सेती नदीमा पानीको बहाव बढ्यो, बझाङको सदरमुकाम चैनपुर उच्च जोखिममा

A+ A A-

लगातारको वर्षाका कारण सेती नदीमा पानीको बहाव बढेपछि बझाङ बाढीको उच्च जोखिममा परेको छ । मनसुन भित्रिएसँगै भएको अविरल वर्षाका कारण सेती, कालंगा नदी, बाहुली खोलालगायतका सानाठूला खोलामा पानीको बहाव बढेको छ ।

नदीमा पानीको बहाव बढेपछि जिल्ला प्रशासन कार्यालय बझाङले बाढी खतराको संकेतनजिक पुगेकाले सावधानी अपनाउन आग्रह गरेको छ ।

एक सूचना जारी गर्दै जिल्ला प्रशासन कार्यालय बझाङले नदीको बहाव बढेकाले काठ उतार्न, माछा मार्न, नदी तथा खोलानजिक नजान आग्रह गरेको छ । प्रशासनले नदी, खोलानजिक गएर दाउरा, बालुवा, गिट्टी, संकलन नगर्न र नदी खोलामा नुहाउन, माछा मार्न तथा जरुरी कामबाहेक एक्लै हिँड्ने काम नगरी उच्च सतर्कता अपनाउन आग्रह गरेको छ ।

जिल्लाका ३९५ स्थान बाढी तथा पहिरोको उच्च जोखिममा रहेको जिल्ला विपद् व्यवस्थापन समितिले जनाएको छ । जयपृथ्वी नगरपालिकाका ११६, बुंगल नगरपालिकाका ५१, साइपाल गाउँपालिकाका ११, तल्कोट गाउँपालिकाका २५, मष्टा गाउँपालिकाका ५१, सुर्मा गाउँपालिकाका १३, छबिसपाथिभेरा गाउँपालिकाका २२, दुर्गाथलि गाउँपालिकाका १३, खप्तडछान्ना गाउँपालिकाका २०, थलारा गाउँपालिकाका १०, केदारस्युँ गाउँपालिकाका ३४, वित्थडचिर गाउँपालिकाका २९ स्थान जोखिममा रहेको जिल्ला विपद् व्यवस्थापन समितिका संयोजक एवम् प्रमुख जिल्ला अधिकारी मोहनराज अधिकारीले बताए ।

सदरमुकाम चैनपुर उच्च जोखिममा

सेती नदी र बहुलीगाड खोलामा पानीको बहाव बढेपछि बझाङ सदरमुकाम चैनपुर बाढीको उच्च जोखिममा छ । जोखिम बढेसँगै स्थानीय कुन बेला सदरमुकाम बगाउने हो भन्ने त्रासमा छन् ।

सदरमुकामको पूर्वी भागबाट बग्ने सेती नदी र पश्चिमी क्षेत्रबाट बग्ने बाहुलीगाडमा बाढी आएमा एउटै रेखामा पर्न सक्ने र यसले सदरमुकामको अस्तित्व नै समाप्त पार्न सक्ने खतरा छ । खोलाले बगाएको बगरमा बस्ती बसेको र कुनै समय खोलामै विलय हुन सक्ने खतरा रहेको जानकारहरू बताउँछन् ।

बाहुलीको वितण्डापछि सदरमुकाम बचाउन अभियान सञ्चालन भयो । सदरमुकाम चैनपुर बचाउन सेती नदी र बाहुलीगाडतर्फ तटबन्धको काम हुन थालेको छ ।

बाहुलीगाडमा कुन दिन बाढी आउने हो र सदरमुकाम सखाप पार्ने हो भन्ने डरले त्रसित भएको नागरिक समाजका अगुवा धर्मजंगबहादुर सिंहले बताए । उनले भने, 'सेती र बाहुलीले सदरमुकाम आसपासको कतै न कतैको जमिन हरेक वर्ष कटान गरेकै हुन्छ । बहुलीगाडले बेला–बेलामा आफ्नो धार परिवर्तन गर्दै आएको छ । तीन वर्षअघि सदरमुकाम जोडने झोलुङ्गे पुल हेर्दा हेर्दै बगायो । हरेक वर्ष सेती नदी र बाहुलीगाडले धार परिवर्तन गर्ने हुँदा सदरमुकामवासीहरू खतराको महसुस गर्न थालेका छन् ।'

सरकारी कार्यालय र निजी आवासीय क्षेत्र गरी सेती र बाहुलीको बीचमा एक हजारभन्दा बढी घर तथा कार्यालय छन् । जोखिम बढेपछि जिल्ला प्रशासनले चैनपुर आसपासको सेती र बाहुली खोलाबाट ढुंगा, बालुवा निकाल्न रोक लगाएको थियो ।

प्रकाशित मिति: शुक्रबार, असार ४, २०७८ ११:४५