कुलमानको अर्काे मुभः भारतीय कम्पनीसँगको ठेक्का तोडियो, साढे ३० लाख डलर जफत

A+ A A-

नेपाल विद्युत् प्राधिकरणले हेटौंडा–भरतपुर–बर्दघाट २ सय २० केभी प्रसारण लाइन आयोजनाअन्तर्गत हेटौंडा–भरतपुर खण्डको ठेक्का तोडेको छ ।

कामको प्रगति सन्तोषजक नभएपछि प्राधिकरणले भारतीय कम्पनी आईकम टेलसँगको ठेक्का केही दिनअघि तोडेको हो ।

कम्पनीले कार्यसम्पादन जमानतबापत राखेको ३० लाख ५७ हजार अमेरिकी डलर पनि जफत गरेको छ । यसैगरी, प्राधिकरणले काम ढिला गरेबापत करिब १६ लाख डलर विलम्ब जरिमाना पनि लगाउने निर्णय गरेको छ ।

प्राधिकरणले यसअघि आयोजनाअन्तर्गतको भरतपुर–बर्दघाट खण्डको सेन्ट्रल चाइना पावर ग्रिड (सीसीपीजी)सँगको ठेक्का तोडेको थियो । प्राधिकरणको सिफारिसमा केही दिनअघि सार्वजनिक खरिद अनुगमन कार्यालयले नेपालको ठेक्कापट्टामा तीन वर्षसम्म भाग लिन नपाउने गरी सीसीपीजी कालाेसूचीमा राख्ने निर्णय गरिसकेको छ ।

ठेक्का तोडेपछि कार्यकारी निर्देशक घिसिङ, दातृ निकाय विश्व बैंकका नेपाल कार्यालयका देशीय प्रबन्धक फारिस हढाढ जर्भोससहितको टोलीले आइतबार र सोमबार मकवानपुरको हेटौंडामा पर्ने आयोजना निर्माणस्थलको निरीक्षण गरेका छन् ।

कार्यकारी निर्देशक घिसिङले कम्पनीले निर्माण कार्य ठप्प पारी ठेक्का सम्झौताको उल्लघंन गरेकाले ठेक्का तोडिएको जानकारी दिए ।

‘साइटमा काम गर्न कुनै समस्या छैन, काममा सुधार गर्न पटक–पटक निर्देशन दियौं । तर, ठेकेदार कम्पनीले हामीले दिएको निर्देशन पालना नगर्ने, गल्ती नसुधार्ने, निर्माणस्थल छोडेर कामलाई अलपत्र पार्ने, हामीले गरेको पत्रचारको कुनै जवाफ नदिनेलगायतका क्रियाकलाप गरी सम्झौता उल्लघंन गर्यो । कम्पनीको काम सुरुबाटै सन्तोषजनक थिएन त्यसैले ठेक्का तोडिएको हो,’ घिसिङले भने ।

सो कम्पनीसँगको ठेक्का तोडिएसँगै प्राधिकरणले नयाँ ठेक्कापट्टको प्रक्रिया अन्तिम चरणमा पुर्याएको छ । तत्काल टेन्डर आह्वान गर्ने तयारी प्राधिकरणको छ ।

प्राधिकरण र कम्पनीबीच ७४ किलोमिटर हेटौंडा–भरतपुर २ सय २० केभी डबल सर्किट प्रसारण लाइन निर्माणका लागि २०६५ को फागुनमा ९६ लाख ३६ हजार अमेरिकी डलर र १९ करोड ७३ लाख १५ हजार रुपैयाँमा ठेक्का सम्झौता भएको थियो । यस खण्डमा पर्ने २ सय २६ टावरमध्ये १ सय ६८ को जग हालिएको छ भने १ सय १९ वटा खडा गरिएको छ । १२ किलोमिटर मात्रै तार तानिएको छ ।

