देख्दा सानो देखिन्छु तर जनताले ठूलो जिम्मेवारी दिनुभयो: सोविता गौतम (अन्तर्वार्ता)

देख्दा सानो देखिन्छु तर जनताले ठूलो जिम्मेवारी दिनुभयो: सोविता गौतम (अन्तर्वार्ता)

A+ A A-

काठमाडौं क्षेत्र नम्बर २ मा राष्ट्रिय स्वतन्त्र पार्टीकी सोविता गौतम विजयी भइन् । उनले १५ हजार २ सय २९ मत ल्याएर जित हात पारेकी हुन् । उनका प्रतिद्वन्द्वी एमालेका मणिराम फुयालले ११ हजार ५ सय ५५ मत ल्याए । पूर्वसभामुखसमेत रहेकी माओवादी केन्द्रकी ओनसरी घर्ती मगरले ९ हजार ४ सय ४९ मत पाइन् । पुराना र ठूला भनिएका दलका उम्मेदवारलाई पराजित गर्दै सोविताले संसदको ढोका खोलेकी छिन् । २७ वर्षीया गौतम सम्भवत: प्रतिनिधिसभामा कान्छी सदस्य बन्नेछिन् । उनीसँग अधिवक्ता, पत्रकारिता र सामाजिक संघसंस्थामा रहेर काम गरेको अनुभव छ । छोटो समयमा उनी लोकप्रिय बनिन् । प्रतिनिधिसभा सदस्यमा निर्वाचित गौतमसँग शिलापत्रले गरेको संक्षिप्त कुराकानीः

पूर्वसभामुखलाई नै हराउनुभयो, यसमा के भन्नुहुन्छ ?

यो कसैको पनि हार होइन । म सोविता गौतमले जितेको होइन । जनताको जित भएको हो । मेरा प्रतिस्पर्धीहरूको पनि जित हो । पूर्वसभामुखदेखि अरु उम्मेदवारहरूले पनि मत पाउनु भएको छ । त्यो मतको पनि कदर र सम्मान गर्छु ।

छोटो समयमा कसरी मतदाताको मन र मत दुबै जित्नु सफल हुनुभयो ?

सबै नेपालीले परिवर्तन खोजेको अवस्था हो । र, मेरो इमानदारिता हो । आफ्नो भिजन प्रस्तुत गरेर अगाडि बढेको हुँ, यसैको परिणाम हो । देख्दा सानो देखिन्छु । तर, जनताले ठूलो जिम्मेवारी दिनुभएको छ । विश्वास र भरोसा गर्नुभएको छ । एक सक्षम र उपयुक्त व्यक्तिलाई सदनमा प्रतिनिधित्व गराउनु भएको छ ।

तपाईंका लागि याे अवसर कि चुनौती ?

यसलाई अवसरका रूपमा बुझिनु हुन्न । धेरै जिम्मेवारी थपिएको छ । गर्नुपर्ने काम धेरै छन् । त्यसैले अवसरभन्दा पनि चुनौतीका रूपमा बुझेको छु ।

अब संसदमा तपाईंको भूमिका कस्तो हुन्छ ?

आजसम्म सदनमा जति पनि निर्वाचत भएर गए, जनताको मुद्दा उठाइएन । अब पार्टीका तर्फबाट निर्णय गरेर जान्छौँ ।
मलाई विश्वास गरेर संसदमा पठाउनु भएको छ । काठमाडौं क्षेत्र नम्बर २ का मुद्दालाई पनि विशेष रूपमा उठाउने छु ।

सम्बन्धित समाचार

प्रकाशित मिति: बुधबार, मंसिर ७, २०७९ ०८:४७