एमाले महाधिवेशन: हेलिकप्टर लिएर चितवन जाँदैछन् देउवा, प्रचण्ड नजाने

फाइल तस्वीर ।

A+ A A-

एमालेको १०औँ राष्ट्रिय महाधिवेशन आज चिवनमा सुरु हुँदैछ । चितवनको नारायणी नदी किनार र सौराहा क्षेत्रमा चहलपहल ह्वात्तै बढेको छ ।

एमालेका केन्द्रीय नेतादेखि जनवर्गीय सङ्गठनका नेता, महाधिवेशन प्रतिनिधि हिजै चितवन आइसकेका छन् । महाधिवेशन प्रतिनिधिका लागि सौराहामा बस्ने व्यवस्थापन मिलाइएको छ । महाधिवेशनको उदघाटन समारोह हुने नारायणी नदी किनारमा मञ्च बनाइएको छ ।

महाधिवेशनको लोगोमा अङ्कित गैँडाको मस्कट तयार गरिएको छ । मूर्तिकार सूर्य मध्यरातसहित १० जनाको टोलीले १० दिन लगाएर गैँडाको मस्कट तयार पारेको हो । चितवन एकसिङ्गे गैँडाका लागि परिचित भएकाले महाधिवेशनको लोगोमा गैँडाको मस्कट राखिएको एमाले चितवनका अध्यक्ष पार्वती रावलले जानकारी दिए ।

यो मूर्ति महाधिवेशन उदघाटनस्थल नारायणी नदी किनारमा राखिएको छ । मूर्ति राख्नका लागि मञ्चको पश्चिमतर्फको भागमा बेस निर्माण गरिएको छ । उदघाटन सत्रमा हजारौँ कार्यकर्ता सहभागी हुने भएकाले प्रदर्शनका लागि गैँडाको मस्कटसहित केही सेल्फी प्वाइन्ट बनाइएको छ ।

‘समृद्ध नेपाल, सुखी नेपाली’को थिममा चित्रकला

बन्दसत्र हुने स्थान होटल सेभेन स्टारको पर्खालमा कलात्मक चित्र कोरिएका छन् । ‘समृद्ध नेपाल, सुखी नेपाली’को थिममा आयोजना गरिएको चित्रकला प्रतियोगितामा चितवन र नवलपुरका ५७ कलाकारले चित्र कोरेका हुन् । होटलको २०० मिटर लामो पर्खालमा चित्र बनाइएकाे छ ।

महाधिवेशन मूल आयोजक समितिको संयोजनमा सिर्जनशील ललितकला संघ र प्रगतिशील ललितकला संघको आयोजनामा चित्रकला आयोजना गरिएको हो । २०५५ सालदेखि चित्रकलामा सक्रिय वर्ड आर्ट लिङ्कका सञ्चालक योगेश खनालले समृद्ध नेपाल, सुखी नेपालीको अवधारणामा चित्र कोरिएको बताए । करिब २०० लामो पर्खामा कोरिएको चित्र हेर्दा देशले चाहेको विकास र समृद्धिबारे सहजै बुझ्न सकिने भन्दै खनालले अधिकांश नवप्रवेशीले चित्रकलामा भाग लिएका जानकारी दिए ।

कलाकारले देशले शान्ति चाहेको आकृति, आँखाको नानीमा सूर्य चिह्नभित्र विकासका सूचक झल्कने चित्र, कृषिमा क्रान्तिको खाँचो औँल्याउने खालका चित्र, स्वयम्भू, धरहरा, परेवा, दुर्लभ पाटेबाघसहितका चित्र कोरेका छन् । उत्कृष्ट चित्र बनाउने कलाकारलाई एमालेको महाधिवेशन उदघाटनका दिन अध्यक्ष केपी ओलीले नगद र प्रमाणपत्रसहित पुरस्कृत गर्ने बताइएको छ ।

हेलिकप्टरमा देउवा जाने

एमालेको १० औँ महाधिवेशनलाई प्रधानमन्त्री एवं कांग्रेस सभापति शेरबहादुर देउवाले सम्बोधन गर्ने जनाइएको छ ।

प्रमुख जिल्ला अधिकारी असमान तामाङका अनुसार देउवा बिहान ११ः४५ बजे भरतपुरस्थित जुनियर प्रहरी अधिकृत शिक्षालयमा आइपुग्ने छन् । उनी हेलिकोप्टरबाट आउने बताइएको छ ।

महाधिवेशन उदघाटन सत्रमा सम्बोधन गरेर देउवा दिउँसो १ः१५ बजे काठमाडौं फर्किने छन् । तामाङका अनुसार जनता समाजवादी पार्टीका अध्यक्ष उपेन्द्र यादव, राष्ट्रिय जनमोर्चाका अध्यक्ष चित्रबहादुर केसी, जनता समाजवादी पार्टी (लोकतान्त्रिक) का महन्थ ठाकुर वा राजेन्द्र महतो पनि कार्यक्रममा आउने छन् ।

एमाले छोडेर नेकपा (समाजवादी) पार्टी खोलेका माधव नेपाललाई भने एमालेले निम्ता नै दिएको छैन । त्यसैले नेता नेपाल महाधिवेशनमा जाने छैनन् । माओवादी केन्द्रका अध्यक्ष पुष्पकमल दाहाल ‘प्रचण्ड’ भने नजाने भएका छन् । महाधिवेशनलाई सम्बोधन गर्न विदेशबाट विभिन्न दलका नेतासमेत आउँदै छन् ।

महाधिवेशन आजदेखि १२ मंसिरसम्म हुने छ । महाधिवेशनको उदघाटन सत्रमा पाँच लाख नेता कार्यकर्ता सहभागी हुने एमालेको विश्वास छ । बन्दसत्र सौराहामा गरिँदै छ ।

प्रकाशित मिति: शुक्रबार, मंसिर १०, २०७८ ०८:२८