सत्ता गठबन्धनको टिकट बाँड्‌ने समितिका संयोजक सिटौला आफैँ पराजित, लिङ्देनसँग दोस्रोपटक हारे

सत्ता गठबन्धनको टिकट बाँड्‌ने समितिका संयोजक सिटौला आफैँ पराजित, लिङ्देनसँग दोस्रोपटक हारे

A+ A A-

झापा–३ बाट राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देन प्रतिनिधिसभामा दोस्रोपटक सदस्यमा निर्वाचित हुँदा कांग्रेस नेता कृष्ण सिटाैला पराजित भएका छन् । कांग्रेस नेता कृष्णप्रसाद सिटौलालाई ३ हजार २ सय ७६ मतान्तरले पराजित गर्दै लिङ्देन लगातार दोस्रोपटक प्रतिनिधिसभाको बाटो तय गरे । एमालेसँग चुनावी तालमेल गरी झापा क्षेत्र नम्बर ३ बाट लिङ्देन उम्मेदवार बनेका थिए ।

लिङ्देनले ४० हजार ६६२ मत ल्याएर विजयी हुँदा सिटौलाले ३७ हजार ३८६ मत प्राप्त गरेका छन् । यस क्षेत्रमा १ लाख ३१ हजार ४३२ मतदाता रहेकोमा ८९ हजार ६३७ मत खसेको मुख्य निर्वाचन अधिकृत चन्द्रमणि ज्ञवालीले जानकारी दिए ।

याेपटककाे चुनाव सम्भवत: सिटाैलाका लागि अन्तिम थियाे । उनलाई कांग्रेस सभापति शेरबहादुर देउवाले मात्र हाेइन, पाँचदलीय सत्ता गठबन्धनले महत्त्वपूर्ण भूमिका दिएकाे थियाे । उनी पाँचदलीय गठबन्धनकाे सिट बाँडफाँट गर्ने कार्यदलका संयाेजक थिए । उनले नै कुन पार्टी कहाँबाट लड्ने भन्ने निर्णय गरेका थिए । यसरी आफैँ हर्ताकर्ता हुँदा पनि उनले राप्रपाका लिङ्देनसँग लड्ने जाेखिमपूर्ण निर्णय लिए । जुन उनका लागि सायद राजनीतिक जीवनकै सबैभन्दा नमिठाे बन्न पुगेकाे छ । कांंग्रेसकाे आन्तरिक राजनीतिमा प्रभावशाली भए पनि सिटाैला संसदीय राजनीतिमा विस्मृतिमा जाने पात्र बनेका छन् ।

२०७४ सालको निर्वाचनमा पनि लिङ्देनले एमालेको साथ लिएर सिटौलालाई हराएका थिए । लिङ्देनले ४४ हजार ६१४ मतसहित निर्वाचित हुँदा सिटौलाको पक्षमा ३१ हजार १७१ मत परेको थियो । २०७० सालको दोस्रो सविधानसभाको निर्वाचनमा सिटौलाले लिङ्देनलाई हराएका थिए ।

यस्तै, नेता सिटौला ७ औं पटक झापा–३ बाट उम्मेदवार उठ्दा तीनपटक हारेका छन् । २०४८ सालको संसदीय निर्वाचनमा एमालेका द्रोणप्रसाद आचार्यसँग सिटौला पराजित भएका थिए । २०५१ सालको संसदीय निर्वाचनमा एमालेका पुष्पराज पोखरेलसँग सिटौला दोस्रोपटक पराजित भए । २०५६ सालको संसदीय निर्वाचनमा एमालेका नारायण राजवंशीलाई पराजित गर्दै सिटौला पहिलोपटक यस क्षेत्रबाट निर्वाचित भई संसद्‌मा पुगेका थिए ।

२०६४ सालको पहिलो संविधानसभा निर्वाचनमा माओवादीका पूर्णसिंह राजवंशीसँग सिटौला फेरि पराजित भए । झापा–३ मा राप्रपा र कम्युनिस्टकै कारण ५ पटक सिटौलाले पराजय भोगेका छन् । २०७० सालअघि कम्युनिस्टहरू थिए भने, २०७४ सालको निर्वाचनपछि एमालेको सहयोगमा राप्रपा सिटौलाका लागि चुनाैती बन्याे ।

२०६३ मंसिर ५ गते तत्कालीन सात राजनीतिक दलका तर्फबाट प्रधानमन्त्रीसमेत रहेका नेपाली कांग्रेसका स्व. सभापति गिरिजाप्रसाद कोइराला र नेकपा माओवादीका अध्यक्ष पुष्पकमल दाहालले बृहत् शान्ति सम्झौतामा हस्ताक्षर गर्दा नेता सिटौलाको महत्त्वपूर्ण भूमिका थियो ।

गृहमन्त्री सिटौला भएका बेला तत्कालीन विद्रोही माओवादीका नेता प्रचण्डसँगै डा. बाबुराम भट्टराईलाई लिन उनी कास्कीको सिक्लेस पुगेका थिए । यो नेपालको इतिहासमै जोखिम काम थियो ।