भारतीय दूतावासकाे पत्र प्रधानमन्त्रीलाई नदिएर गल्ती भयाे : कृषिमन्त्री

A+ A A-

कृषि तथा पशुपन्छी विकासमन्त्री चक्रपाणि खनालले विषादी परीक्षणबारे भारतीय दूतावासले पठाएको पत्र प्रधानमन्त्री केपी शर्मा ओलीलाई समयमा नदिएर गल्ती गरिएको स्वीकार गरेका छन् ।

मन्त्री खनालले प्रधानमन्त्री ओलीले २१ जेठमा सो विषयमा बाेले पनि आफूहरूले दुई दिनपछि मात्रै भारतीय दूतावासको पत्र दिनु गल्ती भएको स्वीकार गरेका हुन् ।

आइतबार संघीय संसद्को कृषि, सहकारी तथा प्राकृतिक स्रोत समितिको बैठकमा सांसदले राखेका जिज्ञासाको जवाफ दिने क्रममा उनले प्रधानमन्त्री ओलीले बोल्नुअघि नै सो पत्र नदिएर आफूले नेतृत्व लिएको मन्त्रालयले गल्ती गरेको बताए ।

प्रधानमन्त्री ओलीले सो सम्बन्धमा भारतबाट कुनै दबाब नआएको सार्वजनिक अभिव्यक्ति दिएका थिए । ‘हाम्रो कमजोरी के भयो भने त्यस पत्रबारे प्रधानमन्त्री ओलीले २१ गते बोल्नुभयाे । त्यो पत्र हामीले २३ गते मात्रै हात पारियो, मन्त्री खनालको स्वीकारोक्ति थियो, ‘हाम्रो कमजोरी यही हो, यो हाम्रो मन्त्रालयको जिम्मेवार निकायको कमजारी हो ।’

मन्त्री खनालले भारतबाट आयातित विषादी परीक्षण तत्कालका लागि रोक्ने निर्णयमा भने आफ्नो मन्त्रालयको कुनै हात नरहेको उनले दाेहाेर्‍याए ।

यो विषय उद्योग, वाणिज्य तथा आपूर्ति मन्त्रालयसँग सम्बन्धित भएकाले विषादी परीक्षणसम्बन्धी निर्णयमा आफ्नो मन्त्रालयको कुनै हात नरहेको उनकाे स्पष्टीकरण थियो । मन्त्री खनालले आयातित तरकारीमा विषादि परीक्षणको काम जारी रहेको त्यसलाई रोक्ने पक्षमा सरकार नरहेको पनि स्पष्ट पारे ।

बैठकमा समितिका सदस्यले सो प्रकरणमा उद्योग, वाणिज्य तथा आपूर्ति मन्त्रालय र कृषि तथा पशुपन्छी मन्त्रालयबीच लज्जास्पद ढंगले विवाद भएको बताए । समितिका सदस्य दलबहादुर रानाले दुई मन्त्रालयबीच विषादी परीक्षणबारे भएको सार्वजनिक विवादले लज्जाबोध गराएको भन्दै त्यसबारे यथार्थ जानकारी गराउन मन्त्री खनाललाई सचेत गराए ।

समितिका सदस्यले सरकारले विषादी परीक्षणको कामलाई गम्भीरतापूर्वक नलिएको भन्दै आक्रोश पनि व्यक्त गरेका थिए ।

प्रकाशित मिति: सोमबार, साउन २०, २०७६ ०२:३५