू हिक्मत कार्की र तिलकुमार मेन्याङ्बोलाई मुख्यमन्त्रीको दाबेदारको रूपमा हेरिएको छ । दुवै जना निर्वाचित भइसकेका छन् । यसअघि पूर्वमन्त्री जीवन घिमिरे पनि मुख्यमन्त्रीको आकांक्षी थिए । तर, उनी पराजित भए ।

वर्तमान मुख्यमन्त्री राजेन्द्रकुमार राईको फेरि दोहोरिने सुर छ । उनी प्रदेशसभा सदस्यमा निर्वाचित भइसकेका छन् ।

यस्तै, नेकपा (माओवादी केन्द्र) का नेता तथा प्रदेशका आर्थिक मामिला तथा योजनामन्त्री इन्द्रबहादुर आङ्बोलाई पनि भावी मुख्यमन्त्रीको दाबेदारको रूपमा हेरिएको छ । उनी प्रदेशमा लामो समय मन्त्री हुने माओवादी नेता पनि हुन् । उनी प्रदेशसभा सदस्यमा निर्वाचित भइसकेका छन् ।

प्रदेशसभामा प्रत्यक्षतर्फ ५६ र समानुपातिकतर्फ ३७ गरी ९३ सांसद हुन्छन् । सरकार गठनका लागि कम्तीमा ४७ जना सांसदको समर्थन चाहिन्छ । कुनै पनि दलले एकल बहुमत नपुर्‍याउने प्रस्ट संकेत देखिइसकेको छ । दुई वा दुईभन्दा बढी दलको समर्थनमा सरकार बन्ने स्थिति छ । एमालेले प्रत्यक्षतर्फ अघिल्लो पटकमा भन्दा १२ सिट कम २४ सिट मात्रै जितेको छ । कांग्रेसले अघिल्लो पटक ८ जितेकोमा १४ सिट जितिसकेको छ भने तीन सिटमा अग्रता छ ।

अग्रता भएको क्षेत्रमा पनि चुनाव जिते कांग्रेसको दोब्बर बढी १७ सिट हुनेछ । माओवादीले दुईवटा कम ९ सिट जितेको छ । नेकपा एकीकृत समाजवादीले ३ सिट र राप्रपाले २ सिट जितेको छ । यहाँ एमाले–राप्रपा र जसपाले सरकार गठन गर्न सक्ने देखिएको छ । यस्तो अवस्थामा एमालेबाट हिक्मत कार्की वा तिलकुमार मेन्याङ्बोमध्येबाट हुने सक्ने चर्चा हुँदै आएको छ ।

प्रकाशित मिति: सोमबार, मंसिर १२, २०७९ २०:२४