सवारी दुर्घटनामा एक वर्षमा १४६ को मृत्यु

फाइल फोटो

A+ A A-

चितवनमा पछिल्लो एक वर्षमा सवारी दुर्घटनाका कारण १ सय ४६ ले ज्यान गुमाएका छन् । जिल्लामा भएका २ सय ९५ दुर्घटनामा परी उनीहरुको ज्यान गएको हो ।

पछिल्लो आर्थिक वर्षमा २ सय ७१ दुर्घटनामा १ सय ३२ को मृत्यु भएको थियो । जिल्ला ट्राफिक प्रहरी कार्यालय चितवनले दिएको जानकारीअनुसार अघिल्लो वर्षभन्दा गत वर्ष २४ वटा दुर्घटना बढेर १४ बढी मानिसको मृत्यु भएको छ ।

दुर्घटना न्यूनीकरणका लागि विभिन्न कार्यक्रम गरिएको भए पनि दुर्घटनाको क्रम भने रोकिएको छैन । गत आवमा भएका दुर्घटनामा ४ सय ५३ सवारीसाधन परेको जिल्ला ट्राफिक प्रहरी कार्यालय चितवनले जनाएको छ । कार्यालयका प्रमुख प्रहरी निरीक्षक चन्द्रकुमार गिरीका अनुसार गत वर्ष भएका सवारी दुर्घटनामा परी ५ सय ५८ घाइते भएका छन् ।

जिल्लामा भएका सवारी दुर्घटनामध्ये मोटरसाइकल बढी छ । गत वर्ष २ सय ५ मोटरसाइकल दुर्घटनामा परेका छन् । यस्तै, ८० ट्रक तथा ट्यांकर, ५३ बस, ५२ जिप/कार दुर्घटनामा परेको कार्यालयको तथ्यांकले देखाएको छ ।

यस्तै, कार्यालयले गत आवमा ४० हजार २९ सवारी कारबाही गरी ३ करोड ७ लाख ६६ हजार ५०० राजस्व संकलन गरेको छ । अघिल्लो आर्थिक वर्षमा ४५ हजार १ सय ५० सवारीसाधनलाई कारबाही गरी ३ करोड ३६ लाख ८७ हजार ५०० राजस्व संकलन गरेको थियो ।

कारबाहीको संख्या हेर्ने हो भने जनचेतनाका कारण घट्दै गएको तर दुर्घटना न्यूनीकरण गर्न नसकेको प्रमुख गिरीले बताए ।

हलुका सवारीसाधनको तीव्र गतिका कारण दुर्घटना बढी हुने गरेको उनले जानकारी दिए । बढ्दो सवारीको चाप र साँघुरा सडकका कारण भित्री सडकमा बढी संख्यामा दुर्घटना भएको उनले बताए ।

प्रकाशित मिति: बिहीबार, साउन २, २०७६ २०:११