अस्ट्रेलियालाई हराउँदै इंग्ल्यान्ड २७ वर्षपछि विश्वकप क्रिकेटको फाइनलमा

A+ A A-

इंग्ल्यान्ड २७ वर्षपछि विश्व क्रिकेटको फाइनलमा प्रवेश गरेको छ । बिहीबार राति भएको सेमिफाइनलमा पाँचपटकको उपाधि विजेता अस्ट्रेलियालाई ८ विकेटले हराउँदै इंग्ल्यान्ड चौथोपटक विश्वकपको फाइनलमा पुगेको हो ।

इंग्ल्यान्ड फाइनलमा पुगेसँगै विश्वकप क्रिकेटको ४४ वर्षको इतिहासमा अब नयाँ राष्ट्र च्याम्पियन बन्ने पनि निश्चित भएको छ । विश्वकपको उपाधिका लागि अब इंग्ल्यान्ड र न्युजिल्यान्डबीच प्रतिस्पर्धा हुने भएको छ ।

यी दुवै टिम विश्व क्रिकेटका शक्ति राष्ट्र भए पनि अहिलेसम्म विश्वकपको उपाधि जित्न सकेका छैनन् । टस जितेर पहिले ब्याटिङ गरेको अस्ट्रेलियाले ४९ ओभरमा सबै विकेट गुमाएर २ सय २३ रन बनाएको थियो ।

जवाफमा इंग्ल्यान्डले २ विकेटको क्षतिमा सो लक्ष्य भेट्टायो । इंग्ल्यान्डको जितमा ओपनर जोनी बेयरस्टो र जेसन रोयले शतकीय साझेदारी गरे ।

उनीहरुले १२४ रनको साझेदारी गरे । बेयरस्टो १८औं ओभरमा ३४ रन बनाएर आउट भए । रोयल ८५ रन बनाए भने कप्तान इयोन मोर्गनले ४५ र जोए रुटले ४९ रनको योगदान गरे ।

यसअघि टस जितेर पहिले ब्याटिङ गरेको अस्ट्रेलियाका लागि स्टिभ स्मिथले ८५, एजेक्स ग्यारीले ४६ र ग्लेन म्याक्सवेलले २२ रनको योगदान गरेका थिए । इंग्ल्यान्डका लागि आदिल रासिद र क्रिस वाकसले ३–३ विकेट लिए भने जोफ्रा आर्चरले २ तथा मार्क उडले १ विकेट लिए ।

जारी विश्वकपमा अस्ट्रेलियाका मिचेल स्टार्कले इंग्ल्यान्डका जोनी बेयरस्टोलाई एलबीडब्लू धरापमा पार्दैै विश्वकपमा सर्वाधिक विकेट लिने खेलाडीको कीर्तिमान आफ्नो नाममा लेखाएका छन् ।

उनले १२ वर्ष पुरानो ग्लेन म्याग्राको सर्वाधिक विकेट लिने खेलाडीको कीर्तिमान तोडेका हुन् । स्टार्कले जारी विश्वकपमा २७ विकेट लिए र म्याग्राले २००७ मा २६ विकेट लिएका थिए ।

फाइनलमा पुगेसँगै अब इंग्ल्यान्ड वा न्युजिल्यान्डमध्ये एकले विश्वकप जित्दा नयाँ च्याम्पियन राष्ट्र बन्नेछ । इंग्ल्यान्ड १९७९, १९८७ र १९९२ मा विश्वकपको फाइनलमा पुगे पनि उपाधि जित्न सकेको थिएन ।

अस्ट्रेलिया पहिलोपटक विश्वकपको सेमिफाइनलमा पराजित भएको हो । अस्ट्रेलिया १९७५, १९८७, १९९६, १९९९, २००३, २००७, २०१५ मा विश्वकपको फाइनलमा पुगेको थियो ।

त्यसमध्ये १९७५ र १९९६ मा विश्वकपको उपविजेता बनेको थियो भने बाँकी पाँचपटक उपाधि जितेको थियो । हालसम्म भारत र वेस्ट इन्डिजले २–२ पटक र पाकिस्तान र श्रीलंकाले एक एकपटक विश्वकपको उपाधि उचालेका छन् ।

प्रकाशित मिति: शुक्रबार, असार २७, २०७६ ०७:४६