योगेश बोल्दै थिए, माधव रुन थाले, के थियाे कारण ?

A+ A A-

संस्कृति, पर्यटन तथा नागरिक उड्डयनमन्त्रीमा गत साता नियुक्त भएका योगेश भट्टराईले अन्तर्राष्ट्रिय श्रम सम्बन्ध समितिको बैठकमा २०४३ सालमा आफू बिरामी भएको प्रसंग कोट्याएर समिति सदस्य तथा पूर्वप्रधानमन्त्री माधवकुमार नेपाललाई भावुक बनाएका छन् ।

समितिले विषयगत मन्त्रीको रुपमा भट्टराईलाई स्वागतका लागि आयोजना गरेको बैठकमा बोल्ने क्रममा नवनियुक्त मन्त्री भट्टराईले आफू मात्र भावुक भएनन् नेता नेपाललाई रुनेसम्मको अवस्थामा पुर्‍याए ।

मन्त्री भट्टराईले २०४३ सालमा पार्टीले पञ्चायतलाई समेत उपयोग गर्ने नीतिअनुसार काठमाडौं नगरपञ्चायतको निर्वाचनमा जनपक्षीय उम्मेदवारको पक्षमा माहोल बनाउने जिम्मेवारी पाएको र बिरामी भएर ६० दिनसम्म अस्पतालमा बसेको स्मरण गर्दा नेपालको स्पर्श आफ्ना लागि जीवनदान भएको बताए ।

उनले टिचिङका डाक्टरले माया मारेको अवस्थामा वरिष्ठ नेता नेपालको एक स्पर्शले जीउन उत्साह थपिएको बताए । उनले नेपाल र आफूबीच गुरु र चेलाको सम्बन्ध भएको बताएपछि नेता नेपाल पनि भावुक बनेका थिए ।

समिति बैठकमा वरिष्ठ नेताको हैसियतले मन्तव्य राख्ने क्रममा नेपालले भट्टराईलाई कुशलतापूर्वक जिम्मेवारी वहन गर्न सुझाएका थिए । नेपालले बोलेलगत्तै बोलेका मन्त्रीले नेपालप्रति श्रद्धा व्यक्त गर्दै उनलाई मार्गनिर्देशक समेत भनेका थिए ।

‘नेता नेपालको स्पर्शले मेलाई जिउने ऊर्जा प्राप्त भयो’ भन्नासाथ नेता नेपालले घोप्टिएर आँसु लुकाउने प्रयास गरेका थिए । त्यतिबेला मन्त्री भट्टराईको गला नै अवरुद्ध भयो ।

पूर्वप्रधानमन्त्री र नवनियुक्त मन्त्रीले भावुकतासँगै आँसु झारेपछि समिति सभापतिसमेत रहेकी एमाले नेतृ पवित्रा खरेल निरौलालाई पनि भावुक बनायो । भावुकता र सन्नाटालाई चिर्न मन्त्री भट्टराईले समिति सदस्य अग्निप्रसाद सापकोटासँगै आफू २०४६ सालमा चौतारा जेलमा बसेको बताएका थिए ।

हत्तपत्त आँसु नखसाल्ने नेता नेपालले आइबारको समिति बैठकमा आँसु झार्नुको पछि भावना जोडिएको हुन सक्छ । तत्कालीन नेकपा एमालेको महासचिव हुँदा योगेशले शक्तिशाली विद्यार्थी संगठन अनेरास्ववियूको अध्यक्ष हुने अवसर पाएका थिए ।

आफूले धेरै विश्वास गरेका कार्यकर्ता योगेश २०५४ सालमा तत्कालीन नेकपा एमालेबाट अलग भएर वामदेव गौतमले नेकपा माले गठन गर्दा मालेकै नेता भएका थिए ।

पार्टीको आठौ महाधिवेशनमा झलनाथ खनालसँगै लागेका योगेश हाल पार्टी अध्यक्ष केपी ओली निकट भएर मन्त्री बने पनि आफूलाई गुरु र नेता मानेकोमा नेपालको भावना पग्लिएर आँसु झारेको हुन सक्छ ।

प्रकाशित मिति: सोमबार, साउन २०, २०७६ ०५:२७