जसले आफू जन्मिएको देशलाई हराएर इंग्ल्यान्डलाई च्याम्पियन बनाए...

A+ A A-

क्रिकेट विश्वकपको इतिहासमा नयाँ विश्व च्याम्पियन बनेको छ, इंग्ल्यान्ड । आइतबार भएको खेलमा कीवी टोलीलाई पछि पार्दै इंग्ल्यान्डले पहिलोपटक विश्वकपको उपाधि जित्यो ।

इंग्ल्यान्डले चौथोपटकको फाइनलमा उपाधि जित्दा न्युजिल्यान्ड लगातार दोस्रोपटक फाइनलमा पुगेर उपाधि चुम्नबाट वञ्चित भयो ।

इंग्ल्यान्ड २७ वर्षपछि फाइनलमा पुगेर क्रिकेटको मक्काका रुपमा चिनिने लर्ड्समा उपाधि उचाल्न सफल भयो र यो जितको हिरो बने, इंग्ल्यान्डका अलराउन्डर बेन स्टोक्स ।

उनले कुनै समय हारनजिक पुगेको इंग्ल्यान्डलाई अन्तिम ओभरसम्म टिकेर छक्का प्रहार गर्दै जितको आशा देखाए भने अर्को बलमा उनले २ रन लिए भने मार्टिन गुप्टिलले विकेटमा तीव्र गतिमा हानेको थ्रो बाउन्ड्रीमा पुगेर चौका भएपछि ६ रन जोडेको थियो ।

त्यसपछि २ बलमा २ रन जोड्दै उनले खेललाई सुपर ओभरमा पुर्याए । सुपर ओभरमा १५ रन बनाउँदा ८ रन स्टोक्सले नै बटुलेका थिए । जसमा १६ रनको लक्ष्य पछ्याएको न्युजिल्यान्डले पनि १५ रन नै बनायो र बाउन्ड्री बढी हानेको आधारमा इंग्ल्यान्ड विश्वविजेता बन्यो ।

बेन स्टोक्स तिनै खेलाडी हुन्, जसको जन्म ४ जुन १९९१ मा न्युजिल्यान्डमा नै भएको थियो । न्युजिल्यान्डको क्राइस्ट चर्चमा जन्मिएका उनी आफ्ना बाबुसँग १२ वर्षको उमेरमा इंग्ल्यान्ड आएका थिए ।

अहिले पनि उनका बाबुआमा न्युजिल्यान्डको क्राइस्ट चर्चमा नै बस्छन् । स्टोक्स भने इंग्ल्यान्डमा नै क्रिकेट खेल्न सिके र इंग्लिस टोलीका महत्त्वपूर्ण सदस्यका रुपमा विश्वकपको फाइनलको म्यान अफ दि म्याच भए ।

उनी इंग्ल्यान्डका राम्रा अलराउन्डर हुन् । बेन स्टोक्सले ५२ टेस्टमा ३ हजार १५२ रन बनाएका छन् । जसमा ६ शतक र १७ अर्धशतक छ ।