न्युजिल्यान्डबाट विश्वकप उपाधि खोसेका स्टोक्स ‘न्युजिल्यान्डर अफ द इयरको’ मनोनयनमा !

न्युजिल्यान्डबाट विश्वकप उपाधि खोसेका स्टोक्स ‘न्युजिल्यान्डर अफ द इयरको’ मनोनयनमा !

A+ A A-

क्रिकेट विश्वकपको फाइनलमा न्युजिल्यान्डविरुद्ध नटआउट ८५ रन बनाउँदै इंग्ल्यान्डलाई च्याम्पियन बनाएका बेन स्टोक्स ‘न्युजिल्यान्डर अफ द इयर’को प्रारम्भिक मनोनयनमा परेका छन् । ‘न्युजिल्यान्डर अफ द इयर’ हरेक वर्ष आफ्नो क्षेत्रमा उल्लेखनीय योगदान पु-याउँदै विश्वमा न्युजिल्यान्डको छवि सुधार्न महत्वपूर्ण भूमिका खेल्ने नागरिकलाई दिइन्छ ।

तर, स्टोक्सले भने निर्धारित ५० ओभरका साथै सुपर ओभरमा पनि उत्कृष्ट ब्याटिङ गर्दै न्युजिल्यान्डले जितिसकेको विश्वकप खोसेर इंग्ल्यान्डलाई च्याम्पियन बनाएका थिए । तर, तिनै स्टोक्स न्युजिल्यान्डका कप्तान केन विलियमसनसँगै सो अवार्डका लागि मनोनयनमा परेका हुन् ।

‘न्युजिल्यान्डर अफ द इयर’को आधिकारिक मनोनयन सार्वजनिक भइसकेको छैन । तर, सो अवार्ड समारोहका मुख्य निर्णायक क्यामरुन बेनेटले भने स्टोक्स प्रारम्भिक मनोनयनमा परेको खुलासा गरेका छन् ।

इंग्ल्यान्डको विश्वकप टिमका आधा खेलाडी अन्य देशबाट आएका आप्रवासी थिए । त्यसमध्ये फाइनलका नायक स्टोक्स न्युजिल्यान्डको क्राइस्ट चर्चमा जन्मिएका थिए । तर, सानोछँदै उनी इंग्ल्यान्डमा बसोबास गर्न थाले र त्यहीँबाट क्रिकेट खेल्न सुरु गरे ।

‘स्टोक्सले न्युजिल्यान्डको राष्ट्रिय टिमबाट क्रिकेट नखेले पनि उनी यहीँ क्राइस्ट चर्चमा जन्मिएका हुन् । उनको परिवार अझैसम्म त्यहीँ बस्छ । उनी न्युजिल्यान्डकै हुन् भन्ने मान्छेहरुको कमी छैन । त्यसैले उनको मनोनयन त्यति धेरै आश्चर्यजनक हो जस्तो मलाई लाग्दैन’, क्यामरुनले न्युजिल्यान्डको न्युजपोर्टल स्टफ लिमिटेडलाई भनेका छन् ।

यस्तै, मनोनयनमा परेका किवि कप्तामन केन विलियमसनले फाइनलमा देखाएको संयम र परिपक्वताले उनलाई ‘न्युजिल्यान्डर अफ द इयर’का साथै अन्य धेरै अन्तर्राष्ट्रिय अवार्डमा मनोनयनमा पारेको छ । फाइनलमात्र होइन विश्वकपभर संयमताका साथ असल कप्तानमा हुनुपर्ने गुण देखाएका विलियमसनले अहिले सबैको वाहवाही पाइरहेका छन् ।

‘विलियमसनले जसरी फाइनलको निराशाजनक क्षणमा आफुलाई प्रस्तुत गरे त्यो वास्तवमै अनुकरणीय थियो । प्रतियोगिताभर विलियमसनले देखाएको व्यक्तित्व हामी न्युजिल्यान्डवासीको विशेषता हो । साहस, अनुशासन र विनम्रताका लागि हामी परिचित छौं । उनले विश्वमाझ त्यो फेरि साबित गरिदिएका छन्’, क्यामरुनले स्टफलाई बताएका छन् ।

फेब्रुअरी २०२० मा दिइने सो अवार्डको आधिकारिक मनोनयनको अन्तिम सूचि डिसेम्बरमा सार्वजनिक गरिन्छ । हाल १५ वर्षमाथिका न्यूजिल्यान्डवासीका लागि मनोनयन दर्ता खुला गरिएको छ । यसअघि सो प्रतिष्ठित अवार्ड पाउने खेलाडीमा रिचि म्याक्क थिए । उनले २०१६ मा सो अवार्ड जितेका थिए ।

प्रकाशित मिति: शनिबार, साउन ४, २०७६ ०५:३९