छवटा एम्बुलेन्सले पनि नधान्ने देखिएपछि अटोलाई एम्बुलेन्स बनाउँदै थाहा नगर

छवटा एम्बुलेन्सले पनि नधान्ने देखिएपछि अटोलाई एम्बुलेन्स बनाउँदै थाहा नगर

A+ A A-

मकवानपुरको उत्तरी क्षेत्रस्थित थाहा नगरपालिकाले नगरभित्र सञ्चालित एम्बुलेन्सले पनि नधान्न सक्ने सम्भावना बढेको भन्दै अटोलाई नै एम्बुलेन्स बनाउने भएको छ ।

मकवानपुरका १० स्थानीय तहमध्ये कोरोना संक्रमणको उच्च जोखिममा रहेको थाहा नगरपालिकाले संक्रमित बिरामीलाई समयमै उपचार गराउन अटोलाई एम्बुलेन्स बनाउने निर्णय गरेको हो । थाहामा शुक्रबार दिउँसोसम्मको तथ्यांक अनुसार ८० जना संक्रमित छन् । जसमध्ये अधिकांश होम आइसोलेसनमा उपचाररत छन् । नगरपालिकाले नगरका स्वास्थ्य संस्था र निजी क्षेत्रद्वारा सञ्चालित ६ वटा एम्बुलेन्सले पनि आगामी दिनमा धान्न नसक्ने निष्कर्ष निकालेको थाहा नगर प्रमुख लवशेर विष्टले जानकारी दिए ।

‘दैनिक संक्रमित बढ्दैछन् । हाम्रो नगरपालिका भौगोलिक रूपले विकट हुनुका साथै ठूलो पनि छ । धेरै संख्यामा बिरामी भएपछि ६ वटा एम्बुलेन्सले पनि धान्दैन् कि भन्ने सम्भावना कारण अटोलाई एम्बुलेन्स बनाउन लागिएको हो,’ विष्टले भने, ‘निषेधाज्ञामा अटो पनि सञ्चालन हुन पाएका छैनन् । तत्काल एम्बुलेन्स खरिद गर्ने स्थिति पनि छैन् । त्यसैले १२ वटा अटोलाई एम्बुलेन्स बनाउँदै छौँ,’ उनले नगरका १२ वटै वडामा एक–एक वटा अटो एम्बुलेन्सका रूपमा राखिने बताए ।

एम्बुलेन्सका रूपमा प्रयोग गरिने अटोका चालकलाई पीपीई अनिवार्य लगाउने पर्ने, चालक बस्ने भागमा प्लाष्टिकले ढाक्नु पर्ने नियम बनाइएको विष्टले जानकारी दिए । अटो प्रयोग गर्ने स्वयम बिरामीले शुल्क तिर्न पर्नेछ । तर, नगरपालिकाले शुल्कको बारेमा पनि कुनै निर्णय गरेको छैन । समयमै एम्बुलेन्स पाउने अवस्था नहुन सक्ने र जारी निषेधाज्ञाका कारण यातायातका अन्य साधन पनि नपाइने समस्याका कारण प्रत्येक वडामा अटोको प्रयोग गर्न लागिएको नगरका उपप्रमुख खड्ग गोपालीले बताए ।

नगरपालिकाले अटो व्यवसायी संघसँग प्रत्येक वडामा एउटा अटोलाई चौबिसै घण्टा तयारी अवस्थामा राख्नेगरी सहमति गरेको गोपालीले बताए । बिरामी बोक्न प्रयोग नभएको अवस्थामा ती अटोलाई अत्यावश्यक सामान ढुवानीमासमेत प्रयोग गर्न सकिने गरी सहमति भएको नगरपालिकाका सूचना अधिकारी सुरजकुमार भुजेलले जानकारी दिए ।

थाहाको बज्रबाराहीस्थित सुमार्गी भवनमा नगरपालिकाले २० बेडको अक्सिजनसहितको आइसोलेसन निर्माण गरेको छ । नगर प्रमुख विष्टले अवस्था हेरेर आइसोलेसनमा बेड विस्तार गर्ने बताए । थाहामा कोरोनाको पहिलो लहरमा ५ जनाको संक्रमणका कारण मृत्यु भएको थियो ।

संक्रमण रोक्न प्रत्येक वडामा समिति

कोरोना संक्रमण रोकथाम र नियन्त्रणका लागि थाहामा नगरस्तरीय र प्रत्येक वडामा कोभिड रोकथाम तथा नियन्त्रण निर्देशन समिति गठन गरिएको छ ।

जोखिमका आधारमा मकवानपुर प्रशासनले निषेधाज्ञा लगाएपछि थाहामा संक्रमणको रोकथाम तथा नियन्त्रण र निषेधाज्ञा कार्यान्वयन गराउन निर्देशन समिति गठन गरिएको हो । नगर प्रमुख लवशेर विष्टको संयोजकत्वमा थाहानगरमा क्रियाशील राजनीतिक दल, प्रहरी, संघसंस्थासहितका प्रतिनिधि सम्मिलित १३ सदस्यीय समिति निर्माण गरिएको छ ।

निषेधाज्ञाको पूर्ण कार्यान्वयन गर्न/गराउन वडाध्यक्षको अध्यक्षतामा वडामा समिति बनाएर सक्रियता बढाउन लागिएको नगर प्रमुख विष्टले बताए । उनले वडामा समिति निर्माण गर्ने कार्यलाई तीव्रता दिएको बताएका छन् । वडामा क्रियाशील राजनीतिक दलहरुका प्रतिनिधिहरु सहितको अनुगमन समिति समेत गठन गरिने भएको हो । नगर र वडा समितिले नियमित रुपमा कोभिड—१९ को रोकथाम तथा न्यूनिकरणका लागि आवश्यक कार्यका लागि तत्काल निर्णय गर्ने विष्टले बताए ।

समितिले नियमित अनुगमन, संक्रमित बिरामीको व्यवस्थापनलगायतका कार्य गर्ने उनको भनाई छ । थाहा नगरपालिकाले कोरोना महामारीलाई रोकथाम गर्न उच्च सतर्कता अपनाएको छ । नगरमा आइसोलेसन निर्माण गरी २ जना डाक्टर, स्टाफ नर्स, ल्याव असिस्टेन्ट नियक्त गरेर पचासप्रतिशत भत्ता सुविधा दिने भएको छ । हालसम्म नागरिकबाट ३० वटा सिलिण्डर उपलब्ध भइसकेको नगरपालिकाले जनाएको छ ।

प्रकाशित मिति: शुक्रबार, वैशाख २४, २०७८ १८:२९