अति विपन्न परिवारलाई निःशुल्क विद्युत् मिटरबक्स

A+ A A-

नेपाल विद्युत् प्राधिकरण डडेल्धुरा वितरण केन्द्रले अति विपन्न वर्ग तथा सांस्कृतिक महत्त्वका सम्पदालाई निःशुल्क मिटर वितरण गरेको छ ।

केन्द्रको कार्यालयमा एक कार्यक्रमबीच क्षेत्रीय कार्यालय अत्तरियाका सहायक प्रबन्धक टंक गिरीले उनीहरुलाई मिटर वितरण गरेका हुन् । नेपाल सरकारको उज्यालो नेपाल कार्यक्रमअन्तर्गत विनियोजन भएको बजेटबाट मिटर बक्स वितरण गरिएको हो ।

सरकारले विद्युत् सेवा विस्तार गरेका ठाउँमा पनि आर्थिक अवस्था कमजोर भएका अति विपन्न वर्गलाई मिटर वितरण गरिएको नेपाल विद्युत् प्राधिकरण डडेल्धुरा वितरण केन्द्रका प्रमुख ईश्वरकुमार श्रेष्ठले जानकारी दिए ।

‘सरकारले धेरै लगानी गरेर पोलतार पुर्‍याइदिएको ठाउँमा पनि गरिबीका कारण मिटर किन्न २५ सय–३ हजार तिर्न नसक्ने अति विपन्न वर्गलाई लक्षित गरेर मिटर वितरण गरेका हौं,’ उनले भने, ‘यो कार्यक्रमले सरकारको सबै ठाउँमा विद्युत् पुर्‍याउने लक्ष्यमा सहयोग गर्छ ।’

उनका अनुसार स्थानीय तहको सिफारिसका आधारमा उनीहरुलाई मिटर वितरण गरिएको हो । डडेल्धुरा वितरण केन्द्रअन्तर्गतका दलितलगायतका अति विपन्न समुदायलाई वितरण गरिएको उनले बताए । आवेदन दिएका ४२ जनामध्ये पहिलो चरणमा २१ जनालाई वितरण गरिएको र अन्यलाई पनि क्रमशः वितरण गर्ने प्रमुख श्रेष्ठको भनाइ छ ।

दलितलगायतका अति विपन्न समुदायका व्यक्तिले निःशुल्क रुपमा मिटर बक्स पाएपछि खुसी व्यक्त गरेका छन् । अमरगढी नगरपालिका–८ टाटरकी ऐश्वर्या दमाईले भनिन्, ‘घरमा अब उज्यालो हुन्छ । नानीबाबुहरुको पठनपाठनमा पनि सहयोग पुग्छ ।’

सरकारले अति विपन्न समुदायलाई मिटर वितरण गरेकोमा धन्यवाद दिँदै नवदुर्गा गाउँपालिका–१ कोटेलीका जोगी कामीले बाँकी अति विपन्न परिवारका लागि पनि यस्ताे कार्यक्रम ल्याउन सुझावसमेत दिए ।

‘विपन्न वर्गका परिवार अझैं अँध्यारोमा बस्न बाध्य छन्,’ उनले भने, ‘केही पनि सेवा सुविधा नपाएका अति विपन्न समुदायलाई सरकारले यसरी नै सहयोग गरोस् ।’

प्रकाशित मिति: बुधबार, असार २५, २०७६ १७:५३