दीपक बोहोरा : आवाज नसुने पनि मतदाताले जसको मन बुझे

A+ A A-

निर्वाचनमा उम्मेदवारहरूले कोणसभा तथा आमसभाहरूमा चर्काचर्का भाषण गर्छन् । उम्मेदवारले भाषण नै नगरी चुनाव जित्न सक्छन् र ? विश्वास नै लाग्दैन । तर, भाषण नै चुनाव जित्ने अन्तिम अस्त्र होइन भन्ने प्रमाणित राप्रपाका नेता दीपक बोहोराले यो चुनावमा गरिदिएका छन् । त्यो पनि शक्तिशाली प्रतिस्पर्धीलाई पछारेर ।

रुपन्देही क्षेत्र नं ३ बाट राष्ट्रिय प्रजातन्त्र पार्टी (राप्रपा) का उम्मेदवार दीपक बोहोराले चुनाव अवधिभर एक शब्द नबोली जित हात पारेका छन् । उनले पाँचदलीय सत्ता गठबन्धनका तर्फबाट लडेका बहालवाला गृहमन्त्री बालकृष्ण खाँणलाई पराजित गरेका हुन् ।

पोस्ट कोभिड समस्याका कारण भ्वाइस रेस्टमा रहेका बोहोरा जनताका बीचमा सम्बोधन नै नगरी निर्वाचनमा विजयी भएका हुन् । उनले खाँणलाई ६ सय ८१ मत अन्तरले पराजित गरे । बोहोराले ३६ हजार ७ सय १७ मत ल्याउँदा गृहमन्त्री खाँणले ३४ हजार ३६ मत ल्याएका थिए ।

राप्रपाका नेता बोहोराले स्वास्थ्य समस्या भएका कारण कुनै पनि औपचारिक कार्यक्रममा सम्बोधन गरेनन् । हाल चिकित्सकको सल्लाहअनुसार नै उनले ‘स्पिच थेरापि’ गरिरहेका छन् । सभा समारोहमा उपस्थित भए पनि उम्मेदवार बोहोराले कहीँ पनि मन्तव्य राखेनन् । उनका तर्फबाट पूर्वगृहमन्त्री निरञ्जन थापा, राप्रपाका लुम्बिनी प्रदेश संयोजक प्रदीप उदयलगायतले सभा/भेलाहरूमा मन्तव्य राख्ने गरेका थिए ।

बोहोरा कोरोना महामारीको दोस्रो लहर चलेका बेला २०७७ जेठमा संक्रमित भएका थिए । तर, खासै समस्या देखिएको थिएन । ‘उहाँलाई त्यतिबेला ज्वरो, खोकीलगायतका सामान्य लक्षण मात्रै देखिएका थिए । घरमै बसेर आराम गर्दा ठीक भएको थियो’, राप्रपा नेता स्वाती थापाले भनिन् ।

चुनाव अवधिभर बोहोरा बिहान ६ बजेदेखि राति ११ बजेसम्म घरदैलो, कोणसभामा सहभागी भए तर, कतै बोलेनन् । थापाका अनुसार बोहोराले नै नेताहरूलाई क्षेत्रभरि आफैँ परिचालन गर्ने, दैनिक योजना बनाउने, हरेक दिन संयन्त्रको छलफल गर्ने र कार्यक्रममा सहभागी भइरहने काम गरेका थिए ।

मतदाताका घरघरमा पुगेर भेटघाट गर्ने, हात हल्लाएर मतदातालाई अभिभादन गर्ने, मतदाताका कुरा सुनेर टाउको हल्लाउने काम मात्रै गर्ने गरेका थिए । चुनावी प्रचारको सुरुवातमा आफ्ना कुरा कागजमा लेखेर दोभाषेको प्रयोग गरिए पनि पछि त्यो झन्झट भएपछि पार्टीका नेताहरूले नै सम्बोधनमार्फत बोहोराका प्रतिबद्धता राखिदिने गरेका थिए ।

