बाढीका कारण त्रियुगा पुल उच्च जाेखिममा

A+ A A-

पूर्व–पश्चिम राजमार्गअन्तर्गत सप्तरीको कदमाहा हुँदै उदयपुरकाे सदरमुकाम गाईघाट जोड्ने गाईघाट–कदमाहा सडकखण्डअन्तर्गत गाईघाटको त्रियुगा नदीको पक्की पुलको पूर्वी भाग बाढीका कारण अहिले भत्किन थालेको छ ।

चार दिनकाे लगातारको वर्षा पछि आएकाे बाढीका कारण त्रियुगा पुलको पूर्वीभागको छेउको पिलर र पिलरसँगै निर्मित पर्खाल भत्किएपछि पुल जोखिममा परेकाे ट्राफिक प्रहरी कार्यालय गाईघाटले जनाएको छ ।

पुलको पूर्वपट्टिको छेउको पिलरसँगै झन्डै १० मिटर लम्बाइको पर्खाल भत्किन थालेपछि तत्काल पुलको संरक्षण गर्न पूर्वी भागमा सवारी सञ्चालनमा रोक लगाएर पुलको पश्चिमी भागबाट मात्र सवारीसाधन सञ्चालन गर्ने गरी एकतर्फी क्षेत्रबाट सवारी आवतजावत सुरु गरिएको ट्राफिक प्रहरी कार्यालय गाईघाटका प्रमुख दिनेश चौधरीले बताए ।

पुलको पूर्वी भाग भत्कन थालेपछि ठूला सवारी साधनका कारण पुल तत्काल भत्किन सक्ने सम्भावनालाई ध्यानमा राखेर पूर्वी क्षेत्रको रुट बन्द गर्दै पश्चिमी क्षेत्रबाट एकतर्फी रूपमा मात्र सवारी सञ्चालन अनुमति प्रदान गरिएको ट्राफिक प्रहरी कार्यालय गाईघाटले बताएको छ ।

त्रियुगा पुल उच्च जोखिममा पर्न थालेपछि तत्काल पुलको भत्किएको भाग पुनः मर्मत वा निर्माण सुरु गर्ने त्रियुगा नगरपालिका गाईघाटले जनाएको छ ।

नगरपालिका प्रमुख बलदेव चौधरीले त्रियुगा पुलजस्तो महत्त्वपूर्ण भौतिक सम्पत्तिलाई नगरपालिकाले भत्कन नदिने र तत्काल पुलको पुनः मर्मत कार्य सुरु गर्न लागिएकाे बताए ।

यसका लागि नगपालिकाले तत्कालै दुई जेसीभी प्रयोग गरेर पुलमुनिको माझ भागबाट पानीको सतह खोल्ने, पुलको छेउको पिलर र भत्किएका पर्खाल निर्माण गर्ने र खाल्डा पुर्ने काम सुरु गर्न लागिएको प्रमुख चौधरीले बताए ।

सोही पुल भएर सदरमुकाम गाईघाटबाट राजधानी काठमाडौं, विराटनगर, धरान, सप्तरी, सिराहालगायत देशका विभिन्न भागसम्म यातायातका साधन आवतजावत हुने गरेको ट्राफिक प्रहरी कार्यालय गाईघाटले जनाएको छ । समयमै पुलको संरक्षण हुन नसके सदरमुकाम गाईघाट हुँदै अन्यत्रबाट आवतजावत गर्ने सम्पूर्ण यातायात सञ्चालन नै ठप्प हुने अवस्था आउने हुनाले पनि समयमै पुलको संरक्षण गर्न आवश्यक रहेको यातायात व्यवसायीले बताएका छन् ।

उक्त पुल २०६३ मा निर्माण सुरु भई २०६६ मा निर्माण सम्पन्न भएको थियो । ८ करोड रूपैयाँमा निर्माण भएको उक्त पुलको लम्बाइ १ सय २० मिटर र चौडाइ आठ मिटरको छ ।

प्रकाशित मिति: बुधबार, साउन १, २०७६ २३:२६