प्रदेश २ मा बाढी र डुबान : मृत्यु भएका ३५ जनामा अधिकांश बालबालिका

A+ A A-

प्रदेश २ मा बाढी र डुबानमा परी मृत्यु भएका ३५ जनामध्ये २१ बालबालिका छन् । सबैभन्दा बढी महोत्तरीमा ६ जना बालकले बाढीमा परी ज्यान गुमाएको नेपाल प्रहरीको जनकपुरधामस्थित प्रदेश २ को कार्यालयले जनाएको छ । त्यसैगरी, पर्सामा मृत्यु भएका चार जनामध्ये ३ बालक, बारामा मृत्यु भएका २ मध्ये १ बालक, १ नाबालक, रौतहटमा ४, धनुषामा मृत्यु भएका ५ मध्ये १ बालक, सिरहामा मृत्यु भएका ६ मध्ये २ बालिका र ३ बालक छन्।

महोत्तरीको भंगहा नगरपालिका वडा नं. ४ स्थित रातो नदी किनारमा ६ देखि ७ महिनाको बालकको शव आइतबार बिहान फेला परेको थियो । पहिचान नखुलेको उक्त शव पोस्टमार्टमका लागि अञ्चल अस्पताल जनकपुरमा राखिएको छ ।

आइतबार बिहान बाढीले जलेश्वर नगरपालिका वडा नं. ८ बजराहीको कल्भर्टमा स्थानीय १२ वर्षीय प्रशान्त ठाकुर र १३ वर्षीय युवराज ठाकुरलाई बगाएकोमा सोमबार प्रशान्तको शव प्रहरीले फेला पारेको हो । त्यस्तै, सोनमा गाउँपालिका वडा नं. १ मा समेत सोमबार दुई बालकको बाढीमा डुबेर मृत्यु भएको थियो । स्थानीय खुदादिन अन्सारीका १० वर्षीय छोरा नजिरुद्दिन अन्सारी र सोही ठाउँका इस्लाम नदाफको छोरा ८ वर्षीय इम्तियाज नदाफको शव प्रहरीले फेला पारेको थियो । धनुषाको गणेशमान चारनाथ नगरपालिका-६ कमला नदीको किनारमा १८–१९ महिनाको बालकको शव फेला परेको थियो ।

पहिचान नखुलेको सो बालकको पोस्टमार्टमका लागि जनकपुर अञ्चल अस्पतालमा राखिएको छ । सर्लाहीको कौडेना गाउँपालिका गफार खानको छोरा २ वर्षीय ऐयान खानको घर नजिकको खाल्डोमा डुबेर मृत्यु भएको छ ।

गत सोमबार रौतहटको विन्दावन नगरपालिका-४ का वीरेन्द्र रामका ८ वर्षीय छोरा रवि रामको बाढीले ज्यान लियो । उनी घरनजिकै बाटोको छेउमा जमेको पानीमा डुबेका थिए । प्रहरी र स्थानीयको सहयोगमा उनलाई उद्धार गरी उपचारका लागि गरुडा अस्पतालमा ल्याउँदा बाटोमै मृत्यु भएको थियो ।

खाल्टोमा जमेको पानीमा डुबेर बाराका १० वर्षीय अजित साहले आइतबार ज्यान गुमाए । बाराकै परवानीपुर गाउँपालिका-१ का १८ महिने विकी यादवको घर पछाडिकै नालीमा डुबेर मृत्यु भयो ।

वर्षा याममा असारे विकासको क्रममा गाउँघरमा खनिएका खाल्टा, निर्माणाधीन नाला र ससानो खोल्साका कारण बालबालिकाको ज्यान जोखिममा परेको हो ।

अभिभावक पनि सचेत नहुँदा बालबालिका वर्षा याममा हुने दुर्घटना बढ्ने गरेको धनुषाका प्रमुख जिल्ला अधिकारी प्रदीपराज कँडेलले बताए । वर्षा याममा बालबालिकालाई खोलामा नुहाउन जान दिने र सोही बेला बाढीको भेल आएर बगाउने घटनाबाट अभिभावक सचेत हुनु आवश्यक रहेको उनकाे भनाइ छ ।

प्रकाशित मिति: शनिबार, साउन ४, २०७६ ०४:१३