बाल सहभागिताबारे कार्यविधि बनाउँदै सुदूरपश्चिम सरकार

A+ A A-

सुदूरपश्चिम सरकारले चाँडै बालअधिकार सम्बन्धी नियमावली र बाल सहभागिता सम्बन्धी कार्यविधि तयार गर्ने भएको छ ।

कैलालीको धनगढीमा आयोजित प्रदेशस्तरीय बाल सहभागिता कार्यविधि सम्बन्धी अन्तर्क्रिया तथा सरोकारवालाको सुझाव संकलन कार्यक्रममा सामाजिक विकासमन्त्री लालबहादुर खड्काले असोजसम्म बालबालिकासम्बन्धी नियमावली र बाल सहभागिता सम्बन्धी कार्यविधि बनाइसक्ने बताए ।

प्रदेश सरकारले यसअघि नै बालबालिका ऐन जारी गरिसकेको उनले बताए । मन्त्री खड्काले प्रदेशमा आवश्यक बालबालिका सम्बन्धी नियमावली, कार्यविधि तथा केही नीति आवश्यक भएको र त्यका लागि बालअधिकारका क्षेत्रमा क्रियाशील संघसंस्थाहरूसँग समन्वय गर्ने बताए । उनले बाल सहभागिताको मस्यौदा कार्यविधि पेस गर्न नागरिक सञ्जालका तर्फबाट कन्सोर्टियम नेपाललाई अनुरोध गर्दै यथाशीघ्र कार्यविधिलाई अनुमोदन गर्ने प्रतिबद्धता पनि जनाए ।

कार्यक्रममा सामाजिक विकास राज्यमन्त्री मनाकुमारी साउदले आफू बालअधिकारका लागि बनेका बाल क्लबको अनुभव सम्हालेर राजनीतिमा सक्रिय भएको बताउँदै बालअधिकारका क्षेत्रमा आवश्यक पर्ने नीति नियम बनाउन आफूले भूमिका खेल्ने बताइन् ।

कार्यक्रममा कन्सोर्टियम नेपालका अध्यक्ष किरण थापाले नियमावली, कार्यविधिलगायतका नीति निर्माणका लागि आफूले सहयोग गर्ने बताए । उनले आउँदो बाल दिवस (२९ भदौ)सम्म नियमावली र बाल सहभागितासम्बन्धी कार्यविधि आउन सके अझ ठूलो उपलब्धि हुने बताएका थिए ।