आयोजनाअन्तर्गतको भरतपुर–बर्दघाट निर्माणका लागि नयाँ टेन्डर गरी चिनियाँ कम्पनी हेङ्टन अप्टिक्स इलेक्ट्रिकसँग २०७५ साउनमा ५५ लाख ७५ हजार डलरमा ठेक्का सम्झौता भएको थियो ।

यो खण्डमा पर्ने २ सय ४६ टावरमध्ये १ सय ३७ को जग हालिएको र १ सय १ खडा गरिएको छ । तार भने तानिएको छैन । निर्माण २०७६ को माघभित्रमा सक्ने लक्ष्य राखिएको छ ।

कार्यकारी निर्देशक घिसिङले आयोजना प्रमुखसँग छलफल गरी तोकिएकै समयमा काम सम्पन्न गर्न निर्देशन दिए । प्राधिकरणकातर्फबाट गर्नुपर्ने रुख कटान तथा निजी जग्गा प्राप्तिको समस्या समाधान गर्ने प्रतिबद्धता जनाउँदै उनले महत्वपूर्ण यस आयोजनाको कामलाई तीव्रता दिन श्रमिकको संख्या थप्न निर्देशन दिए ।

नेपालभित्रको प्रसारण लाइन सुदृढ तथा विश्वसनीय बनाउन र पश्चिम क्षेत्रमा निर्माण हुने जलविद्युत् आयोजनाको विद्युत् प्रवाहका लागि हेटौंडा–भरतपुर–बर्दघाट प्रसारण लाइनको निर्माण गर्न लागिएको हो । नेपाल सरकार तथा प्राधिकरणको लगानी र विश्व बैंकको सहुलितपूर्ण कर्जामा आयोजना निर्माण भइरहेको छ ।

सबस्टेसनको निरीक्षण

कार्यकारी निर्देशक घिसिङ र दातृ निकाय विश्व बैंकको टोलीले हेटौंडामा निर्माणाधीन सबस्टेसनको निर्माण प्रगतिको निरीक्षण गरेको थियो ।

हेटौंडा–भरतपुर–बर्दघाट प्रसारण लाइन आयोजनाअन्तर्गत हेटौंडा, भरतपुर र बर्दघाटमा १ सय ३२ केभी सबस्टेसनको निर्माण भइरहेको छ ।

चिनियाँ ठेकेदार कम्पनी जोन्डिङ इन्टरनेसनलको लापरबाही र कमजोर कार्यसम्पादनका कारण आयोजना रुग्ण बनेको छ । कुलेखानी तेस्रोमा जस्तै चिनियाँ कम्पनीको नेपाली साझेदार हुलास इन्जिनियरिङका कारण सबस्टेसन निर्माण रुग्ण बनेको हो । तीनवटै सबस्टेसन निर्माणको समग्र प्रगति ९३ प्रतिशत छ ।

हेटौंडा–ढल्केबर–इनरुवा ४०० केभी प्रसारण लाइन आयोजनाअन्तर्गत हेटौंडामा २ सय २० र ४ सय केभी सबस्टेसनको पनि निर्माण भइरहेको छ । प्राधिकरणले हैटौंडा, ढल्केबर र इनरुवामा २ सय २० केभी सबस्टेसन निर्माणको ठेक्का पाएको सीसीपीजीसँगको ठेक्का तोडी नयाँ ठेकेदार नियुक्त गरेको छ ।

ढल्केबरमा २ सय २० केभी सबस्टेसन निर्माण सम्पन्न भई सञ्चालनमा आइसकेको । हेटौंडा र इनरुवामा सबस्टेसन निर्माणमा भारतीय कम्पनीसँग ठेक्का सम्झौता भएको छ । कम्पनीले काम सुरु गरिसकेको छ । हेटौंडा, ढल्केबर र इनरुवामा ४ सय केभी सबस्टेसन पनि निर्माणाधीन छ ।

प्रसारण लाइन र सबस्टेसनको निर्माण सम्पन्न भएपछि पूर्व–पश्चिमको विद्युत् प्रवाह सहज हुनेछ ।

प्रकाशित मिति: मंगलबार, जेठ १४, २०७६ ०२:२२