भारत र न्युजिल्यान्डको खेल आज, खेल नभए भारत यसरी पुग्न सक्छ फाइनलमा

A+ A A-

विश्वकप क्रिकेटअन्तर्गत भारत र न्युजिल्यान्डबीचको पहिलो सेमिफाइनलको स्थगित खेल आज हुँदै छ । इंग्ल्यान्ड र वेल्समा जारी एक दिवसीय विश्वकपअन्तर्गत भारत र न्युजिल्यान्डबीचको पहिलो सेमिफाइनल खेल वर्षाका कारण अवरुद्ध भएकाे थियाे ।

म्यानचेस्टरको वर्ल्ड ट्राफोट मैदानमा टस जितेको न्युजिल्यान्डले ब्याटिङ गर्ने क्रममा ४६.१ ओभरमा वर्षाका कारण खेल रोकिएको थियो । खेल रोकिँदा न्युजिल्यान्डले ५ विकेट गुमाएर २ सय ११ रन जोडेको थियो ।

त्यसपछि परेको पानी नरोकिएपछि अवरुद्ध भएको बाँकी खेल नेपाली आज नेपाली समयअनुसार दिउँसो ३ बजेर १५ मिनेटमा सुरु हुनेछ ।

यो विश्वकपमा वर्षाका कारण सबैभन्दा बढी खेल अवरुद्ध बनेको रेकर्ड बनेको छ । जारी विश्वकपमा वर्षाका कारण पाँच वटा खेल रद्द भइसकेका छन् । लिग चरणमा भारत र न्युजिल्यान्डबीचको खेल पनि वर्षाले रद्द भएपछि अंक बाँडिएको थियो ।

म्यानचेस्टरमा आज पनि वर्षा हुने सम्भावना रहेको त्यहाँको मौसम विभागले जनाएको छ । वर्षाका कारण खेल अवरुद्ध भएमा भारत सेमिफाइनलमा प्रवेश गर्नेछ ।

समूह चरणमा बढी अंक जोडेको र रन रेटमा अग्र स्थानमा भएकोले भारतकाे फाइनलमा पुग्ने बाटो तय हुनेछ ।

न्युजिल्यान्डका रस टेलर ६७ र विकेट किपर ब्याट्सम्यान टम लाथाम ३ रन बनाएर क्रिजमा छन् ।

यसअघि ओपनर मार्टिन गुप्टिल १ रनमा आउट भए भने हेनरी निकोल्स २८ रनमा आउट भएका छन् । कप्तान केन विलियमसन ६७ रन, जिम्मी निसमले १२ र कोलिन ग्रान्डहोमले १६ रन बनाए ।