झलनाथले इलाममा दोस्रो पटक चुनाव हार्नुका दुई कारणः पहिला घर-चश्मा काण्ड र अहिले गठबन्धनको गडबडी

झलनाथले इलाममा दोस्रो पटक चुनाव हार्नुका दुई कारणः पहिला घर-चश्मा काण्ड र अहिले गठबन्धनको गडबडी

A+ A A-

नेकपा एकीकृत समाजवादीका सम्मानित नेता झलनाथ खनाल इलाम–१ बाट सातौँपटक चुनावी प्रतिस्पर्धामा थिए । खनालले यही निर्वाचन क्षेत्रबाट २०४८ सालयता ७ वटा चुनाव लडे । त्यसमध्ये २०५६ र यसपटक पराजित भएका उनी अन्य पाँचवटा चुनावमा निर्वाचित भएका थिए । सातौँ निर्वाचनमा खनाललाई आफ्नै पूर्वसहकर्मी एमालेका महेश बस्नेतले हराए ।

इलाम- १ बाट एमालेका बस्नेतसँग खनाल २ हजार ९५७ मतान्तरले पराजित भएका छन् । तर, निर्वाचन आयोगले आधिकारिक रूपमा परिणाम घोषणा भने गरिसकेको छैन ।

२०४८ मा निर्वाचित हुँदै सांसद बनेका खनाल त्यसयता २०५१ को मध्यावधि निर्वाचन, २०६४ मा भएको पहिलो संविधानसभा निर्वाचन, २०७० को दोस्रो संविधानसभा निर्वाचन र २०७४ को प्रतिनिधिसभा निर्वाचनमा इलामबाट निर्वाचित भएका थिए ।

२०५६ मा हारको कारण

२०५६ मा खनाल कांग्रेसका बेनु प्रसाईंसँग पराजित भएका थिए । यो निर्वाचनमा खनालले इलामको फिक्कलमा भएको एक सभामा कांग्रेसका नेता प्रसाईंलाई ‘वान भोट ट्री स्वीजरल्यान्ड ज्याकेट फ्रि’ भन्दै आफूलाई हराउन गाँउ–गाँउमा ज्याकेट बाँडेको आरोप लगाएका थिए ।

खनालले त्यतिबेला प्रसाईंले लगाएको चस्मा ५० हजारको भएको भन्दै त्यो चस्मा लगाउने हौसियत कहाँबाट बन्यो भन्ने प्रश्न उठाएका थिए ।

त्यसको जवाफमा प्रसाईंले खनालले काठमाडौंको डल्लुमा बनाएको घरको फोटोसहितको प्रचार बनाएका थिए । सर्वहारा नेताले बुलेट प्रुफ घर कसरी बनाए भनेर प्रसाईंले प्रश्न उठाएको एमाले इलामका सचिव उमेश गुरुङले शिलापत्रलाई बताए । गुरुङका अनुसार खनालको आरोपपछि प्रसाईंले २०५६ मा आफूले लगाएको चस्माको मूल्य तीन हजार मात्र रहेको प्रचार गरेका थिए ।

अन्ततः २०५६ मा विकास नगरेको, चस्मा, ज्याकेट र काठमाडौंमा बनाएको घर प्रकरणकै कारण खनाल पराजित बन्न पुगेको इलामका पुराना राजनीतिज्ञहरू बताउँछन् । २००५६ मा खनालले ६ हजारभन्दा बढीको मतान्तरसहित पराजय व्यहोरेको गुरुङ बताउँछन् ।

यसपटक किन हारे ?

एमालेका महेश बस्नेत

सत्ता गठबन्धनमा रहेका दल स्थानीय चुनावमा पनि गठबन्धन बनाएर होमिएका थिए । तर, खनालको दल नेकपा एसले इलाममा जिल्ला समन्वय समिति र सूर्योदय नगरपालिकाको कार्यपालिका गठनका क्रममा सत्ता गठबन्धन भत्काएको इलामस्थित नेपाली कांग्रेसका नेता-कार्यकर्ताको आरोप छ ।

गठबन्धनबाट अलग भएर नेकपा एसले जिसस र सूर्योदयको कार्यपालिका गठनमा एमालेसँग तालमेल गरेको थियो । जिससमा एमालेसँग मिलेको भन्दै कांग्रेसका नेता-कार्यकर्ता खनालसँग रुष्ट थिए । त्यही इगोको फाइदा अहिले एमालेले उठाएको देखिन्छ ।

कांग्रेसभित्र खनालसँग असन्तुष्टि बढ्दै जाँदा कांग्रेसका जिल्ला नेता विक्रम पाण्डेले स्वतन्त्र उम्मेदवारी दिए ।

प्रकाशित मिति: आइतबार, मंसिर ११, २०७९ २०:१३