जनताले अब गलत प्रवृत्ति स्वीकार्दैनन्: गोकर्ण विष्ट

A+ A A-

गुल्मी–२ बाट नेकपा एमालेका सचिव गोकर्ण विष्ट प्रतिनिधिसभामा निर्वाचित भए । उनले सत्ता गठबन्धनको तर्फबाट उम्मेदवार बनेकी नेकपा एकीकृत समाजवादीकी सचिव रामकुमारी झाँक्रीलाई पराजित गर्दै प्रतिनिधिसभामा तेस्रोपटक सांसद बने । विष्ट गुल्मी–२ बाट २०७० र २०७४ मा पनि निर्वाचित भएका थिए । विष्टले झाँक्रीलाई २ हजार ३४ मतान्तरले पराजित गरेका हुन् । विष्टले २८ हजार ४७६ मत प्राप्त गर्दा निकटतम प्रतिद्वन्द्वी झाँक्रीले २६ हजार ४४२ मत ल्याइन् ।

चुनाव जितेलगत्तै शिलापत्रले गरेको कुराकानीकाे सम्पादित अ‌ंशः

निकै सकसका बीच तेस्राेपटक जित निकाल्नुभयाे हैन ?

जित्नु ठूलो कुरा भएन । जनता परिवर्तन र काम गर्ने नेतृत्वतिर ढल्किएको प्रस्ट भयो । जनताले विकास, रोजगारी, शिक्षा र स्वास्थ्यसँगै परिवर्तन आफ्नो निर्वाचनमा होस् भन्ने चाहना प्रस्ट राखेका छन् । अब हामीले यो कुरा निर्वाचनपछि मध्यनजरमा राखेर काम गर्नुपर्नेछ । अहिलेको निर्वाचनमा जनताले विकास र परिवर्तन खोजे । यो राजनीतिक तहमा धेरै राम्रो विषय पनि हो ।

आगामी पाँच वर्ष जनताले तपाईंसँग के अपेक्षा गर्ने ?

मलाई गुल्मीका जनताले धेरै संकटमा साथ दिएका छन् । त्यही भएर तेस्रोपटक मलाई जनताले सांसद हुने मौका दिए । म यो मौकाको दुरुपयोग गर्दिनँ । किन यहाँका जनताले मलाई साथ र अवसर दिएका छन् । मलाई मौका दिने जनताको चाहनाअनुसार काम गर्नेछु । म गुल्मीको प्रतिनिधि हुँ । तर, आफ्नो निर्वाचन क्षेत्रसँगै देशभर जनताले खोजेको विकासका लागि काम गर्छु ।

म एमालेको प्रतिनिधित्व गरेको उम्मेदवार मात्र होइन, पार्टी सचिव पनि हुँ । यो जित पनि एमालेकै हो । त्यही भएर मेरो जितलाई पार्टीको जित हो । किनकि एमालेले अहिले देशभर गठबन्धनको घेरा ताेडेर जितेको छ । यस्तो अवस्थामा पनि एमालेलाई साथ दिने जनताको मनोभावनामा ठेस पुर्‍याउनु हुँदैन । यो नै अहिले मुख्य विषय हो ।

एमालेका धेरै नेता हारिरहेका छन्, तपाईंकाे विश्लेषण के छ ?

सबै पार्टीका शीर्ष नेता हारेका छन् । एमालेका मात्र होइन, गठबन्धन गरेर निर्वाचनमा होमिएका पार्टीका शीर्ष नेतासमेत हारेका छन् । म अहिले आफ्नो निर्वाचन क्षेत्रमा व्यस्त भएका कारण यो विषयमा त्यति बुझ्न पाएको छैन ।

अबकाे एमाले रणनीति के हुन्छ भन्ने चासाेकाे विषय छ । सरकारकाे समीकरण के हुन सक्छ ?

यो पार्टीले निर्वाचनको मत परिमाण आएपछि छलफल गर्ने विषय हो । त्यही भएर अहिले नै यसो भन्न सक्ने अवस्था पनि छैन । किनकि मत परिणाम आउन बाँकी छ । मत परिणाम आएपछि देशको राजनीति परस्थिति हेरेर एमालेले निर्णय लिन्छ ।

यो निर्वाचनमा एमालेले सोचेजस्तो मतपरिणाम आयो ? एकीकृत समाजवादीको असर कस्तो पर्‍यो ?

यो तपाईंहरूले नै देख्नु र लेख्नुभएकै छ । योचाहिँ एमालेभन्दा पनि अन्य प्रतिद्वन्द्वी पार्टीले विश्लेषण गर्ने हो । नेकपा एसको प्रभाव सामान्य पर्‍यो । अहिलेलाई यति नै बुझौँ । जनताले दिएको जनमतलाई सबैले स्वीकार्नुपर्छ । यो लोकतन्त्र स्वीकारेका पार्टीको मर्म हो ।

प्रकाशित मिति: बुधबार, मंसिर ७, २०७९ १४:४८