कैलालीका ५ मध्ये ३ क्षेत्रमा नागरिक उन्मुक्तिको कब्जा

A+ A A-

कैलालीका पाँच निर्वाचन क्षेत्रमध्ये तीनवटा क्षेत्रमा नयाँ पार्टी नागरिक उन्मुक्ति पार्टीले कब्जा जमाएको छ । टीकापुर हत्याकाण्डमा जेलसजाय भोगिरहेका रेशम चौधरी संरक्षक रहेको नागरिक उन्मुक्तिले पहिलोपटक प्रतिनिधिसभा तथा प्रदेशसभा निर्वाचनमा भाग लिएको हो ।

यो पार्टीले यसअघि वैशाखमा भएको स्थानीय तहमा निर्वाचनमा पनि भाग लिँदै जिल्लामा सबैभन्दा बढी स्थानीय तहमा विजय प्राप्त गरेको थियो ।

यसपटक प्रतिनिधिसभा र प्रदेशसभा निर्वाचनमा पनि कैलालीका पाँचमध्ये क्रमशः क्षेत्र नम्बर १, २ र ३ मा नागरिक उन्मुक्तिका उम्मेदवार विजयी भएका छन् । नागरिक उन्मुक्तिले विजय प्राप्त गरेका तीनवटा क्षेत्रका ६ प्रदेशसभामध्ये कैलाली निर्वाचन क्षेत्र २ को ‘ख’ मा बाहेक सबै क्षेत्रमा विजय प्राप्त गरेको छ ।

क्षेत्र नम्बर १ मा नागरिक उन्मुक्ति पार्टीकी अध्यक्षसमेत रहेकी रञ्जिता श्रेष्ठ चौधरीले गठबन्धनबाट नेपाली कांग्रेसका उम्मेदवार रामजनम चौधरीलाई १२ हजार ३२३ मतको फराकिलो अन्तरले हराउँदै विजयी हासिल गरिन् । रञ्जिताले ३० हजार ४०४ र रामजनमले १८ हजार ८१ मत पाए ।

यो क्षेत्रको प्रदेश ‘क’मा पनि नागरिक उन्मुक्तिका कैलाश चौधरी विजयी भएका छन् । उनले निकटतम प्रतिद्वन्द्वी गठबन्धनका तर्फबाट माओबादी केन्द्रका दीर्घ बिनाडीलाई पराजित गरे ।

प्रदेश ‘ख’ मा नागरिक उन्मुक्तिकै लक्ष्मणकिशोर चौधरीले गठबन्धनबाट नेपाली कांग्रेसका डा रणबहादुर रावललाई पराजित गरेका छन् ।

क्षेत्र नम्बर २ मा नागरिक उन्मुक्तिका उम्मेदवार अरुण चौधरीले आफ्ना निकटतम प्रतिद्वन्द्वी नेकपा एमालेका झपट रावललाई ५ हजार ७४३ मतले पराजित गरे । चौधरीले २१ हजार ८७१ मत ल्याए भने रावलले १६ हजार १२८ मत प्राप्त गरे । यस क्षेत्रको प्रदेश ‘क’मा भने नागरिक उन्मुक्तिका रतन थापा पराजित बनेका छन् । यहाँ नेपाली कांग्रेसका कमल शाह विजयी भएका छन् ।

प्रदेश ‘ख’ नागरिक उन्मुक्तिका रामेश्वर चौधरी विजयी भएका छन् । उनले नेकपा एमालेका डेजी पाण्डेलाई पराजित गरे ।

क्षेत्र नम्बर ३ मा नागरिक उन्मुक्तिकै गंगाराम चौधरीले आफ्ना निकटतम प्रतिद्वन्द्वी गठबन्धनबाट नेकपा माओबादी केन्द्रका कृष्णकुमार चौधरीलाई ५ हजार ३७१ मत अन्तरले पराजित गरे । गंगारामले २३ हजार १२० मत ल्याए भने कृष्णकुमार १७ हजार ७४९ मत ल्याए ।

यो क्षेत्रको प्रदेश ‘क’मा नागरिक उन्मुक्तिका घनश्याम चौधरी विजयी भएका छन् । उनले गठबन्धनबाट कांग्रेसका खेम डगौरा थारूलाई पराजित गरे । यस्तै, प्रदेश ‘ख’मा खुशिराम चौधरी विजयी भएका छन् । उनले गठबन्धनबाट एकीकृत समाजवादीका अमर साउदलाई पराजित गरे ।

जिल्लाका बाँकी दुई निर्वाचन क्षेत्र ४ र ५ मा गठबन्धनको नेपाली कांग्रेसका उम्मेदवारले विजय प्राप्त गरेका छन् । यी दुवै क्षेत्रमा गठबन्धनका उम्मेदवार प्यानलसहित विजयी भएका छन् ।

क्षेत्र नम्बर ४ मा नेपाली कांग्रेसका वीरबहादुर बलायरले निकटतम प्रतिद्वन्द्वी नेकपा एमालेका लेखराज भट्टलाई २ हजार ६०७ मतले पराजित गरे । बलायरले २६ हजार २२० र भट्टले २२ हजार ६१३ मत ल्याए ।

क्षेत्र नम्बर ४ ‘क’मा नेकपा एकीकृत समाजवादीका दीर्घ सोडारी विजयी भएका छन् । उनले एमालेका भीम देउवालाई पराजित गरे । प्रदेश ‘ख’मा नेपाली कांग्रेसका प्रकाश बम विजयी भएका छन् । उनले एमालेका हरिसिंह साउदलाई पराजित गरे ।

प्रदेश नम्बर ५ मा गठबन्धनबाट नेपाली कांग्रेसका डिल्लीराज पन्त विजयी भएका छन् । उनले उनले एमालेका उम्मेदवार नारदमुनी रानालाई १ हजार ७१ मतको अन्तरले पराजित गरे । पन्तले २१ हजार ३९२ र रानाले २० हजार ३१८ मत प्राप्त गरे ।

यस क्षेत्रको प्रदेश ‘क’ मा माओवादी केन्द्रका रमेश धामीले एमालेका नेपालु चौधरीलाई पराजित गरे भने प्रदेश ‘क’मा कांग्रेसका प्रकाशबहादुर देउवाले एमालेका दुर्गा जोशीलाई पराजित गरे ।

प्रकाशित मिति: शुक्रबार, मंसिर ९, २०७९ १६:५६