दीपक मनाङेपछि प्रदेशसभामा उदाए अर्का विवादास्पद पृष्ठभूमिका मीनकृष्ण महर्जन

दीपक मनाङेपछि प्रदेशसभामा उदाए अर्का विवादास्पद पृष्ठभूमिका मीनकृष्ण महर्जन

A+ A A-

ललितपुर क्षेत्र नम्बर–१ बाट नेपाली कांग्रेसका नेता उदयशमशेर राणा विजयी भएका छन् । राणाले नेकपा एमालेका उम्मेदवार नवराज सिलवाललाई पराजित गरेका हुन् । यसअघि २०७४ को चुनावमा सिलवालले राणालाई ६ हजार मतको अन्तरले पराजित गरेका थिए । तर, योपटकको चुनावमा भने राणाले सिलवालसँग बदला लिए ।

राणाले २३ हजार ८९२ मत प्राप्त गरेर विजयी भएका हुन् । निकटतम प्रतिद्वन्द्वी सिलवालले १९ हजार २७८ मत मात्रै प्राप्त गरे । ललितपुर क्षेत्र नम्बर १ बाट राणाले मात्रै जितेनन् ।

सोही क्षेत्रको प्रदेश ‘ख’ बाट प्रदेश सदस्यका लागि उम्मेदवार बनेका मीनकृष्ण महर्जनसमेत विजयी भएका छन् । महर्जनले नेकपा एमालेका उम्मेदवार चेतनाथ सञ्जेललाई पराजित गरेका हुन् । महर्जनले १३ हजार ३७८ मत प्राप्त गरेका हुन् । उनका प्रतिस्पर्धी सञ्जेलले ९ हजार १६४ मतमात्रै प्राप्त गरे । महर्जन विवादास्पद छविका नेता हुन् । उनी राजनीतिमा आउनुअघि विभिन्न आपराधिक गतिविधिमा संलग्न रहेको प्रहरी रेकर्ड छ ।

आपराधिक कर्मकै कारण महर्जन ललितपुरमा चर्चामा आएका थिए । सोही कारण महर्जन गुण्डागर्दी गरेको अभियोगमा पटक–पटक पक्राउ पर्दै छुट्दै गरेका थिए । ठेक्कापट्टाको विषयमा विवाद हुँदा माघ २०७० मा महर्जनमाथि रामेछापका अर्का गुण्डा नाइके रमेश पौडेल उर्फ ‘रमेश बाहुन’ ले गोली नै प्रहार गरेका थिए । बाहुन हाल जेलजीवन भोगिरहेका छन् ।

धापाखेलस्थित महर्जनकै घर अगाडि मोटरसाइकलमा आएका बाहुन समूहका गुण्डाहरूले कुटपिटसमेत गरेका थिए । त्यो बेला महर्जन नेपाली कांग्रेसको भ्रातृ संगठन तरुण दलको राजनीतिमा सक्रिय थिए । राजनीतिकै आडमा उनले अपराधको धन्दा चलाएको आरोप छ ।

महर्जन कराँतेका खेलाडीसमेत हुन् । यसअघि मंसिर २०७८ मा भएको नेपाली कांग्रेसको १४औँ महाधिवेशनमा महर्जन ललितपुर–१ बाट महाधिवेशन प्रतिनिधिमा समेत विजयी भएका थिए । महर्जनले पूर्वप्रहरी नायब महानिरीक्षक (डीआईजी) गणेश केसीलाई पराजित गरेका थिए ।

अब भने महर्जनको परिचय फेरिएको छ । उनी प्रदेशसभा सदस्यको हैसियतमा उदायका छन् । अपराध यात्राका उनका समकालीन मनाङका राजीव गुरुङ उर्फ दीपक मनाङे भने यसअघि नै प्रदेशसभा सदस्यमा विजयी भएर गण्डकी प्रदेशको मन्त्रीसमेत भइसकेका छन् । यसपटकसमेत दीपक मनाङे मनाङ ‘ख’ बाट प्रदेशसभा सदस्यमा निर्विरोध विजयी भइसकेका छन् ।

महर्जनकै समकालीन काभ्रेका अर्का गुण्डा नाइके गणेश लामाले भने योपटक चुनावमा टिकट नै पाएनन् । नेपाली कांग्रेसका निर्वाचित केन्द्रीय सदस्यसमेत रहेका लामा २०७४ को चुनावमा भने लामा प्रदेशसभा सदस्यमा पराजित भएका थिए ।

काभ्रेकै अर्का विवादास्पद पृष्ठभूमिका जितेन्द्रमान तामाङ उर्फ दावा लामासमेत काभ्रेको भुम्लु गाउँपालिकाको उपाध्यक्षमा कांग्रेसबाट निर्वाचित भइसकेका छन् ।

२०७२ यता प्रहरीको इन्काउन्टरमा धादिङका दिनेश अधिकारी ‘चरी’, नुवाकोटका कुमार श्रेष्ठ ‘घैंटे’, रुपन्देहीका मनोज पुन र ओम आले मारिएपछि अपराध कर्ममा लागेकाहरूले मार्ग परिवर्तन गर्दै राजनीतिमा लागेका हुन् ।

रोचक कुरा त घैँटेको इन्काउन्टर हुँदा तत्कालीन अपराध महाशाखाका प्रमुख एसएसपीमा सर्वेन्द्र खनाल थिए । उनी काठमाडौं– ६ बाट एमालेको तर्फबाट प्रतिनिधिसभा उम्मेदवार छन् । पछिल्लो मत परिणामअनुसार उनी हार नजिक छन् ।

काठमाडौं– ७ का स्वतन्त्र पार्टीका शिशिर खनाल जित नजिक छन् । शिशिरले १२ हजार ७ सय ६५ मत प्राप्त गर्दा सर्वेन्द्रले ७ हजार ८ सय ८३ मत मात्रै प्राप्त गरेका छन् ।

प्रकाशित मिति: बुधबार, मंसिर ७, २०७९ १४:२८