विजयपुरखोलाको डाइभर्सन बन्यो, सवारी आगमन सुरु

A+ A A-

विजयपुर खोलाले बगाएकाे पृथ्वी राजमार्ग हुँदै पोखरा भित्रिने मुख्य प्रवेशद्वारकाे डाइभर्सन निर्माण गरिएको छ । विजयपुर खोलाको बेली ब्रिज जीर्ण बनेपछि निर्माण गरिएको डाइभर्सन शनिबार राति आएको बाढीले बगाएपछि सवारी सञ्चालन ठप्प भएको थियो ।

गण्डकी प्रदेश भित्रिने मुख्य नाका अवरुद्ध भएपछि गण्डकी प्रदेशका मुख्यमन्त्री पृथ्वीसुब्बा गुरुङको आग्रहमा पोखरा विमानस्थल निर्माण गरिरहेकाे चिनियाँ ठेकेदार कम्पनीले मंगलबार एक दिनमै डाइभर्सन बनाएकाे हाे ।

चिनियाँ सीएएमसी इन्जिनियरिङ कम्पनी र सडक डिभिजन कार्यालय पोखराले संयुक्त रुपमा २४ घण्टाभित्रै डाइभर्सन निर्माणको काम सम्पन्न गरेको हो ।

शनिबार राति भत्किएको डाइभर्सन भएकै ठाउँमा डाइभर्सन बनाइएको हो । मुख्यमन्त्रीले सोमबार साँझ विजयपुर पुगेर अवलाेकन गरेलगत्तै चिनिया कम्पनीलाई तत्कालै डाइभर्सन बनाउन आग्रह गरेका थिए । उनले आग्रह गरेलगत्तै कम्पनीले डाइभर्सन निर्माण प्रक्रिया अगाडि बढाएको थियो ।

मुख्यमन्त्री गुरुङले बेली ब्रिज बन्न अझै समय लाग्ने देखिएकाले तुरुन्तै डाइभर्सन बनाउन आग्रह गरेका थिए । उनको आग्रहपछि सेती नहरबाट विजयपुर खोलामा मिसिएको पानी घटाएर काम सुरु भएको थियो ।

ठूलो पानी नपर्दै खोलामा आएको बाढीका कारण डाइभर्सन नै बगाएपछि अब बेली ब्रिजकै काम छिटो गर्न ठेकेदारलाई तकेता गरिएको सडक डिभिजन पोखराका प्रमुख हरिकुमार पोखरेलले बताए ।

डाइभर्सन नै पानीको बहावले बगाउँदा निर्माण हुँदै गरेको पोखरा क्षेत्रीय अन्तर्राष्ट्रिय विमानस्थलको काम समेत दुई दिन प्रभावित भएको थियो । सामानहरु धमाधम भित्रिरहेका बेला अवरोध भएको थियो । १० टन भारवहन क्षमताका मालवाहक सवारी साधन गगनगौंडासम्मै लाइन लागेका थिए ।

पुल ठाउँठाउँमा चर्किएर जीर्ण हुँदा १० टन माथि भार भएका सवारीलाई सोही डाइभर्सनबाट आवतजावत गराउँदै आइएको थियो । यसअघि चर्किएर जोखिममा परेको पक्की पुलमा लगाएको फलामको सपोर्टसमेत यतिखेत बढेको बाढीले बगाएको छ ।

पोखरा जाने विकल्पका रूपमा लेखनाथबाट सेती नदीको लामगादी, पटनेरीलगायतका स्थानमा पुलबाट हलुका सवारी साधन पठाउन सकिने भए पनि दोविल्लामा रहेको पुलसमेत जीर्ण अवस्थामा रहेकाले ठूला गाडी आवतजावतमा समस्या हुने गरेको छ ।

विजयपुर पुलबाट दैनिक ६ हजार बढी सवारी आवतजावत गर्छन् । अहिले भएको पुल २०५९ सालमा निर्माण सुरु भएर २०६४ सालमा सञ्चालनमा आएको थियो । पुलको लम्बाइ ७४ दशमलव २ मिटर छ ।

गत माघमा पुलको नियमित मर्मत सम्भारका क्रममा पुलको सपोर्टमा रहेका फलाम ठाउँठाउँमा चर्केको देखिएको थियो । त्यसपछि मालवाहक गाडी सञ्चालनमा रोक लगाई डाइभर्सन बनाइएको थियो ।

प्रकाशित मिति: बुधबार, असार २५, २०७६ २२:०६