हराएका मोबाइल खोज्न प्रहरीले बनायो बेग्लै युनिट

A+ A A-

केही दिनअघि त्रिभुवन विश्वविद्यालय कीर्तिपुरमा स्नातकोत्तरमा अध्ययनरत राममाया शाहीको मोबाइल चोरी भयो । कीर्तिपुर गेटबाट सार्वजनिक यातायात चढेकी शाहीको २० हजार मूल्य पर्ने मोबाइल उनी लगनखेल बसपार्क पुग्दा नपुग्दै हराइसकेको थियो ।

मोबाइल हराएपछि उनले महानगरीय प्रहरी परिसर जावलाखेलमा निवेदन दिएकी छन् ।

तीन महिनाअघि बालाजुबाट हरकसिंह धामीको मोबाइल हरायो । उनले हराएको मोबाइल खोजिदिन काठमाडौं प्रहरी परिसर र महानगरीय अपराध महाशाखामा निवेदन दिए ।

राजधानीमा मोबाइल हराउने यी दुई प्रतिनिधि पात्र मात्र हुन् । हातहातमा हुने मोबाइल फोन व्यक्तिका अभिन्न अंगझैं भएको छ । तर, सतर्कता नअपनाउँदा मोबाइल हराएर आर्थिक क्षति मात्र होइन, त्यसमा राखिएका उपयोगी सामग्रीसमेत नष्ट हुने गरेका छन् ।

काठमाडौं उपत्यकामा मात्र दैनिक सयभन्दा बढी मोबाइल हराउने गरेको तथ्यांक प्रहरी कार्यालयसँग छ । त्यसमध्ये कति चोरी भएका हुन्छन् भने कति आफैंले सतर्कता नअपनाएर हराउँछन् ।

ललितपुर, काठमाडौं र भक्तपुर प्रहरीले मोबाइल खोज्न छुट्टै युनिट नै राखेको छ । काठमाडौं प्रहरी परिसर टेकुमा गत आर्थिक वर्षमा ११ हजार थान मोबाइल हराएको निवेदन परेको थियो ।

यसरी खोज्छन् प्रहरी ?

मोबाइल हराएको निवेदन दिएको १५ दिनपछि प्रहरीले निवेदकलाई सम्पर्क गर्न बोलाउने गरेको छ ।

काठमाडौं प्रहरी परिसरका प्रहरी नायब उपरीक्षक (डीएसपी) होविन्द्र बोगटीका अनुसार प्रहरीले अदालतको अनुमतिमा कुन कम्पनीको सिम प्रयोग भएको छ, त्यसको आधारमा लोकेसन हेरेर वा आईएमईआई नम्बरबाट ट्र्याकिङ गरी हराएको सेटको खोजी गर्ने गरेको छ ।

‘आईएमईआई नम्बरबाट ट्र्याकिङ गर्दा हराएको मोबाइलमा उनीहरू (मोबाइल चोर्न वा भेट्टाउने)ले नयाँ नम्बर राखेमा पत्ता लाग्छ,’ बोगटी भन्छन् ।

हराएको मोबाइलमा सिम प्रयोग नभए मोबाइल नभेटिने उनको भनाइ छ । हराएको मोबाइल खोजिदिन अनुरोध गर्दै निवेदन दिँदा मोबाइलको आईएमईआई नम्बर अनिवार्य चाहिन्छ ।

प्रत्येक मोबाइल सेटको आईएमईआई नम्बर फरक फरक हुन्छ । आईएमईआई भनेको इन्टरनेसनल मोबाइल इक्विपमेन्ट आइडेन्टिटी हो । आईएमईआई नम्बर १५ वा १७ अंकको हुन्छ ।

यो विशेष गरी मोबाइलको पछाडिको भागमा अर्थात् ब्याट्री राख्ने ठाउँको मुनि लेखिएको हुन्छ । त्यस्तै, मोबाइलमा *#06# डायल गरेर पनि आफ्नो आईएमईआई नम्बर पत्ता लगाउन सकिन्छ ।

कति भेटिन्छन् ?

दैनिक सरदर सय वटा मोबाइल हराएको निवेदन परे पनि प्रहरीले दैनिक १५ देखि २० वटा मोबाइल मात्र भेट्ने गरेको काठमाडौं प्रहरी परिसरका डीएसपी बोगटीको भनाइ छ ।

कतिपयले प्रहरीले खोज्ने गरेको थाहा पाएपछि भेटेको मोबाइलमा सिम नै नराख्ने र राखे पनि महिनौंपछि मात्र राख्ने हुँदा हराएको भन्दा कम भेटिने बोगटीले बताए । कतिपय चोरीका मोबाइल भने नेपालमा प्रयोग नगरी भारततिर बेच्ने भएकाले पनि हराएका मोबाइल नभेटिने प्रहरीको भनाइ छ ।

प्रकाशित मिति: शुक्रबार, साउन ३, २०७६ ०१:१६