विश्वकप छनोट : अस्ट्रेलिया र नेपाल एउटै समूहमा

A+ A A-

कतारमा हुने विश्वकप २०२२ तथा चीनले आयोजना गर्ने एएफसी एसियन कप २०२३ को संयुक्त छनोटको दोस्रो चरणको ड्र सार्वजनिक भएको छ । मलेसियाको क्वालालम्पुरस्थित एसियन फुटबल कन्फिडेरेसनको मुख्यालयमा भएको ड्रमा नेपाल समूह ‘बी’मा परेको छ ।

एसियाका ४० देशलाई ५ पटमा बाँडेर फिफाका प्रतियोगिता निर्देशक क्रिस्टियन अंगर र अस्ट्रेलियाका फुटबल लेजेन्ड टिम काहिलले संयुक्त रुपमा गरेको ड्रबाट ८ समूहमा विभाजन गरिएको थियो ।

नेपाल रहेको समूह ‘बी’मा अस्ट्रेलिया, जोर्डन, चाइनिज ताइपेइ र कुवेत छन् । १६५औं स्थानमा रहेको नेपाल फिफा र्‍याङकिङका आधारमा आफ्नो समूहको सबैभन्दा कमजोर टिम हाे । विश्वकप २०१८ मा सहभागी भएको अस्ट्रेलिया ४३औं स्थानमा छ भने जोर्डन ९८औं स्थानमा छ । यस्तै, चाइनिज ताइपेई १२५औं स्थानमा छ भने सबैभन्दा नजिक रहेको कुवेत १५६औं स्थानमा छ ।

विश्वकप २०१८ को छनोटमा भारतसँग पराजित हुँदै पहिलो चरणबाटै बाहिरिएको नेपाल ८ वर्षपछि विश्वकप छनोटको दोस्रो चरणमा पुगेको हो । ४० देश सहभागी दोस्रो चरणको छनोटमा शीर्ष १२ मा परेमा नेपाल विश्वकप छनोटको अन्तिम चरणमा प्रवेश गर्ने भने २०२३ मा हुने एसियन कपमा स्वतः छनोट हुने छ ।

८ समूहका विजेता तथा ४ उत्कृष्ट उपविजेता गरी कुल १२ टिम विश्वकप छनोटको अन्तिम चरणमा प्रवेश गर्नेछन् भने एएफसी एसियन कप २०२३ मा पनि आफ्नो स्थान सुरक्षित गर्नेछन् । २४ टिम सहभागी रहने एएफसी एसियन कपको रिक्त १२ स्थानका लागि बाँकी टिममध्येका शीर्ष २४ टिमले प्रतिस्पर्धा गर्नेछन् ।

दोस्रो चरणका छनोेट खेल राउन्ड रोबिन आधारमा ५ सेप्टेम्बर २०१९ देखि ९ जुन २०२० सम्म खेलिनेछन् ।