सेतीको बाढीमा ६० जना फसे, झोलुङ्गे पुल बगाएपछि उद्धारमा समस्या

A+ A A-

बैतडीको सिगास गाँपालिका- ५ ढुङ्गाडमा सेती नदी गाउँमा पसेको छ । लगातारको वर्षासँगै पानीको बहाव बढ्दा सेती नदीले धार परिवर्तन गरी गाँउको दुवै तिर बग्न थालेको छ ।

नदी दुबैतर्फ बग्न थालेपछि ढुङ्गाड गाँउ टापु जस्तै भएको छ । गएराति ११ बजेतिर सेती नदी ढुङ्गाड गाँउमा पस्दा करिब ६० जना टापुमा फसेको वडाध्यक्ष राम बहादुर धामीले बताए ।

उनले हिजो रातिदेखि फसेकाहरूको उद्धार गर्न नसकिएको बताए । ढुङ्गाडमा अहिलेसम्म उद्धारका लागि सरकारी टोली पुग्न सकेको छैन । बैतडी र डोटीलाई जोड्ने ढुङ्गाडको झोलुङ्गे पुल पनि बगाउँदा उद्धारमा कठिनाइ भएको वडाध्यक्ष धामीले बताए ।

'नदीले बैतडी–डोटी जोड्ने झोलुंगे पुल बगाएकोले झन् समस्या भएको छ। अहिले बाढीमा फसेकाहरूको उद्धारका लागि प्रदेश सरकारसँग पहल गरिरहेको छु,' धामीले भने, 'नेपाल टेलिकमको फोन सेवा अवरुद्ध हुँदा झन् समस्या भएको छ ।'

सुर्खेतबाट नेपाली सेनाको हेलिकोप्टर ल्याउने तयारी भए पनि मौसमको प्रतिकुलताका कारण हेलिकोप्टर उड्न सकेको छैन ।

ढुङ्गाड गाँउमा एक सय पाँच परिवारको बस्ती छ । सेती नदीले खेत कटान गरेर गाँउमा पसेपछि पूरै गाँउ विस्थापित भएको छ ।

कतिपय हिजो साँझ नै अर्कै ठाँउ सरि सकेका छन् । कतिपय भने गाउँकै विद्यालयमा बस्दै आएका छन् । लगातार पानी परिरहेको र सेती नदीमा पानीको बहाव बढदै गएकाले उद्धारमा समस्या भएको छ ।

सुदुरपश्चिमका पहाडी जिल्लामा सञ्चार सेवा अवरुद्ध हुँदा थप विवरणका लागि जिल्ला प्रहरी कार्यालयमा सम्पर्क हुन सकेको छैन ।

प्रकाशित मिति: मंगलबार, कात्तिक २, २०७८ १४:१५