पृथ्वीमै छैन वेस्ट इन्डिज भन्ने देश

A+ A A-

क्रिकेट प्रेमीहरु वेस्ट इन्डिजसँग राम्ररी परिचित भएको हुनुपर्छ । सर गैरी साेबसर्, विवियन रिचर्डस्, मैल्कम मार्शल, ज्वेल गार्नर, एण्डी राेबर्टस्, वल्स, एम्ब्रुज, ब्रायन लारा, क्रिस गेल, आन्द्रे रसेल, कायरन पोलार्ड, ड्वेन ब्राभो, मार्लन स्यामुअल्स, किमो पाउल, सुनिल नारिन, सिमोन हिटमायरजस्ता विश्वस्तरीय खेलाडीहरु वेस्ट इन्डिजका हुन् ।

जसको बलिङ र ब्याटिङले कहिलेकाहीँ क्रिकेट पण्डितहरुलाई समेत फेल खुवाइदिन सक्छन् । वान डे विश्वकपको पहिलो र दोस्रो संस्करणको विजेता वेस्ट इन्डिज अहिले पनि विश्वकपको प्रमुख दाबेदारमा पर्छ । उसले आईसीसीका वान डे र टी–२० विश्वकपको उपाधिसमेत जितिसकेको छ ।

तर, वेस्ट इन्डिज क्रिकेट टिमबारे जानकारी राख्ने धेरैलाई वेस्ट इन्डिज भन्ने यो पृथ्वीमा कुनै देश छैन भन्ने जानकारी नहुन सक्छ ।

वेस्ट इन्डिज क्रिकेट खेल्ने केही क्यारेबियन देशको समूह हो, अलग अलग देश क्रिकेट खेल्न वेस्ट इन्डिजका नाममा एक जुट भएका छन् ।

यी सबै क्यारेबियन देशमा फुटबल पनि लोकप्रिय छ । तर, केवल क्रिकेट खेल्न मात्रै खेलाडी एकजुट हुने गरेका छन् । यो टिमको स्थापना सन् १९२८ मा भएको थियो र यसले आफ्नो पहिलो खेल इंग्ल्यान्डविरुद्ध खेलेको थियो । जसमा वेस्ट इन्डिज ५८ रनले हारेको थियो ।

क्यारेबियन टापु मेक्सिकोको पूर्वी क्षेत्रमा रहेको क्यारेबियन सागरमा छ । क्यारेबियन टापुको समूहमा हजारौं साना ठूला टापू भएको विश्वास गरिन्छ । तर, यीमध्ये केवल १५ देशका खेलाडी वेस्ट इन्डिज क्रिकेट टिमबाट खेल्ने गर्छन् ।

धेरैजसो खेलाडी एन्टीगुवा एण्ड बार्वाडुवा, बार्वाडाेस, जमैका, गुएना, ट्रिनिदाद एन्ड टोबागो, डोमिनिका, पोर्टो रिको, युनाइटेड स्टेट्स अफ भर्जिन आइल्यान्ड, सेन्ट किट्स् एण्ड नेविस, ग्रेनेडा, सेन्ट लुिसयालगायतका देशका हुने गरेका छन् ।

त्यसैले हामी वेस्ट इन्डिजको झन्डालाई क्रिकेट झन्डाका रुपमा पनि लिन सक्छौं । क्यारेबियन देशका मानिस धेरैजसो अफ्रिकी मूलका छन् ।

यसका साथै युरोपेली, भारतीय र चिनियाँ मूलका मानिस पनि यहाँ बसोबास गर्छन् । भारतीय मूलका धेरै मानिस क्यारेबियन देश पुगेका थिए । सुनील नारिन, रवि रामपाल, शिवनारायण चन्द्रपालजस्ता खेलाडी भारतीय मूलका हुन् ।

क्यारेबियन क्षेत्रमा २८ देश छन्, जसमध्ये केहीमा अहिले पनि बेलायत र फ्रान्सको उपनिवेश कायम छ । सबैभन्दा ठूलो क्यारेबियन देश क्युबा हो । तर क्युबा वेस्टइन्डिजकाे टिममा सामेल छैन ।

क्युबाको क्षेत्रफल ४२ हजार ८०४ वर्गकिलोमिटर छ । क्युबाको जनसंख्या १ करोड १० लाख छ । सबैभन्दा सानो क्यारेबियन देश सेन्ट किट्स एन्ड नेविस हो । यसको क्षेत्रफल २६१ वर्गकिलोमिटर र जनसंख्या ५० हजार छ ।

वेस्ट इन्डिज सिंगो देश नभए पनि सन् २०१६ को टी–२० विश्वकपको उपाधि जितेर उसले एक जुट भएमा सफलता पाउन सकिन्छ भन्ने उदाहरण पेस गरेको थियो । फेरी एकपटक वेस्ट इन्डिजकाे पुराना गाैरवका दिन फर्कन सक्छन् भन्ने संकेत गरेकाे छ । पहिलाे र दाेस्राे एक दिवसीय विश्वकप जितेकाे वेस्ट इन्डिज तेस्राे जीतकाे प्रतिक्षामा छ ।

प्रकाशित मिति: बिहीबार, जेठ २३, २०७६ २३:१९