फेरि निषेधाज्ञा : नआत्तिएर यी सामानको जोहो गर्नुस्

A+ A A-

सरकारले निषेधाज्ञा लगाउने भएसँगै कालीमाटी, बल्खु, असन बालाजुलगायतका बजारहरूमा चहलपहल बढ्न थालेको छ । खाद्यान्न किन्न सुरु गरे पनि कस्ता प्रकारका खान कुरा सञ्चिति गर्नुपर्छ भन्ने अन्यौल उपभोक्तामा देखिन थालेको छ । यसैबीचमा हल्लाका पछि लागेर आवश्यकताभन्दा बढी सामान किन्ने उपभोक्ता पनि बढेका छन् ।

डा. अरुणा उप्रेती निषेधाज्ञामा सामान किन्दा त्यसबाट पाइने पौष्टिक तत्त्वलाई पनि विचार गरेर सामान किन्न आग्रह गर्छिन् । उनी भन्छिन्, ‘हाम्रै घरमा रहेका तर हामीले नै थाहा नपाएका थुप्रै खानेकुरा छन् जसबाट रोगसँग लड्ने शक्ति पाइन्छ । सामान किन्दा हतार नगरौँ बुझेर किनौँ ।’

डा. उप्रेती खाद्यन्न किन्न जाँदा मरिच, मेथी, धनियाँ, मह, कागती, चिज, अण्डा, खोर्सानीजस्ता सामाना अनिवार्य किन्न सुझाउँछिन् । योसँगै दैनिक रूपमा टुसा उमारेका खानेकुरा, अम्बा, दही, फलफूल, मोही, माछामासुजस्ता खानेकुराबाट इम्युनिटी पावर बढ्ने हुँदा सो खानेकुरा किन्न उपभोक्तालाई आग्रह गर्छिन् ।

नयाँ र कडा प्रकारको कोरोना संक्रमणबाट बच्न र लागिहाले पनि रोग प्रतिरोधात्मक क्षमता बढाउनका घरमै भएका खानेकुरा पर्याप्त रहने डा. अरुणा उप्रेती बताउँछिन्

उपभोक्ताकर्मी अर्जुन बस्नेत हल्लाको भरमा पनि कहिलेकाहिँ बजारमा अभाव हुने हुँदा एक महिनाका लागि पुग्ने चामल, दाल, तेल, ग्यास, सामान्य रुघाखोकीका लागि चाहिने औषधि किन्न सुझाउँछन् ।

उनी भन्छन्, ‘हौसिएर वा आत्तिएर धेरै नकिन्नुस् यसो गर्दा नभएको अभाव पनि सिर्जना हुन्छ । एक महिनालाई पुग्ने सामान किन्नुभयो भने त्यसपछि आपूर्ति पनि सहज हुन्छ ।’

उनले भनेजस्तै केही दिनअघिदेखि नै ग्यासको माग उच्च हुँदा ग्यास बिक्रेता पनि आवश्यकभन्दा धेरै नकिन्न उपभोक्तालाई आग्रह गर्दै आएका छन् । एलपी ग्यास उद्योग संघका अध्यक्ष गोकुल भण्डारीले ग्यास आयातमा कुनै समस्या नभएको भन्दै ग्यास अभाव नहुने बताउँछन् । उनले सर्वसाधारणलाई खाली सिलिण्डर भर्न आग्रह गरे पनि अभावको अवस्था भने नआएको बताउँछन् ।

प्रकाशित मिति: सोमबार, वैशाख १३, २०७८ १९:१०