विराजभक्तसँग अन्तर्वार्ता, ‘मान्छेको मन जित्यो भने बन्दुक बोक्नु नपर्ने रैछ’

विराजभक्तसँग अन्तर्वार्ता, ‘मान्छेको मन जित्यो भने बन्दुक बोक्नु नपर्ने रैछ’

A+ A A-

काठमाडौं क्षेत्र नम्बर ८ मा राष्ट्रिय स्वतन्त्र पार्टीका विराजभक्त श्रेष्ठ विजयी भएका छन् । उनले हाम्रो नेपाली पार्टीका सुमन सायमीलाई पराजित गरेका हुन् । उनले १० हजार १ सय ५ मत ल्याउँदा सायमीले ६ हजार १ सय ७४ मत ल्याए । ठूला भनिएका एमाले र नेकपा एसलगायतका उम्मेदवारलाई विराजभक्तले धेरै पछि पारे । नेकपा एसका जीवनराम श्रेष्ठले ४ हजार ८ सय ७७ र एमालेका शिवसुन्दर राज वैद्यले ३ हजार ८ सय ८६ मत ल्याए । साढे पाँच वर्ष मात्र भयो विराजभक्तले राजनीतिको पाइला चलेको । २०७४ को चुनावमा उनी बागमती प्रदेशको विवेकशील साझाबाट समानुपातिक सांसद बनेका थिए । अहिले उनी प्रतिनिधिसभाको सांसद बने । विजयी भएसँगै उनीसँग शिलापत्रले गरेको संक्षिप्त कुराकानी:

यो नतिजा अपेक्षित हो कि ?

अपेक्षितभन्दा पनि कोसिस हो । मैले पाँच वर्ष प्रदेशसभामा उठाएको नीतिगत विकास नै दिगो विकास हो भन्ने पुष्टि भएको छ । बेथिति र भ्रष्टाचारविरुद्ध जुन आवाज उठाए त्यसैको नतिजा हो ।

जित्छु भन्ने पहिले नै विश्वास थियो ?

अब नतिजाप्रति विश्वासभन्दा पनि हामीले गर्नुपर्ने काम धेरै छ । एक जनाले गर्न सकिने पनि होइन, एक जनाले परिवर्तन गर्न सकिँदैन । तर, संसद भनेको जनआवाज राख्ने औपचारिक फोरम हो । नागरिकको सुख दुःखको कुरा राख्ने र जागरण ल्याउने हो । यसका लागि प्रयास मात्र गरेको हो ।

ठूला भनिएका दलका उम्मेदवारहरूलाई पराजित गर्नुभयो, जित्न कतिको कठिन रहेछ ?

हेर्नुस्, मान्छेको मन जित्यो भने बन्दुक बोक्नु नपर्ने रहेछ । सडकमा ढुंगामुढा टायर बाल्नु नपर्ने रहेछ । ठूलो हृदय भएको नागरिक रहेछन् । जनताले कलिलो उमेरमा ठूलो जिम्मेवारी दिनुभएको छ ।

जितको आधार के हो ?

मतदाताले हेर्ने भनेको इमान हो । मैले प्रदेशसभामा हुँदा देशभरका सांस्कृतिक, प्राकृतिक सम्पदा संरक्षणको साझा मुद्दा बनाए । गुठी विधेयकविरुद्धको आन्दोलनमा भूमिका निभए । प्रदेशमा नेपाल भाषा र तामाङ भाषा अनुमोदन गराउन संघर्ष गरे । युवाहरूको मुद्दा संसदीय समितिमा राखेको थिएँ । र, अहिलेको चुनावमा देशभरबाट हाम्रो पुस्ताको प्रतिनिधित्व गर्नुपर्छ भनेर युवाहरूले जोड गर्नुभयो । साढे ५ वर्ष भयो राजनीतिमा आएको । यो अवधिमा पार्टी र नागरिकप्रति उत्तरदायी भएर काम गरेको छु । समानुपातिक सांसद भएर जुन भूमिका बहन गरे त्यही नै जितको आधार हो ।

पुराना र ठूला भनिएको पार्टीहरूप्रति युवाहरूको वितृष्ण र ‘फ्रस्टेसन’को मतलाई क्याच गर्नुभएको हो ?

हामी राजनीतिमा आउनु परेको उहाँहरूकै अकर्मण्यताले हो । यदी उहाँहरूले राम्रो गरेको भए हामी व्यापार व्यवसाय गरेर बस्ने थियौँ । भूकम्प, बाढी, पहिरो, डेंगी, कोभिड महामारीमा सरकार देखिएन । नागरिकले सुख दुःखमा सरकारको साथ खोजेको हुन्छ । र, २१ शताब्दीका नागरिकले के चाहेका छन् ? सरकारले कहिल्यै सोचेन । यो त्यसैको मत हो ।

तपाईंको अबको मुख्य प्राथमिकता के छ ?

अबको प्राथमिकता भनेको क्षेत्र नम्बर ८ का मतदाताप्रति उत्तरदायी हुने हो । स्वास्थ्य र शिक्षाका कार्यक्रम ल्याउनु पर्ने छ । खुला क्षेत्रहरू बनाउनु पर्नेछ । सुशासनका विषयलाई मुख्य प्राथमिकतामा राखेको छु ।

कतै तपाईंबाट पनि घात त हुने होइन ?

मेरो ठूला–ठूला प्रतिबद्धता छैन, सानो–सानो छ । जनताको सुख दुःखमासँगै हुनेछु । बोलेको कुराबाट पछि हट्ने छैन । झुटो आश्वासन दिने छैन । मतदाताको एकएक मतलाई सम्मान गर्दै इमानदार भएर काम गर्नेछु ।

प्रतिस्पर्धीहरूलाई केही भन्नु छ ?

चुनावमा हार जित हुन्छ, स्वाभाविक हो । यो एउटा प्रक्रिया मात्र हो । उहाँहरूलाई पनि सम्बोधन गरेर अगाडि बढ्ने छु । एक्लैले सम्भव छैन, उहाँहरूको साथ सहयोगमै अगाडि बढ्ने हो ।

प्रकाशित मिति: बुधबार, मंसिर ७, २०७९ ०६:४०