मुख्यमन्त्री राईको दाबी– बजेट यथार्थ धरातलमा उभिएर ल्याएका छौँ

A+ A A-

प्रदेश १ का मुख्यमन्त्री शेरधन राईले आगामी आर्थिक वर्ष २०७८–७९ को बजेट यथार्थ धरातलमा उभिएर ल्याइएको बताएका छन् ।

शुक्रबार आर्थिक वर्ष २०७८–७९ को बजेटमाथिको छलफलमा उठेका प्रश्नको जवाफ दिँदै मुख्यमन्त्री राईले यस पटक यथार्थ धरातलमा उभिएर कार्यान्वयन हुने खालको बजेट ल्याएको बताएका हुन् ।

‘अहिले चालु आर्थिक वर्षको जस्तो बजेट होइन यो । पास हुनेबित्तिकै खुरुखुरु कार्यान्वयन हुने बजेट हो । भोलि समस्या ननिम्तिने गरी यस पटकको बजेट यथार्थ धरातलमा उभिएर ल्याएका छौँ,’ उनले भने, ‘हामीले सवै प्रकारका बेथिति विकृति विसंगतिलाई नियन्त्रण गर्दै सच्याउँदै लाने बजेट ल्याएका छौँ ।’

प्रदेशसभामा बजेटमाथिको छलफलका क्रममा सांसदहरुले चर्को आलोचना गरेको प्रसंग कोट्याउँदै मुख्यमन्त्री राईले संसदमा बोल्दा मर्यादालाई ख्याल गर्ने, संसदको मर्यादा र गरिमालाई होच्याउने काम भुलेर पनि गर्न नहुने बताए ।

विनियोजन विधेयकमाथिको छलफलका क्रममा भौतिक पूर्वाधार विकास मन्त्रालय माथिको छलफल पछि सांसदहरूले उठाएका प्रश्नको जवाफ दिने क्रममा भौतिक पूर्वाधार विकासमन्त्री अम्बिरबाबु गुरूङले माओवादी केन्द्रका सांसदको नामै किटेर अमर्यादित टिप्पणी गरेपछि माओवादीका सांसदहरूले केही दिन प्रदेशसभा बैठक अवरुद्ध पारेका थिए ।

मन्त्रीले बोलेको कुरा रेकर्डबाट हटाउने सहमतिपछि प्रदेशसभा बैठक सुचारु भएको थियो । विनियोजन विधेयकमाथिको छलफलका क्रममा मुख्यमन्त्री तथा मन्त्रिपरिषद् कार्यालयमाथिको छलफलमा उठेका विषयमा सांसदको प्रश्नको जवाफ दिँदै राईले फजुल खर्च कटौती गर्ने विषयमा कठोरतापूर्वक कदम चाल्ने स्पष्ट पारे ।

प्रदेश सरकारको इज्जतका लागि काठमाडौंमा मुख्यमन्त्रीको सम्पर्क कार्यालय स्थापना गरिएको राईले बताए ।

प्रकाशित मिति: शुक्रबार, असार २५, २०७८ १५:४०