जुम्लाको ४९० रोपनी सरकारी जग्गा व्यक्तिका नाममा

A+ A A-

जुम्लास्थित भेडा बाख्रा फार्मको ५ सय ९० रोपनी जग्गा परिवारको नाममा दर्ता गरेको अभियोगमा जुम्लाका तत्कालीन मालपोत अधिकृतसहित १६ जनाविरुद्ध भ्रष्टाचार मुद्दा दायर गरिएको छ ।

जुम्लाको गुठीचौरस्थित फार्मको सो जग्गा मालपोत कार्यालय जुम्लाका तत्कालीन निमित्त प्रमुख गोविन्दप्रसाद न्यौपाने, तत्कालीन खरिदार हाल मालपोत कार्यालय चावहिलका सुब्बा विजय शर्मा न्यौपाने र तत्कालीन भेंडा तथा बाख्रा अनुसन्धान कार्यक्रम गुठीचौर जुम्लाका कार्यालय प्रमुख यमुनाकुमार श्रेष्ठसहित १६ जना मिलेर व्यक्तिका नाममा दर्ता गरेको अभियोग छ ।

अख्तियार दुरुपयोग अनुसन्धान आयोगले १६ जनाविरुद्ध ४५ लाखदेखि १ लाख ९९ हजारसम्म बिगोसमेत मागेर आजै विशेष अदालतमा मुद्दा दायर गरेको विज्ञप्तिमार्फत जनाएको छ ।

गुठीचौरको भेडा बाख्रा फार्मको नाममा भएको सरकारी जग्गा व्यक्तिको नाममा दर्ता गरेको पाइएकाले भ्रष्टाचार अभियोगमा मुद्दा दायर गरेको अख्तियारको भनाइ छ ।

अख्तियारले हरिहर न्यौपाने, मुनिषचन्द्र न्यौपाने, मायालाल न्यौपाने, विष्णु न्यौपाने, विष्णु ऋषि न्यौपाने, विष्णुलाल न्यौपाने, पार्वती न्यौपाने, नवऋषि न्यौपाने, धनप्रसाद न्यौपाने, देवेन्द्रप्रसाद उपाध्याय, जानकीदत्त देवकोटा, गोमा न्यौपाने, केशवराज न्यौपाने, कविदत्त न्यौपानेविरुद्ध मुद्दा दायर गरेको छ ।

आयोगले मालपोत कार्यालयका तत्कालीन प्रमुख गोविन्दप्रसाद न्यौपाने, मालपोतका कर्मचारी विजय शर्मा न्यौपाने र भेडा तथा बाख्रा अनुसन्धान कार्यक्रमका प्रमुख यमुनाकुमार श्रेष्ठसँग ४५ लाख रुपैयाँ बिगो माग दाबाी गरेको छ ।