यसरी बनाइएको थियो अमेरिका लैजान नक्कली शरणार्थी, शंकाको घेरामा गृहका कर्मचारीदेखि नेतासम्म

यसरी बनाइएको थियो अमेरिका लैजान नक्कली शरणार्थी, शंकाको घेरामा गृहका कर्मचारीदेखि नेतासम्म

A+ A A-

भुटानी शरणार्थीको नाममा परिचयपत्र बनाएर नेपालीलाई अमेरिका पठाउने भन्दै ठगी गर्ने तीन जना पक्राउ परेका छन् । प्रहरीको उपत्यका अपराध अनुसन्धान कार्यालयले उनीहरूलाई पक्राउ गरेको हो ।

पक्राउ पर्नेमा मोरङ पथरीका केशवप्रसाद दुलाल, ललितपुर महालक्ष्मी-४ का सानु भण्डारी र पाँचथर फिदिमका टंककुमार गुरुङ छन् । प्रहरीका अनुसार उनीहरूले सयौँ नेपालीलाई शरणार्थीको परिचयपत्र बनाएर अमेरिका पठाउने भन्दै ठूलो रकम उठाएर ठगी गरेको खुलेको छ ।

रकम ठगेर सम्पर्कविहीन भएपछि पीडित प्रहरीमा पुगेका हुन् । हालसम्म उपत्यका अपराध अनुसन्धान कार्यालयमा ८१ जनाले आफू ठगिएको निवेदन दिएका छन् । पक्राउ परेका दुलालसहितको समूहले १३ करोड ६३ लाख रुपैयाँ लिएको खुलेको छ । प्रहरी कार्यालय पुग्नेमा केही भुटानी शरणार्थीसमेत छन् ।

यसरी नक्कली शरणार्थीको परिचयपत्र बनाएर अमेरिका पठाउने गिरोहका केही अझै फरार छन् । प्रहरी स्रोतका अनुसार यसरी गिरोह सक्रिय बनाउने मुख्य भूमिकामा मोरङ पथरीका केशवप्रसाद दुलाल भएको खुलेको छ । त्यस्तै, उनीबाहेक रकम असुली गिरोहका अर्का मुख्य भूमिका दाङका सन्देश पोखरेल शर्मासमेत छन् । तर, सन्देशलाई प्रहरीले अझै पक्राउ गर्न सकेको छैन ।

कर्मचारीदेखि नेताको भूमिका नै शंकास्पद

भुटानी शरणार्थीको नाममा परिचयपत्र बनाएर ठगी गर्ने गिरोहमा गृह मन्त्रायलका केही कर्मचारीदेखि नेताहरूकै भूमिकासमेत शंकास्पद देखिएको प्रहरीले जनाएको छ । ठगी गर्ने गिरोहले भुटानी शरणार्थीसम्बन्धी समस्याको स्थायी समाधान पहिल्याउन सरकारी कार्यदलले तयार पारेको प्रतिवेदनमा नक्कली अनुसूची घुसाउँदै ठगी गरेको खुलेपछि कर्मचारीसमेत शंकाको घेरामा परेका छन् ।

उक्त प्रतिवेदन गृह मन्त्रालयका पूर्वसहसचिव बालकृष्ण पन्थीको संयोजकत्वमा विज्ञ सदस्यका रूपमा गणेशबहादुर केसी र सदस्य-सचिवका रूपमा शाखा अधिकृत दीपकप्रसाद न्यौपानेको टोलीले प्रतिवेदन तयार पारेको थियो । उक्त प्रतिवेदन अझै सार्वजनिक भने गरिएको छैन ।

तर, गिरोहका सदस्यहरूले राजनीतिक पहुँच र गृह मन्त्रालयकै कर्मचारीको मिलेमतोमा प्रतिवेदनमा नक्कली अनुसूची राखेर ठगी धन्दा सुरु गरेका हुन् । प्रहरी स्रोतका अनुसार पूर्वगृहमन्त्री रामबहादुर थापाको सचिवालयमा काम गरेका व्यक्तिहरूमाथि समेत प्रहरीले निगरानी बढाएको छ ।

अनुसन्धानमा खटिएका एक प्रहरी अधिकारीले भने, ‘आशंका गर्ने ठाउँहरू त छन् तर, अब प्रमाणले कता पुर्‍याउँछ, त्यसका आधारमा मुद्दा अगाडि बढ्ला ।’ पूर्वगृहमन्त्रीका सुरक्षा सल्लाहकार इन्द्रजित राईलाई समेत प्रभावमा पारेको हुन सक्ने आशंका प्रहरीको छ । पक्राउ परेका गिरोहका नाइके केशव दुलाल कांग्रेस नेतृ सुजाता कोइराला उपप्रधानमन्त्री भएका बेला उनका निजी सहायकसमेत बसेका व्यक्ति हुन् ।

त्यस्तै, हाल फरार रहेका दाङका सन्देश पोखरेल पूर्वगृहमन्त्री रामबहादुर थापाका पुत्र प्रतीक थापाका मिल्ने साथी हुन् । सन्देशले त्यही सम्बन्धका कारण गृह मन्त्रालयसम्म पहुँच पुर्‍याएर ठगी धन्दा चलाएको आशंका प्रहरीको छ । उनीहरूले प्रतिव्यक्ति १० देखि ५० लाखसम्म रकम असुल गरेर ठगी गरेको खुलेको छ ।

सन्देश यसअघि बलात्कार आराेपमा समेत पक्राउ परेका थिए । यसरी ठगी गरेको रकमले फरार रहेका शर्मा र टंककुमार गुरुङले झम्सिखेलको एक रेस्टुरेन्टमा समेत लगानी गरेको आशंका प्रहरीको छ । अपराध अनुसन्धान कार्यालयका एसपी सोमेन्द्र राठौरका अनुसार उनीहरूले कहिले छुट दर्तामा नाम हाल्ने, कहिले फोटो खिच्ने र कहिले मेडिकल गर्ने भन्दै किस्ता-किस्तामा रकम उठाएको खुलेको छ ।

उनीहरूले कास्की, चितवन, दाङ, सल्यानका अधिकांश युवायुवतीलाई ठगेको खुलेको छ । पूर्वी नेपालमा रहेका शिविरका झण्डै १ लाख १५ हजार भुटानी शरणार्थी तेस्रो देशमा बसोबासका लागि गइसकेपछि ‘दिगो समाधान खोज्न’ भन्दै गृह मन्त्रालयले विभिन्न कार्यदल, समिति र अध्ययन टोली बनाउँदै आएको छ ।

प्रकाशित मिति: सोमबार, चैत १३, २०७९ १७:२५