खुस्बु ओली यात्राः आश्रयदेखि विश्वकपसम्म

A+ A A-

झापा सुरुंगाकी खुस्बु ओली मोडल तथा समाजसेवी हुन् । उनी यतिबेला चेक बाउन्स मुद्दा कारण चर्चामा छिन् ।

मंगलबारको जिल्ला अदालत काठमाडौंले उनलाई ३ महिना कैद र ३ हजार जरिमाना फैसला गर्यो । त्यसविरुद्ध उनी आजै मात्र उच्च अदालतमा अपिल गर्ने बताइसकेकी छन् ।

अदालतको फैसला आएपछि उनले विज्ञप्तिमार्फत आफूले रकम तिरिसकेको दाबी गरेकी छन् । रकमको वास्तविकताबारे उनले माथिल्लो अदालतमा अपिल गरिन् भने थप तथ्य खुल्ला । तर, यतिबेला भने उनी काे हुन् र किन चर्चामा छिन् भन्ने चासो सर्वत्र छ ।

चरी चर्चा

गुन्डा नाइके दिनेश अधिकारी ‘चरी’सँगको प्रेम सम्बन्धका कारण एकाएक चर्चामा आइन् उनी । चरीको प्रहरी इन्काउन्टरमा हत्या भएपछि उनी बेलायत गएकी थिइन् ।

पुरस्कार र अध्ययन

सन् २००० मा काठमाडौं जेसिसद्वारा आयोजित प्रतियोगितामा ओलीले ‘लिटिल लेडी’ उपाधि जितेकी थिइन् । त्यस्तै, सन् २००६ मा उनले मिस टिनको ताज लगाएकी थिइन् ।

ओलीले बेलायतको अक्सफोर्ड विश्वविद्यालयबाट अन्तर्राष्ट्रिय द्वन्द्व व्यवस्थापनमा मास्टरसमेत गरेकी छन् ।

समाज सेवा

काठमाडौंको फर्पिङमा ‘सपना आमाघर’ खोलेर उनी समाज सेवामा लगेकी हुन् । उनले विशालनगरमा समेत ‘सेल्टर आश्रय’ स्थापना गरेकी छन् । जहाँ ४० बढी सडक बालबालिकाले आश्रय पाएका छन् ।

ओलीकै पहलमा ११ देखि २७ मे २०१८ सम्म रुसको मस्कोमा भएको ‘स्ट्रिट चाइल्ड विश्वकप’मा ‘सडक नेपालका बालबालिका’ले भाग लिएका थिए । उक्त विश्कपमा नेपाल क्वार्टर फाइनलसम्म पुगेको थियो ।

नेपालको तर्फबाट रमेश साह (मिडफिल्डर,बालमन्दिर) एरोन कार्की (गोलरक्षक, खुसी नेपाल गोलरक्षक) मनवीर लामा (रक्षक, खुसी नेपाल) विकास तिमल्सिना (रक्षक, सांग्रिला अर्फान्स) रोहन भुसाल (मिडफिल्डर, खुसी नेपाल) रमेश साहसचिन विक (मिडफिल्डर, थ्री एन्जल्स् नेपाल), सन्तोष खत्री (मिडफिल्डर, बालमन्दिर), हर्ष ठकुरी (स्ट्राइकर, बालमन्दिर), पवन शाही (स्ट्राइकर, एक्सन लभ नेपाल)ले सहभागिता जनाएका थिए ।

ओलीले ‘रिह्याबिलिटेसन अफ स्ट्रिट चिल्ड्रेन बिफोर एन्ड आफ्टर’ नामक डकुमेन्ट्री पनि बनाएकी छन् । त्यस्तै, उनले निःशुल्क सेवा दिने सर्तमा झापाको सुरुंगाकै रेडक्रस उपशाखालाई एम्बुलेन्ससमेत दिएकी थिइन् ।

ओली चरीसँगको प्रेम सम्बन्धले मात्र होइन, समाज सेवाका कारणसमेत चर्चामा आएकी मोडल हुन् ।

प्रकाशित मिति: बिहीबार, जेठ ९, २०७६ ०४:००