यो निर्वाचनले कम्युनिस्टहरूलाई चेतायो : योगेश भट्टराई

A+ A A-

ताप्लेजुङबाट प्रतिनिधिसभा सदस्यमा नेकपा एमालेका सचिव योगेश भट्टराई दोस्रोपटक निर्वाचित भए । मंगलबारबाट सुरु भएको मतगणना सकिँदा सत्ता गठबन्धनको समर्थन पाएका नेकपा माओवादी केन्द्रका खेलप्रसाद बुडाक्षेत्रीलाई २०४ मतान्तरले हराउँदै भट्टराई लगातार दोस्रोपटक सांसद चुनिएका हुन् । सचिव भट्टराईले २१ हजार ९४३ मत पाए भने माओवादीका खेलप्रसाद २१ हजार ७३८ मत ल्याएका थिए ।

यो निर्वाचनमा ताप्लेजुङबाट एमाले सचिव भट्टराई झिनो मतान्तरले मात्र जितेका छन् । हाल सम्पन्न निर्वाचनमा भट्टराईले भोग्नुपरेको चुनौतीका विषयमा शिलापत्रले गरेको छोटो संवाद:

योपटक निर्वाचन समग्रमा कस्तो भयो ?

तपाईंहरूलाई समेत थाहा भएकै कुरा हो । योपटकको निर्वाचनमा मभन्दा तपाईंहरू नै धेरै जानकार हुनुहुन्छ । त्यही भएर निर्वाचनको समीक्षा गर्न बाँकी नै छ ।

तर, यो निर्वाचनबाट धेरै पाठ भने सिक्ने मौका पाएँ । अब जनताले चाहेको परिवर्तनलाई आत्मसात् गरेर काम गर्नुपर्छ । आगामी दिनमा जनताले चाहेको विकासकेन्द्रित हुन जरुरी छ ।

विजय जुलुस मनाउँदै गर्दा यो निर्वाचनमा कस्तो चुनौती व्यहोर्नुभयो ?

निर्वाचनमा एक त धेरै चुनौती नै हुन्छ । तर, योपटकको निर्वाचनमा धेरै जनतासँग घुलमिल भयाे । जनताले कस्तो समाज र विकास चाहेका छन्, त्यही समस्या हाम्रो लागि सिकाइ भयो ।

एकातिर एमाले र अर्कोतिर पाँचदलीय गठबन्धन थियो । त्यही भएर पनि धेरै कडा प्रतिस्पर्धा गर्नुपर्‍यो । योभन्दा ठूलो चुनौनी अरु के हुन सक्छ ? यहाँ उम्मेदवार भएर मात्र हुँदैन, जनताका समस्या पनि बुझ्नुपर्छ । अहिलेको निर्वाचनमा देखिएको सबैभन्दा ठूलो चुनौती नै यही हो ।

ताप्लेजुङका जनताले दोस्रोपटक सांसद बनाएर पठाए । कस्ता योजना बोकेर संसद् छिर्दै हुनुहुन्छ ?

जनताभन्दा ठूलो शक्ति राजनीतिमा अरु केही हुँदैन । त्यही भएर ताप्लेजुङका जनताले खोजेको विकास, शिक्षा, स्वास्थ्य, कृषि, व्यापार र पर्यटनलगायत क्षेत्रमा काम गर्नुपर्छ । यो मेरो मुख्य दायित्व हो ।

ताप्लेजुङका कतिपय स्थानीय तहमा अझै पनि सडक पुगेको छैन । यो समस्या ताप्लेजुङका जनता, राजनीतिक दल, स्थानीय तह र प्रदेश सरकार मिलेर गर्नुपर्छ । विकास भनेको गर्दै जाने हो । सबैको सहयोग आवश्यक छ ।

केन्द्रीय राजनीतिका बारेमा औँल्याउने बेला भएको छैन । अहिले नै सरकार कसको बन्छ भन्ने अवस्था छैन । अहिलेसम्मको मतपरिणाम हेर्दा सरकार यसकै बन्छ भनेर अनुमान गर्न सकिने अवस्था छैन ।

ताप्लेजुङ कृषि र पर्यटनमा धेरै सम्भावना बोकेको जिल्ला हो । आगामी दिनमा यही क्षेत्र सुधार्ने मेरो विशेष पहल हुनेछ । यो नै मेरो प्राथमिकता हो ।

यो निर्वाचनबाट कस्तो पाठ सिक्नुभयो ?

यो निर्वाचनबाट मैले मात्र होइन, सबै वाम अथवा कम्युनिस्टले धेरै कुरा सोच्नुपर्छ । सबै कम्युनिस्टलाई याे चुनावले पक्कै चेताएकाे हुनुपर्छ । अहिले मतदाताले त्यही सन्देश दिएका छन् । अब जनताले पार्टी भनेर मात्र भोट दिनेवाला छैन । त्यसमा राजनीतिक ध्रुवीकरण पनि प्रस्ट देखियो । त्यही भएर कम्युनिस्टले यो निर्वाचनबाट धेरै कुरा विश्लेषण गरेर अघि बढ्नुपर्ने अवस्था देखियो ।

अब जनताले विकास र आफ्नो समस्यामा काँध मिलाउन नेता खोज्दैछन् । त्यही भएर जनतासँग हातेमालो गर्नुपर्छ । युवा र नयाँ पुस्ताले विकास गर्ने पार्टीसँग नेता छान्न सक्छन् । यो विषयमा हामीले विशेष अध्ययन गर्नुपर्छ ।

एमाले सचिव भएका कारण अबको केन्द्रीय राजनीतिलाई कसरी हेर्नुभएको छ । अबको राष्ट्रिय समीकरण कस्तो होला ?

जनताले विकास र परिवर्तन आवश्यक भन्ने सन्देश यो निर्वाचनबाट प्रस्ट रूपमा दिएका छन् । यो हामीले बुझ्नुपर्छ । नत्र जनताको मनोभावनामा परिवर्तन आउने देखियो ।

केन्द्रीय राजनीतिका बारेमा औँल्याउने बेला भएको छैन । अहिले नै सरकार कसको बन्छ भन्ने अवस्था छैन । अहिलेसम्मको मतपरिणाम हेर्दा सरकार यसकै बन्छ भनेर अनुमान गर्न सकिने अवस्था छैन । त्यही भएर यो विषयमा म केही भन्दिनँ ।

एमालेका केन्द्रीय नेता त हारे नि ?

एमालेका मात्र होइन, मुख्य राजनीतिक दलका धेरै केन्द्रीय तथा शीर्ष नेताहरूले चुनाव हारेका छन् । यो सबैलाई थाहा छ । यो विषयमा अहिले यति मात्र बोलेँ ।

प्रकाशित मिति: बुधबार, मंसिर ७, २०७९ १८:०५