एमाले मकवानपुरकाे कार्यालयमा कमल थापाकाे 'इन्ट्री'

A+ A A-

राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापा एमाले मकवानपुरकाे पार्टी कार्यालयमा छिरेका छन् । आगामी ४ मंसिरमा हुने प्रतिनिधिसभा निर्वाचन लड्ने तयारीमा रहेका थापा आज एमाले मकवानपुरकाे पार्टी अफिसमा पसेका हुन् । दसैँ, नेपाल सम्वत, दिपावली, छठ पर्वकाे अवसरमा पार्टी कार्यालयमा आयाेजित शुभकामना आदानप्रदान कार्यक्रममा थापा उपस्थित भए ।

थापालाई कार्यक्रममा एमाले मकवानपुरले निमन्त्रणा गरेकाे राप्रपा नेपालका महामन्त्री राजाराम बर्ताैलाले जानकारी दिए । थापासँगै राप्रपा नेपालका नेताहरू पनि कार्यक्रममा सहभागी थिए । थापाका लागि एमाले मकवानपुर प्रमुख प्रतिस्पर्धी पार्टी हाे । उनले मकवानपुर क्षेत्र नम्बर १ बाट जति पटक पराजय भाेगेका छन्, ती सबैमा एमालेका उम्मेद्वार हाबी थिए । एउटै क्षेत्रबाट निरन्तर चुनाव लड्दै आएका थापा एमालेका कृष्णप्रसाद दाहालसँग मात्रै ३ पटक पराजित भइसके । २०७४ काे प्रतिनिधिसभा निर्वाचनमा नेपाली कांग्रेससँग मिलेर चुनाव लडेका थापाले वाम गठबन्धन (एमाले-माओवादी केन्द्र)का साझा उम्मेदवार उनै दाहालसँग ५ हजार मतान्तरले हार व्यहाेरेका थिए ।

१ नम्बर क्षेत्रमा एमालेबाट उम्मेदवारीका लागि सिफारिस भएकाहरूमध्ये कसले टिकट पाउला भन्ने चासाेका बीच थापाकाे इन्ट्रीले मकवानपुरका एमालेजन तरङ्गित भएका छन् । एमालेबाट प्रतिनिधिसभाका लागि मकवानपुर क्षेत्र नम्बर १ बाट पार्टी केन्द्रीय सदस्य तथा जिल्ला इञ्चार्ज रामेश्वर राना, युवानेता मदन दाहाललगायतकाे नाम सिफारिस भएकाे छ ।

एमालेकाे समर्थनमा मकवानपुर- १ बाट चुनाव लड्ने थापाकाे तयारी छ । उनलाई एमाले अध्यक्ष केपी ओलीले निर्वाचनकाे तयारी गर्न 'ग्रीन सिग्नल' दिइसकेकाे बताइन्छ । केही समयअघि एमाले मकवानपुरका नेताहरू अध्यक्ष ओलीलाई भेट्न पुगेका बेला उनले थापालाई गुन तिर्नुपर्ने बेला आएकाे भन्दै सहयाेग गर्न भनेका थिए ।

प्रकाशित मिति: बिहीबार, असोज १३, २०७९ १०:०३