जनताले परिवर्तन खोजे, हामीले आँट गर्ने बेला आयोः विश्वप्रकाश शर्मा

A+ A A-

झापा–१ बाट प्रतिनिधिसभा सदस्यमा नेपाली कांग्रेसका महामन्त्री विश्वप्रकाश शर्मा निर्वाचित भएका छन् । बुधबार साँझ सार्वजनिक मतपरिणामअनुसार शर्माले ३९ हजार ६२४ मत पाए । उनका निकटतम प्रतिस्पर्धी नेकपा एमालेका अग्नि खरेलले २५ हजार ३४९ मत पाए ।

शर्माले १४ हजार २७५ मतान्तरले खरेललाई हराउँदै तेस्रोपटकमा सांसद बन्ने मौका पाएका छन् । विद्यार्थी राजनीतिबाट आएका शर्मा २०७० सालमा भएको दोस्रो संविधानसभा निर्वाचनमा पहिलो संसदीय प्रतिस्पर्धामा उत्रिएका थिए । झापा–१ मा एमालेका रविन कोइरालासँग उनी मात्र ६ सय मतान्तरले हारेका थिए ।

२०७४ सालको निर्वाचनमा फेरि उम्मेदवार भए, तर वाम गठबन्धनका उम्मेदवार माओवादी केन्द्रका नेता राम कार्कीसँग २ हजार ८६३ मतान्तरले हारेका थिए । योपटकको निर्वाचनमा शर्माले पपुलर मत ल्याएर संसद्‌को यात्रा तय गरेका छन् । प्रस्तुत छ, समसामयिक विषयमा शिलापत्रले महामन्त्री शर्मासँग गरेको संवाद:

तेस्रोपटकमा बल्ल चुनाव जित्नुभयो । त्यो पनि कम्युनिस्टको गढमा के भन्नुहुन्छ ?

झापा–१ का जनताले परिवर्तन चाहेको पाइयो । यहाँका जनताले विकास गर्ने नयाँ पुस्ताको नेतृत्व खोजे । मेरो जित परिवर्तनको उदाहरण हो । मैले तपाईंलाई निर्वाचनकै प्रचारका क्रममा भनेको थिएँ । कम्युनिस्टको स्वाद झापा–१ का जनताले चाखिसके । अब परिवर्तन र विकासप्रेमी नेता यहाँका जनताले खोज्न थालेका छन् । यो मतपरिमाण पनि त्यसैको नतिजा हो । नेकपा एमालेका अग्नि खरेलजीसँगको प्रतिस्पर्धा हो । यहाँ गढ भन्ने जनताले रुचाएनन् । यो त मतपरिमाणले पनि देखायो । लोकतन्त्रमा गढ हुँदैन । यो सबै भ्रम हो भन्ने अहिले पुष्टि भयो ।

‘पपुलर मत’ ल्याएर संसद्‌को यात्रा तय गर्नुभयो । अब झापाका लागि के गर्नुहुन्छ ?

पपुलर मत भन्न मिल्दैन । यो झापाका जनताले चाहेको परिवर्तन र विद्रोह हो । जनताको कुनै पार्टीसँग आस्था होला । तर, नेतालाई हेर्ने दृष्णिकोण सबै जनताको आ–आफ्नै हुन्छ । त्यही भएर योपटक जनताले देशभर परिवर्तनको पक्षमा वकालत गर्ने प्रतिनिधि चुने । अहिलेको निर्वाचनमा जनताले परिर्वतनकारी नेतृत्वमा प्रतिनिधित्व गराएका हुन् । म यो जनताको समर्थनलाई आत्मसात् गरेर अघि बढ्छु । नत्र जनतालाई धोका हुन्छ । त्यही भएर म जनमतको कदर गरेर अघि बढछु ।

झापाबाटै मैले कांग्रेसका महामन्त्री गगन थापालाई संसदीय दलको नेताहुँदै प्रधानमन्त्री पदमा प्रस्ताव गर्छु भनेको छु । यो विषयमा छलफल गर्न बाँकी छ । भावी सरकार र समीकरणका सम्भावनाबारे कांग्रेसले सत्ता गठबन्धनसँगै पार्टीभित्रै अब छलफल हुन्छ । अहिले हतार गर्नुपर्ने अवस्था छैन ।

कृषि, पर्यटन, उद्योग, धान उत्पादन, भारतसँगको व्यापार, रोजगारी, सामान्यदेखि ठूला व्यापार बढाउने, वनजंगल संरक्षण गर्ने र झापालाई सुदूरपूर्वको व्यापारिक केन्द्र बनाउने कांग्रेसको लक्ष्य छ । आगामी दिनमा मेरो ध्यान यत्तै केन्द्रित हुनेछ । जनप्रतिनिधि नभए पनि झापा–१ को विकासका लागि मात्र होइन, पूरै झापाका लागि काम गर्दै आएको थिएँ । यो क्रम आगामी दिनमा अझै बढ्छ ।

युवा प्रधानमन्त्री हुने चर्चा चल्दैछ । तपाईंले कांग्रेसकै महामन्त्री गगनकुमार थापालाई प्रधानमन्त्री बन्न सहयोग गर्ने भन्नुभएको छ । दुवै जना निर्वाचित हुनुभयो । अब कसरी अगाडि बढ्नुहुन्छ ?

अहिले जनताले पनि यस्तै नेतृत्व खोजेका छन् । जनताको मनोभावना नेतृत्वले बुझ्नुपर्छ । नत्र जनताको मन र विचार भाँडिन सक्छ । यो राजनीतिक बहस हो । अब हामीले नेतृत्व गर्छौं भनेर आँट पनि गर्ने समय आयो । यो विषयमा अहिले यति मात्र बुझौँ । त्यही भएर झापाबाटै मैले कांग्रेसका महामन्त्री गगन थापालाई संसदीय दलको नेताहुँदै प्रधानमन्त्री पदमा प्रस्ताव गर्छु भनेको छु । यो विषयमा छलफल गर्न बाँकी छ । भावी सरकार र समीकरणका सम्भावनाबारे कांग्रेसले सत्ता गठबन्धनसँगै पार्टीभित्रै अब छलफल हुन्छ । अहिले हतार गर्नुपर्ने अवस्था छैन ।

अहिलेसम्मको मतपरिमाण हेर्दा सत्ता गठबन्धनमा बहुमत पुग्लाजस्तो छ । अबको नेतृत्व कस्तो हुन्छ ?

नेपाली कांग्रेस, नेकपा माओवादी केन्द्र, नेकपा एकीकृत समाजवादी, राष्ट्रिय जनमोर्चा र लोकतान्त्रिक समाजवादीले सरकार बनाउन सक्ने गरी बहुमत ल्याउन गठबन्धन भएको हो । कांग्रेसको नेतृत्वमा सरकार छ । अहिले यो विषयमा बहस गर्ने अवस्था छैन । जनताले खोजेजस्तो नेतृत्वको सरकार बन्नुपर्छ । यो मेरो व्यक्तिगत विचार हो । जनमतको कदर हुनेगरी सरकार बन्नुपर्छ । मेरो अडान पनि यो पक्षमा हुन्छ ।

पहिलो पटक संसद् छिर्दै हुनुन्छ । मन्त्री बन्ने सोचमा हुनुहुन्छ ?

मैले यो विषयमा सोचेकै छैन । मैले अहिले यो विषयलाई प्राथमिकतामा राखेको पनि छैन । जिज्ञासा राख्नुभयो धन्यवाद !

प्रकाशित मिति: बिहीबार, मंसिर ८, २०७९ १४:३७