सबैतिर आफैँ पुगेर मतदातासँग सिधा सवालजवाफ गर्न नपाउँदा बोहोरालाई असुविधा भए पनि पार्टीका नेताहरूले उनको आवाज मतदातासम्म पुर्‍याउने काम गरेका थिए । बोहोरा बोल्न नसक्ने नेताको रूपमा प्रचार गरिएको आरोप लगाउँदै थापाले भनिन्, ‘हो, म बोल्नका लागि बिरामी छु । कांग्रेसमा संवेदनशीलता देखिएन । बीपी कोइरालाको घाँटीमा क्यान्सर भएको थियो । उहाँलाई नेता मानेकै हुन् । सुशील कोइरालाको जिब्रोमा क्यान्सर भयो । आजीवन नेता हुनुभयो नि ! गिरिजाबाबु हस्पिटलबाट अक्सिजन मास्क निकालेर साइन गरेर देश चलाउनुभयो । आज देउवाको भाषा पनि प्रस्ट बुझिँदैन । र्‍याल चुहाउने उमेरमा प्रधानमन्त्रीको प्रचार देखिन्छ ।’

गृहमन्त्री एवं नेपाली कांग्रेसका नेता खाँण र राप्रपाका नेता दीपक बोहोरा अघिल्लो आमनिर्वाचनमा सहयात्री थिए । २०७४ को निर्वाचनमा कांग्रेस र राप्रपाबीच गठबन्धन थियो भने राप्रपाका बोहोरा कांग्रेसको समर्थनमा चुनाव लडेका थिए । त्यसबेला बोहोरालाई जिताउन हलो चिह्नमा मत माग्दै हिँडेका गृहमन्त्री खाँणले अहिले हार व्यहोर्नुपर्‍यो । २०७४ मा आफू समानुपातिकमा बसेर खाँणले प्रत्यक्ष निर्वाचन लडेका बोहोराका लागि भोट मागेका थिए । तर, त्यो बेला तत्कालीन एमाले नेता घनश्याम भुसाल बोहोरालाई फराकिलो अन्तरले पराजित गर्दै विजयी भएका थिए । भुसालले ३२ हजार ८६६ मत ल्याउँदा बोहोराले २७ हजार ४२२ मत प्राप्त गरेका थिए ।

२०७० मा भने खाँणले भुसाललाई ८६ मतले पराजित गरेका थिए । २०७० को दोस्रो संविधानसभा निर्वाचनमा तत्कालीन २ नम्बर क्षेत्र (हाल ३) मा कांग्रेसका रामकृष्ण ताम्राकारलाई पराजित गर्दै विजयी भएका नेता बोहोरा २०७४ मा रुपन्देही ३ मा एमालेका घनश्याम भुसालसँग पराजित भएका थिए ।

नेपालको राजनीतिमा चार दशकदेखि क्रियाशील नेता बोहोराको संसदीय यात्रा २०३६ सालदेखि सुरु भएको हो । रुपन्देहीबाट राष्ट्रिय पञ्चायत सदस्यमा निर्वाचित भएका उनी २०४२ सालको राष्ट्रिय पञ्चायत सदस्यमा निर्वाचित भएका थिए ।

त्यसअघि २०३८ र ०४० मा पर्यटन राज्यमन्त्री बनेका राप्रपा नेता बोहोरा २०५७ मा बैंक अफ काठमाडौंको अध्यक्षसमेत बनेका थिए । बोहोरा २०६७ मा वन तथा भूसंरक्षणमन्त्री तथा २०६७ मै राष्ट्रिय प्रकृति संरक्षण कोषको अध्यक्ष बनेका थिए ।

त्यसपछि उनी २०७० सालमा रुपन्देही क्षेत्र नम्बर २ बाट संविधानसभा सदस्यमा निर्वाचित भए । उनी २०७२ मा श्रम तथा रोजगारमन्त्री, २०७३ सालमा आपूर्तिमन्त्री र २०७४ मा स्वास्थ्यमन्त्री बनेका थिए । जिल्लाको सिद्धार्थनगर नगरपालिका– ३, खजहाना निवासी बोहोरा २००७ साल चैत १८ गते पाल्पामा बुबा प्रतिमानचन्द्र र आमा निमा बोहोराको कोखबाट जन्मिएका थिए । उनी राजनीतिशास्त्रमा स्नातक छन् ।

प्रकाशित मिति: आइतबार, मंसिर ११, २०७९ १६:०५