जनकपुरमा मेयर र उपमेयरबीच चर्कियो विवाद

A+ A A-

जनकपुरधाम उपमहानगरपालिकामा मेयर र उपमेयरबीच विवाद बढेको छ । उपमेयर रिता कुमारी मिश्रले उप महानगरपालिकाको विभिन्न उपसमितिको संयोजकको जिम्मेवारीबाट राजीनामा दिएकी छिन् ।

उनले शुक्रवार लिखित रुपमै निवेदन दर्ता गराएर एक्सन कमिटी, लामखुट्टे नियन्त्रण कमिटी र रंग पेन्ट वितरण कमिटीको संयोजक पदमा नरहने जानकारी गराएकी हुन् ।

राष्ट्रिय जनता पार्टीबाट निर्वाचित मेयर लालकिशोर साह र उपमेयर मिश्रबीच पछिल्लो समय विवाद बढ्दै गएको थियो । मेयर साहले एकलौटी ढंगले नगरपालिका चलाउन खोजेको आरोप उपमेयर मिश्रको छ ।

जनकपुरधामको सडक बिस्तार कार्यका लागि सहजीकरण गर्न उपमेयरको संयोजकत्वमा एक्सन कमिटी बनाइएको थियो । मलाई संयोजक बनाइएको छ तर मसँग समन्वयन नै नगरी काम भइरहेको छ,’उनले भनिन्, ‘केही घरहरूको पर्खाल भत्काउने, बाटो बिस्तार गर्ने काममा मलाई जानकारी छैन ।’

आफू एक्सन कमिटीको संयोजक रहेपनि जानकारी नै नगराएर तोडफोड गरिएकाले जिम्मेवारी परित्याग गरेको उपमेयर मिश्रले बताइन् ।

शहरमा लामखुट्टे नियन्त्रणका लागि अहिले मोबिल छर्कने काम भइरहेको छ । ’तर त्यसमा पनि मलाई कुनै जानकारी नै गराइएको छैन, कति मोबिल, कति औषधि वा कुन कुन ठाउँमा छर्किने काम भइरहेको छ त्यसबारे जानकारी छैन, खाली जिम्मेवारी मात्र लि एर भएन नि,’ उनले भनिन्, ‘मोविल छर्किने काममा अनियमितता भएको कुरा आइरहेका छन्, त्यसमा भ्रष्टाचार भएको प्रमाणित भए म फस्छु, त्यसकारण आफू संलग्न नभएको काममो जिम्मेवारी म लिन सक्दिन ।’

त्यस्तै सडक विस्तारका क्रममा भत्काइएका घरहरुमा नगरपालिकाले निशुल्क रंग रोगन गर्दै आएको छ । यसको संयोजकको जिम्मेवारी पनि उपमेयरलाई दिइएको छ । ‘कमिटिको संयोजक रहेपनि के कति जनालाई कति रंग वितरण गरियो त्यसबारे कुनै पनि जानकारी छैन, यसरी जिम्मेवारी लिने तर भूमिका नपाउने अवस्थामा राजिनामा गरेकी हुँ,’ उनले भनिन् ।

जनकपुर उपमहानगरपालिकाका प्रमुख लाल किशोर साह, प्रमुख प्रशासकीय अधिकृत सीता परियार र कमिटीमा रहेका वडाध्यक्षहरूको सिफारिसमा ती सबै काम भइरहेको उनले आरोप लगाइन् । ‘म कमिटीमा संयोजक छु, अहिलेसम्म मैले बैठक बोलाएकै छैन, तर पनि काम भइरहेको छ,’ उनले आश्चर्य व्यक्त गरिन् । उनले मेयरले अनावश्यक हस्तक्षेप गरेकाले काम गर्न अप्ठ्यारो भएको बताइन् ।